Ayirradda nabbawaanonke techono sa’ino doogo rosiissannonke yine hedatenni wole maassamaancho haa’ne shinqoommo. Tenne lamala seyoote amadonkenni buxima rosu aana kalaqqanno xiiwora anga uyitukkinni jawaatte rosse jawiidi rosu uurrinshanni luphiima guma borreessiisatenni buximate giddoonni buxuqqante rosiisidhino maatesenna dagoomase hagiirsiissara dandiitinotanna hattono woloottu haammatu seennira dancha lawishsha ikkitanno yine hedatenni mitte tayixe danchu guminni maassantino Dukko borronkenni haa’ne shinqoommo.
Dukko Gaaddise Itefa yaamantanno. Ilante lophitinohu Oromote qoqqowira galchimi Wollaggu zoone Nejjo yinanni woradi giddooti. Dukko Gaaddise maatete giddo ilantino Lee ooso mereerinni callicho meyaata ikkiturono; hattono heeshshonsa baadiyye gobbate qarqarto ikkiturono heddinowa iillatenni digufisantino.
Ledoteno Gaaddise maate anga ajjinore woyi hoffaayidi heeshshote deerrira afanrtannoreeti; ikkollana rosoho baxxino bayicho uyitannoreeti. Heeshsho qeelate assitanno sharrora qoteho oosonsa dancha deerra iillitannonsa gede dandaaminsare baalankare assatenni badhera diyitanno.
Gaaddise wolootu darawose gede amasenna annase irshu loosinni kaa’litanni lophitino. Loosidhe galtino maatenni ilantinota ikkasenni gibirrinnu daafira garunni egentino. Bayiruuddu roduuwiseno rosinsanni bilchaata ikkansanni egennonna rosicho beekkannase lophitinota kultanno.
Dukko Gaaddise uminna layinki dirimi rosose ilantino qarqartora afantanno rosi minnara rossino. Aanteteno 12 kifile gobboomu fonqolo adhite dancha guma borreessiisatenni Dembi Doollo Yuniversite karsantara dandiitino.
Jeefoteno tayxe babbaxxitino jawiidi rosu uurrinshuwanni luphiima guma borreessiisse maassantino 2016 maassamaanonni mitte ikkitara dandiitino. Kunino Dembi Doollo Yuniversitenni Ikonomikisete rosu golinni hattono xaphooma hoowete maassamaanonni 3.94 ikkinoha ledote guma borreessiisatenni Meedaaliyunna boowete baraarsha adhitino; maassamaancho Gaaddise Itefaati.
Kuni baxxinohunni Gaaddisenna qooxeessisera noo dagoomira jawa hagiirre kalaqino. konni aleenni Dhaggeeffachishanno coyi hee’riro maassamaancho Gaaddise mine assidhe heedhenni rosseeti luphiima guma borreessiissara dandiitinohu.
Minaannise ledo egennantinohu layinki diri Yuniversitete rosaancho ikkite noo yannaraati. Layinki diro gudde fooliishshote qa’’e higge noo yannara umise fajjonni baxxenna baxante huuccantinoha ikkirono; rosisenni gufisantukkinni gumiseno ajikkinni maassantara dandiitino. Baalunkuri aleenni rosu balaxannotanna balaxxe borreessiissanni daggino gumi dirrannokki gede amaalatenna Roore yannara baadiyyete qarqartora seennu rosunni alba hige fulanno gede ikkikkinni heeshsho qeelate mini giddi looso loosanno gede holgira qollella xiimbanni. Hattono dirinsa iillikkinni adhamate reqeccaawanno. Ikkollana yanniweelo mine assi’ra fayyimmate aana iillishshanno qarra Gaaddisenna maatese seekkite affino.
