23ki Afriku atileetiikise champiyoone aana beeqqitannoti Itophiyu atileetiikise biheeraawe gaamo heewote assitanno qixxaawo jeefisse bero Kaameeroonira hodhitino. Itophiyu olompiikete komitenna atileetiikisete federeeshiine gaamote geegiishsha assitinoha ikkanna; loosu biddissanna baandeera aate amanyooteno gumultino.
Itophiyu atileetiikise biheeraawe gaamo ella 14 kayse 19/2016M.D geeshsha Kaameerun Duwaalu qixxeessaanchimmanni harinsanni 23ki Afriku atileetiikise champiyoone beeqqate bero hodhitino. Biheeraawe gaamo 15 barrubbara gamba yite qixxaawose assitanni keeshshitino. Gaamo qolchanshotenni, kubbatenninna olatenni harinsanni 45 heewote assootubba mereerinni 41 aana beeqqitanno. 14nni hananfanni jawiidi ahigurete atileetiikisete heewo barera 34 meyaanna 43 labballi xaphoomunni 77 atileetiikise, 15 qajeelshaanonni massagantanni heewotenni guma borreessiisate kaajjado hekko assitannotano agarranni.
Lame lamalara qixxaawote aana keeshshitinota Itophiyu atileetiikisete gaamo tenne lamala giddo faajjetenni geegiissinoonni. Geegote amuraati aanano Itophiyu olompiikete komitenna Itophiyu atileetiikise federeeshiine luphiima loosu sooreeyye afantinoha ikkanna; biheeraawe gaamo gumaame ikkitanno gede jawaachishatenna baandeera aate amanyooteno gumulloonni. Qixxaawote yanna harancho ikkiturono guma borreessiisate hadhannota buuxissinori gaamote atileetootinna qajeelshaano; gaamote woshshatto assini yannanni kayse heewote ikkitanno qixxaawo assitanni keeshshitinota coyidhino.
Tayxe heewo baxxitinota assannohu Itophiyu baalante heewote assootubbanni beeqqitannoha ikkasinni egennantino heewubbanni rosicho adhatenni kalqete champiyooninni beeqqate kaayyo kalaqantarano dandiitannohuraati. Federeeshiineno hasiissanno irko assitanni keeshshitino.
Awuroppu kiironni 2022nni Afriku atileetiikise champiyoone qixxeessaancho ikkitinoti Morishiyesu Seent Piire ikkitanna; Itophiyu biheeraawe gaamo 14 meedaaliyubba gamba assite 5ki deerra amadatenniitinkanni jeefissinohu. Duwaalu aanano konninni woyyino guma borreessiisate beeqqose assitanno. Noo harancho yanna qixxaawonni baalanti qajeelshaanonna atileetootu qixxaawanna ikkado ikkansanni woyyino guma borreessiisse higate wo`naalsha assitannotano coyidhino. Atileet Zegeyye Moganna atileet Wubirist Aschaalew; gobbansara guma borreessiisate wo`naalsha assitannota buuxissino.
Itophiyu atileetiikise federeeshiine pirezidaantitte kaa`laancho komishiinercho Deraartu Tullu lamu dirira albaanni Morishiyesi harinsoonni Afriku atileetiikise champiyoonenni duushshanno guma borreessiinsoonnita qaagiissite; tenne heewora qixxaawote yanna ikkado ikka hooggurono egennamatenna balaxote qixxaawo assinoonnita xawissino. Heewo Itophiyu olompiikete qixxaabbanni afantanno yannara ikkase dhaggennihanna addiha assannoha ikkanna; qajeelshaanonna atileetootu halamatenninna irkisamatenni woyyino guma abbate jawaattannota ammantannota coyidhino.
Itophiyu olompiike komite pirezidaantichi dokiter Ashebbir Weldegiyorgiis isi widoonni; diru heewote batinyinni kainohunni olompiikete komiteranna atileetiikisete federeeshiinera lowo geeshsha ayirrannonna jifannoha ikkinota xawisino. Konne ikkadimmatenni fulatenni ikkado atileetootanna qajeelshaano fila jawa kaajjille xa`manno; ikkinohurano Itophiyu atileetiikisete federeeshiine leellishshino ikkadimmanna kaajjilleho galata shiqishino. Baalanti atileetooti mixo heewubbatenni guma abbanna olompiiketenni beeqqa ikkasi gede, atileetootu rosaminoha qeellete tii“a uddiratenni qeelletenni higganno yee ammanannotano kaysino. 120 miliyoone daganni doorante gobba riqiwa jawa kaayyo ikkitinota buuxisinohu pirezidaantichu irkisama hasiissannotanna olompiikete komiteno qotensa uurritannota xawisino.
Badooshshu hasiisannotanna kaajjinenna halamme mittu mittunniha foonqe diwatenni Itophiya luphi assa hasiissannotano coyi`rino. Mili yanna giddo safaminohunna atileetoota jawaachishate hattono danchu gumi daanno gede minshannikki qeecha fulate aana afamannohu Itophiyu atileetiikise irkisaano maamarino hattonni bayicho haratenni gaamo jawaachishannotano xawinsoonni. Budapeesti kalqete atileetiikise champiyooninni hanafe irkosi assanni keeshshinohu maamaru 20 iillitanno liuukaane bayicho massate wo`naalsha assanni noota egensiisino.
Abbebech Maatewoos
Bakkalcho Ella 13, 2016 M.D
