![](https://press.et/bakalcho/wp-content/uploads/2024/07/0.jpg)
33ki yannara Ferensayete Paarisete quchumira harinsanni 2024 Olompike beeqqitannota Itophiyu gaamo tenne lamala giddo gashshootu mine geegiissinoonni. Geegote amanyooti aana IFDR Pirezidaantitte Sahileworq Zewude lendanna Budunna Ispoortete ministerenna Olompikete komite massagaano gaamote jawaacishatenna baqqi assate sokka sayissino. Ispoortanyootuno eeggote baandeera adhitino.
Pirezidaantitte Sahileworqi Zewude ayissino sokkanni; “Ilamate tarenni gobbanke baandeeri gotti yee leellanno gede assitinno bareedda Ispoortanyooti galatama hasiissannonsa” yitino. Tayxe Paarisete 2024 Olompikenni Itophiya naaxxisiisanno gumi borreessamannota noose ammana xawisse; gobbate baandeera kalqete xawira gotti assitanno bareedda Ispoortanyooti qotira ikkatenni jawaachisha hasiissannota coyidhino.
Budunna Ispoortete ministircho dukko Shewwit Shanka ise widoonni; Ispoortanyootu qixxaawonsa assitanno yannara Itophiyu Isspoortete akkadamera afante Atileetoota jawaachishshino. Tenne yannara Itophiyu Atileetiksete beeqqo dhagge qeelletenna worbimmatenni borreessantinota ikkase kayisatenni; Paarisete harinsanni heewo aana tenne qeelle sufisiisatenni Itophiyu baandeera gotti assite gobbate su’ma bowirsitanno yite ammantannota xawissino.
Gaamote Atileetootinna qajeelsaanono konne kalqoomu jila jiltanni afantannori qixxaawonna Paarisete borreessiisate heddino guma xawissino. Mereerimunna seedu xeertinyi qajeelshaanchi Hilluf Yihdego; lame agannara babbaxxitino diilallote akatinni qixxaawonsa assitanni keeshshitinotanna Atileetootuno gaamotenna mittimmatenni gumaho qixxaawansa xawisino. Konni garinni mittu diri ale Olompikete garunni qixxawo assinoonniha ikkanna Tookiyo Olompikenni woyyino guma borreessiinsanni yee hexxo assannota coyi’rino.
Wolu gaamote qajeelshaanchi Toleera Dinqa; konni albaanni Siidininna Lendenete Olompikuwanni borreessiinsoonnihanna dirranni dayino guma; Paarisete Olompikenni qolsiisate foonqe bande loonsanni hee’noonnita qummeessino. Woyyaawino guma borreessiisatenna Tookiyote kalaqamino bassa hunate jawaatanna murcidhino Atileetooti hee’ransanni goofimarchu geeshsha jawaatte loossannotanna Atiletootuno qixxaawonsa danchu garinninna gawajjotenni co’o ikkite assitanni keeshshitinnota huwachishino.
Albisa Atileetitte Gudaaf Tseggay, Hagoos Gebremedihininna Habtaam Alemu heewote qixxaawo garunni assitanni afantannota coyidhe; dancha guma borreessiisate jawaatte loossannota sheemaate e’ino.
Ga’a hananfanni 2024 Paarisete Olompike beeqqitanno 206 gobbuwanni mitto ikkinohu Itophiyu, sase ispoortuwanni (Atileetikse, waa daahatenna tuntu’motenni) beeqqanno yine agarranni. Kuri Ispoortuwanni 30 ale Atileetooti doorante lame agannara gamba yite Addis Ababaho, Bishooftunna Sendaafaho qixxaawo assitanni keeshshitino.
Itophiyu Atileetiksetenni mereerimunna seedu xeertinyi hattono 20km harumu heewonni beeqqitannoha ikkanna; rosamino garinni jajjabba qeelle borreessiissanno yine agarranni. Ledoteno, waa daahatenni meentu 50 meetire daahatenna, labballu tuntu’motenni 57 kg nni beeqqitanno yine agarranni. Atileetiksetenni 33, waa daahatenni 1 na tuntu’motenni 1 xaphooma 35 Ispoortanyootinni riqiwante gumaho heewisantanno. Itophiyu Faranjootu 1956ni Melborni Olompike beeqqa hanaffinoha ikkanna; 1976ni Montiriyal, 1984ni Loos Anjelesi hattono 1988ni Seuli Olompikera calla beeqqitukkinni gattino.
Kalqe sirchu, amma’note, afuunna budu badooshshi nookkiha mittu caali hundaanni Ispoortete heewonni heewisiissanno Olompike ga’a iibbadu garinni Ferensayete qaru quchumira Paarisete hanafantannoha ikkanna wolootu heewubba barrahonna balaxxe hanaffurono Itophiyu gummaame ikkitinotinna kalqete ledo egennantinoti Atileetiksete heewo mitte lamala gedensaanni Maaja 25,2016M.D nni hanaffe hadhannoha ikkanno. Fanote amuraateno wole yannanni baxxino garinni Olompikete qachi gobbaanni harinsanniha ikkanna; beeqqaano gobbuwa Biheraawe gaamo gobbansa baandeera amadde Yowolote aani hodhishshinni egensiissannoha ikkanno.
Tayxe Olompikenni 206 gobbuwanni fultinori 10 kuminna 500 ali Ispoortanyooti 39 Ispoortete daninni qixxaabbino meedaaliyubba goowinsara wodhate heewisantanno. Ledoteno, babbaxxitino gobbuwanni hodhite wolootu gobbuwara heedhannori 100 miliyoone daramaano riqiwatenni 11 gobbuwanni fultino Ispoortanyootino kalqoomu Olompike komite baandeeri hundaanni heewo beeqqitanno.
Qiddist Gezzaheny
Bakkalcho Maaja 18, 2016 M.D