Dukko Gaaddise Yuniversitete giddo baxxinohunni seennu aana daa’’attinore xawissanni; “Yuniversite heeshsho duuchu garinni soorritanno. Ledote egenno afi’rate kaa’litannore jajjabba maxaaffa shotunni afi’nanniwaati. Ikkollana mitu mitu seenni aana shotinse la’’anna haariimate ikkito batidhe leeltanno. Xiinxallatenna marroonni illachira sharramantenni roore boohaarate yanna sayisate daanno seenni batinyeho” yaatenni xawissanno.
Baalunkuri aleenni dagoomittete qoolla horonsi’nanni hayyo aana jawu qarri noota kayissanno. Seeda yanna addi addi dagoomittete qoola horonsi’nanni huna batinyu seenni aana leellanno qarraati. Kayinnilla Yuniversite e’’a illachu nookkiha yanna sayinsanniwa ikkikkinni hende fulloonni illacha guma gansiinsanniwaati yitanno. Dagoomittete qooli amandoonni illacha gufisannokki garinni horonsi’niro mitte egennotenna e’’ote bue ikkara dandaanno. Dagoomittete qoolla aana shiqqannota viidiyotenni irkisantino egenno bowirsitanno amado shotunni huwatate dandiisanno garinni horonsira hasiissannota huwachishshanno.
Gaaddise mine assidhunkunni mitto diro ikkinoseta kulte minaannise ledono sumimmetenna halammate aana safantino heeshsho massaggannota qummeessitinno. minanniseno ajuuja noosihanna minaamasi ajuuja guma gansiisate jawaata irkisaanchose ikkinota ledde coyidhanno.
Dembi doollote Yuniversite Gaaddise labbinore woloota seenne rosaano rosunni bilchaatinorenna albisa ikkitanno gede assate loossanni afantannota kulannohu Yuniversitete pirezidaantichi dokter Leta Tesfayehu; xaphooma haammata worba rosaano baxxinohunni seenne bilchaata rosaano qajeelsate sharro assinanni hee’noonnita xawisanno.
Dokter Leti loonsanni hee’noonni loossa xawisanni; seennu nabbawate budensa bowirsi’ranno gede jawaachishate nabbambanni mini gonxanni mininsa mule minnoonni. Seennu jawaatte loossuro hiikko coyi giddoonni gummaamma ikkitannota Gaaddisewinni rosicho adhanno gede huwachishinno.
Yuniversite loosu kalaqonna teknoloojetenni gobboomu deerrinni xaggeeffachishshanno kalaqo egensiissara dandiitino. Lawishshaho; Diroonete teknoloojenna batinye gibrinnu kalaqo yuniversitete giddo gumulantino. Baxxitino dandoo noonsari jawaata rosaano yuniversite karsante harammaadda qajeelshuwa uyine kalaqote dandoonsa jawaachishate loonsanni hee’noonnita buuxisino.
konni garinni mannu loosino huwatate dandoonni, kankichunna manniweelo horophilluwa handaarranni jawa guma borreessiinnoonnita pirezidaantichu lede egensiisino. federaaletenna qoqqowuniri mootimmate loosu sooreeyye haaruudde kalaqo daa’’atatenna naadatenni sainohunni rosicho wole base tuqissanno gede qummeessino.
Ledoteno Yuniversite laalchonna laalchimma lossatenni loosidhe galtinori heshsho woyyeessate gibrinnunni tantana hanaffino yaannohu pirezidaantichu ; konni garinni barrunni 35 Liitire ado uyitannore 5 Miliyoone iillannoha saadate sirchonna qulxu’me hoowete giddoonni ce’ne dagate beenkanni afammanni. Sagalete wowe buuxisateno luphiima laalchimma noonsare gati muro sircho loosidhe galtinorira tuqisatenni ledote dargaho leelte towaatatenni teknikete irko assitanni afantannota dokter Geleta Tesfayehu uurrinshanke ledo assino hasaawinni buuxisino.
Qiddist Gezzaheny
Bakkalcho Maaja 11, 2016 M.D
