![](https://press.et/bakalcho/wp-content/uploads/2024/07/5.jpg)
Godowinni hee`noonni yannara looqqi assanna tufu qarrisannonsa amuwi aante noo coyibba gumula macciishshamme shotisansara dandaanno.
- Mullu godowinni barrisidhinoonte!
Goxichunni ka`ine seeda saate mullu godowinni keeshsha macciishshamme iibbabbishara dandaannohura hakkawontenni shota ikkitinore buskuute, hawaawe labbinore moola ikkitino sagalla balaxxe itate wo`naalle.
- Iibbitino sagale saga`lantenni roore qiissitine saga`le
Iibbitino sagalla foolinsa lowo geeshsha fulannohura hiittenne sagaleno raissiniro qiissitine saga`le; korkaatuno sagalete foole ajishannohura looqqi assatenna tushshiishate macciishshamme iibbabbitannokki gede kaa`lanno.
- Baca makimaano, maxinenna qiwaate batidhinonsa sagalla ajishshe
Makimaano, maxinenna qiwaate looqqi assatenna tufu macciishshemme iibbabbishshannohura saga`le`ne giddo dandaami bikkinni tini waacubba taaltinota ikkiteemmero danchaho.
- Saga`litinanniti murantino saate heedho`ne
Saga`le`ne saga`litinanni woyte afi`ninna dandiini yannara yaantenni roore yanna murtine saga`lanna sagallate mereero ikkado yanna aa kaa`litanno.
- Shiima shiima rakkine saga`le
Sagale saga`litinanni woyte saate murate ledotenni mitteege baca saga`lantenni roore 3 saate badooshshinni shiima shiima saga`la woyyitanno.
- Sagale`nera ikkado illacha uuyye
Sagalete yannara bilbila, televizhiine labbinore illacha`ne adhitanno coyibba wirri assitineemmero amaallanni; kunino saga`le`ne coomishidhinannikki gede assate ledotenni bikku aleenni saga`litinannikki gede kaa`lannoho.
- Jaanjiweelo, loomenna labbino amado noonsa gumma (Citrus fruits) looqqi assate macciishshamme ajishatenni egennantinore ikkitinohura aye woyte horoonsidhe.
- Ikkado waa/du`namaano adhe
Barru giddo shiima shiima waa gubba kaa`litanno; mullicho waa aga ayirritanno`neha ikkiro kiyaare, injoore, naana, loome labbinore leda hattono kaade wora gooro kassi assate kaa`lanno`ne.
- Saga`le`ne ittinihu gedensaanni ajanna 30 xiqqeessi geeshsha gotti yitine ofolle; yaano haawaate woy goxate wo`naala sagale shotu garinni tushshiishshanno`ne gede assara dandaannohura shotunni injoo`ne huntanno.
- Sagale ittinanni base ikkado diilallo nooseta dancha base ikkiteemmero woyyanno; kunino sagalete fooli waadanno`nekki gede assatennino aleenni biso`ne tittidhitinanni gede assannohura tenne macciishshamme gargaranno.
- Uddidhinanni uddanno doodhitinanni woyte bisi`nera qa`midhannokkita hala`lado ikkiteemmero doorranni.
Bakkalcho Maaja 11, 2016 M.D