Qarra kalaqanso qarra tira ayirritanno? Wole yaattonni mitiimma kalaqanso mitiimma tira shottanno? Woy huno assanso sa’’o xa’mira/maaro ayirritanno? Tenne hedo manchi beetti baca heeshsho giddo lamu raginni (Maganittetenninna kalqittete heeshsho xaadooshshinni) la’nara dandiinannita ikkiturono kawaano ikkito ka’aanni coyi umilla manchi beetti heeshsho soronna maarote mereeri leepho ikkaseetinna manchi beetti kayinni afinoha ikkiro leephote aana gumunni hossi yee qaafe sa’’a dandaasinna; hawinoha ikkiro kayinni korunni gaggawanni kadinowa marro kadanni leephote aana hawwu yaanni uwasiiti.
Hanni tenne hedora xawishshu faasho ikkara dandaannoha lamu manni mereero assinoonniha dagoomitte heeshsho hasaawa konni woroonni haranchunni qummeesso’nekka yeeti.
Mittu wedellichi Quraanu (Isliminnu amma’no qullawu maxaafi) roso qajeelara woy rosara ustaazichunniwa (Quraanu rosiisaanchiwa) borreesame dinyirino barrinni Masgiidu hoowe giddo Quraanu rosi minira maranno woyte ustaaazichuno hakko wedellichinte gede borreessantinore sase dirunnino ikko rosu deerrinni taaltino wedelloota mulesi wodhe hasaawisanni heereenna mare keere haare e’’e ofolli.
Hakkuyi gedensaannino ustaazichu wona darawosi xa’minte gede isono qixxaawote buuxishshita balaxote xa’mo xa’ma rosoho albaanni gadachitanno wodho ikkasenni wedellichu ledo assinoha xa’monna dawarote hasaawa konni woroonni shiqino garinni la’neemmoha ikkanno:
Ustaazi: ‘’Hawalle keerunni dayootto; maahoyyenna tenne albaanni
kulummohe garinni quraana qara’’ate woy rosate garunni qixxaabbe dayiitto?’’
Rosaanchu: ‘’Hawalle keerunni keeshshitini, Ustaazi; ee garunni qixxaawalla Rooroommo.’’
Ustaazi: ‘’Maahoyye qixxaawoottoro danchatena hanni roso hanafankera
albaanni wona miillakkino xa’moommoti balaxote xa’mo noona qaxaqqa’a yite macciishshie; iseno maati yiittoro xeerto ikkito muli doogo ha’nanni woyte illenkella fayyo ikkituro doogote aana babbaxxinorichi la’nanni, mito woyte maala’lalisannore ka’a woyte mararsannonna halchishannore la’nara dandiinanni. Hanni ati dagganni doogote maricho laitto? Hanni xunsite laoottorichi giddonni mittoricho kulinke.’’
Rosaanchu: ‘’Laoommorichi giddinni xunse laoommohu maati lawi’ne, mitto wodala biifado harrichooti.’’
Ustaazi: ‘’Harrichu ayiiho? Atehonso — ?’’
Rosaanchu: ‘’Dianehona ayiihoro diafoommo?’’
Ustaazi: ‘’Ateha ikka hoogina manniha mayira xunsite laittoyya?’’
Rosaanchu: ’’Mulla baxise tashshi asseennaella laoommo.’’
Ustaazi: ‘’Maahoyye hattootiro hakko iso cubbokki ajishirattora Kaaliiqi
minira dagganni manniha halchanna la’’a maarote hodhishsha ikkitukkinni cubbu baraarshaatina; kayinnilla ‘’fulle ooso di’’ikkinanni yee oddo leddinaekka!’’ yino harrichi gede albaanni nooheha ajishireemmo yite duqqite dagganni nootto cubbinnino roore doogote oddo assidhe lexxoottohu rosoho qixxaawoottokkita buuxisanno daafira wona marro marro higganni xunsite la’e hixamanyitto harricho surrekki giddonni fushshite hoolte aantino lamalara garunni qixxaabbe amo.’’
Rosaanchu: Masgiidu hoowe giddonni fulinonkunni agure hige ’’Ustaazi konne
harricho surre’ya giddonni hiisse fushsheemmoro dikulattoe; kowiichonni iso fushshe hune roso’ya xaanni hanafe dandeemmokka yeetina kayinni eemmo eeggatena?’’
Ustaazi: ‘’Wona hiissitella eessootto? Okkote — Wona muddamme eessini
gede muddamme fushshinanniha di’’ikkinohona hanni wona ei garanna akata seekkite xunsite hegersite fushshinanni garano hakko bikkinni woy woyyaawinonna roorinno garinni buuxxe muddamittokkinni suutunni wo’naalte amo. Ati eessoottoha ani hiisse surrekki giddonni fushshammora xa’mattoe; mittu manchira soodo fanino waalcho hawarro cufanno gari hiikke ba’’annosi? Manchi beetti cubbonna soro/ huno/mitiimma kalaqannonna loosanno gara afina cubbisira maaronna sorosiranna hunosira tiro afiranno gara hiikke hooganno!
Hegersinoommero soronke woy qarranna mitiimmanke xunsine afa foonqenke duqqinoommonte gedeenni hee’rate rosicho dandoo assi’ra agurre hakkuriuu shotunni tirateno ikko gargadhate qoleno mitiimmanke duqqa dandoo assirantenni jifonke qeelate faashora waaco ikkitannonkenkanni. Woleteemmero mitiimma kalaqanna dandoo assira worbimma ikkitukkinni, mitiimma qeelatenkanni worbimmate worbimma.’’
Demmellaash Demmeqe
Bakkalcho Arfaasa 29, 2017 M.D
