Addis Ababa:- Amaaru qoqqowira aananno aganira gobboomu amaalamme loossa harinsannita Komishiien egensiissu.
Oromiyu qoqqowirano Sadaasu 7,2017M.D hanafe ajanda gamba assate amaalammete gafa harinsannita xawinsoonni.
Gobboomu amaalamme komishiine qaru komishiinerchi Pirofeeser Mesfin Ariaya Itophiyu pireesete uurrinshara xawisino garinni; Amaaru qoqqowira woradu deerrinni amaalammete beeqqaano doorsiissanore 2 kume 200 ale qineessaanora qajeelsha aate balaxote loosi goofino.
Qoqqowoho haammata woraddara qineessaano bissa filatenni doorsiinsoonni yiinohu qaru komishiinerchi; aananno aganira gattinota amaalammete loossa harisate mixi’noonnita qummeessino.
Komishiine xaa yannara amaalammete sirnya gamba assanna qara gobboomu amaalamme songo beeqqitannore doorsiisate harinsho aana nooha ikkanna; honse quchummanna lame quchumu gashshoottara tini harinsho gumulantinota kulino.
Sadaasa 7,2017M.D hanafe Oromiyu qoqqowira sirnya gamba assatenna gobboomitte amaalamme songo beeqqaano filate loossa gumullannitano qummeessino. Oromiyu qoqqowira 350 ale woraddanni daggannori 7 kume ale beeqqaanonna qoqqowoho hajo la’annonsa bissanni ledo ikkatenni qoqqowu sirnya gamba assate looso gumullannitano hattonni.
Qaru komishiinerchi xawishshi garinni; gattino qara qara loossa Federaalete hajo la’annonsa bissa gamba assatenni hasaawu ajanda shiqishshanno gede assatenni hattono Itophiyu gobbaanni heedhanno Diyaaspori ledo xaadatenni hasaawu ajandansa sokkanno gedenna uynanninsa yannate shae garinni beeqqaano sokkanno gede assinanni. Kunino, amandoonni harinsho 80% guuta assannota kaysino.
Komishiinete massagaano Tigirayete qoqqowira hadhe mite mite hajo la’annonsa bissa hasaawissinota kule; qoqqowuno amaalammete hasatto leellishinota qummeessino. Qoqqowoho afantannori Yuniversitete fullahaano ledono danchu garinni hasaawa dandiinoonnita coyi’rino.
Komishiine xaa yannara qoqqowoho afantanno hettisamaano paartubba riqiwamaano hattono siivikete maamarra riqiwamaano ledo hasaawate qixxaawo assitanni nootanna konni ragaanni qoqqowu dawarono eewaancho ikkitinota kulloonni.
Qodhite sharrantanni noorinna gobboomu amaalammete komishiine ledo loosa hanaffinokkiri poletiku paartuwara woshshatto assinannita xawisinohu qaru komishiinerchi; miti mitu poletiku paartuwa hasaawate albaanni balaxo uynanni hajubba noonke yitannotanna gattinori kayini komishiinete aana huluullo noonsata coyi’rino.
Huluullonsara kaima korkaata bande afa hoongirono; komishiine kayinni xaa yannara 50 ale ikkitannori poletiku paartuwa ledo loossanninna komishiinete loossa paartuwa ledo heedhe la’anno gede assinanni hee’noonnitano qummeessino.
Komishiine baalanta dagoomu bissa beeqqisiisa noosehura gobbate giddono ikko gobbaanni qodhite sharrantannori Itophiyu qansooti ledo xaadooshshu noonsa bissa ledo xaande hasaawatenni qarrubba gutunni tirate baalunku amaalammete beeqqitanno gede assate wo’naallannita lede coyi’rino.
Amsaalu Felleqe
Bakkalcho Bocaasa 26, 2017 M.D
