Mittu dirinni sasu diri geeshsha noo qaaqquullira uurrinshunnihu saga’late amanyooti dinonsa. Mitto barra ittanno; wole barra kayinni sagale co’ontanni kisi’ra dihasidhanno. Soodo shoo’mo garunni saga’lituro barri hurbaate hasi’ra hooggara dandiitanno. Kuni rosamino amalensa ikkino daafira yaaddinoonte. Ikkollana sagale seekke itanno qaaqqi marro marro sagale ajishanni hari’ro tenne yannara xagisaanote amaa’la hasiissanno.
Mito mito barra sagale ita qaaqquulleho barru looso ikkitannonsa. Hiittoonni taashsha dandiineemmo yaannoha aanino garinni worroonni;
Qaaqqullunnita sagalete hasatto ayirrisa; hasidhukkinni itisa dihasiissanno;
Qaaqquullu haaro sagale rossanno gede kaayyo aa; qamassukkinni dibanxeemmo woyi giwisanno yitara dandiitannohura balanxe ynammo woyi dana naaddanni qamassanno gede wo’naala danshate.
Gadachinshe woyi donge sagalsate wo’naala dihasiissanno; korkaatuno sagalete yannara duucha woyte caaccaabbannokki gede . Qaaqquullu baxxannokki sagale hudidhino yannara aate wo’naala dihasiissanno. sagale babbaxxino suudinna nyammonni rosiisse.
Rosantinota sagalete yanna rosiisse – duuchanka woyte rosantino yannanni itisse. Sagale ita gibbanno woyte ado woyi coommadore hattono huuncamme uyinanniha ikkiro kuri coyubba sagale hooltannoreeti.
Haaruudde sagalla rosiisate cincaaleeyye ikke;
Qaaqquullu haaro sagale kisse, su’niissite, arrawunni qamasse tuttufatteeti rossannohu. Kayinnilla higge higge rossanno gede kaayyo aa hasiissanno. Sagalete dana, suudenna foole kullanni baxxanno gede assa; haaruudde sagalla rossino sagale ledo karsiinse itisa dancha hayyooti.
Sagalete mini gede hasidhino sagale calla hajaccitanno gede kaayyo uyitinoonte
Mitte sagale gibbanno woyte hakka woyintenni wole sagale loosate muddantinoonte. Itturono hooggurono shiqqino sagale darginni ka’a geeshsha hurbaatu aaninni ka’annokki gede asse. kunino hurbaatu yanna ayirrissanno gede kaa’lannonsa.
- Sagale qixxeessinanni woyte sagalete suudi qaaqquullu illera baxisannohanna xiinxallitanno gede assensa. Mite mite yannara shoo’mu sagale hurbaatu yannara, hurbaatunniha shoo’mu yannara assine soorratenni sagale ittanno gede xaggeeffachisha dandiinanni.
- Gati mu’ro hidhineemmo woyte qaaqquullu ledonke heedhuro hasidhannoricho doodhitanno gede kaayyo uyiyye.
- Maate saga’litanno sagale soorratenni qaaqquulleho lawishsh aikke.
- Sagalla kalaqote dandoo horonsi’ne loosa qaaqquullu shotunni naaddanni ittanno gede assannonsa. Daahamino Birokoli ruuzete woyi paastu ledo woyi daahamino shaana woyi kaaroote wacotenni…w.k.l
- Sagalete yannara hedo moorannore Elektirooniksete uduunne (Televizhiine Bilbila) lawinore cufa;
- Korere ittiniro konnere uyineemmo’ne yinanni mitte sagale wole sagalenni roorsiisa dihasiissanno. Sagalete gedensaanni gummate laalo ikkinnina coommadore rosiissinoonte;
- Sagalete yanna sagalennitanna saga’linanni gara ronsannitanna ooso saga’litanno hayyo, mayimmanna horo affanno gede asse;
- Sagalete yannara hasaambanniri dhaabbachishshanno hedonna hagirsiisannore ikkiro tenne yanna maate quqquxante agadhitanno;
- Sagale ninke shiqinshonsanso uminsa shiqishidho yaannoha yanna yannatenni soorra
- Ooso sagale loossanno gede woyi loonsanni woyte la’anno gede kaayyo uyiyye. Kunino sagale baxxanni saga’litanno gede kaa’lannonsa.
Qiddist Gezzaheny
Bakkalcho Onkoleessa 29, 2016 M.D
