Sidaamu diru soorro Fichee-Cambalaallate ayyaani afaaffa lainohunni dagooma mereerisitino mannimmate guunte millimmo tenne lamala giddo assinoonniti qaangannite.
Kalqete dona ikke borreessaminoha Fichee- Cambalaallate ayyaana korkaata assatenni tenne lamala giddo soodihunni 12:00 saatenni aliidi loosu sooreeyyenna quchumu teessaano leeltinowa iibbadu garinni harinsoonni.
Qoleno kalqe konne ayyaana UNCKO te borreessitu woyte lame qara hexxo assatenni ikkanna; umihuno mannu ooso qoossora jawa hornyanna qeecha afidhinote yaatenni hattono layinkihunni qooxeessu agarooshshe illacha assatenni afi’noonni jirooti.
Hawaasi quchumi gashshooti kantiiwi Kalaa Makuri Maarshayehu maatete gudumaalu geeshsha bulduuda budenke ikkinohu Fichee -Cambalaallate ayyaani haqafaanchimmassinni afamino hattono Sidaamu mayyimma xawishshaati yiino.
2016 M,D Sidaamu diru soorro Fichee- Cambalaallate ayyaani hundinni kayse techo ilamara iillinoha ikkanna konne taaloonyu budenke haaru dirira haaro ajuujanni mittimmatenni hulluunqe sa’neemmo dirooti yaatenni kantiiwu huwachishino.
Wole ragaannino co’icimmatenna eote loosira assinanni sharrora anino kantiiwaho yaatenni kaajjine uurrinummoro Sidaamunni sa’ne ltoophiyu lopho rakkinota assa dandiineemmo yiino.
Quchumu kantiiwi kalaa Makuri Maarshayehu, konne ayyaananke kalqe daa’’attara dagganno woyte ninke budu annuwi olliinkenni kayse mittimmatenni baxillunni mayimmanke xawisanno garinni ayyaana ayyirrinso yee; hawalle Sidaam diru soorro Fichee-Cambalaallate ayyaanira keerunni illishi’ne sokkasino saysino.
Sidaamu qoqqowi woga turizimetenna ispoortete biiro sooreessi kalaa Jaggo Agenyohu isi widoonni xawisino garinni; kuni kalqete mannu ooso riqiwaanchi kikkisamannokki doni Fichee-Cambalaallate ayyaanni keerunna araarunniha ikkanna ispoorteno baxxillunna mittimmate xawishsha ikkasenni dagate konne baxillenke ayyaaninkenni leellinsheemmoho yiino.
Hawaasi quchumi woga turizimetenna ispoortete biddishshi sooreette Baabba Meqdes Hurrisoti Fichee-Cambalaallate ayyaani daganna dagoomu hattono kalqenniha ikkasinni ninkeno baxxillu kori ayyaananna ispoorte leellishate mannimmate guunte millimmo hornyubbase giddo mittoho yitino.
Baabba Meqdesi konne ayyaana ayyirrisate quchumu gedeno ikko biddishshinke gede jawa qixxaawo assinanni he’noonnita kultino.
Jeefoteno tenne Gutui ispoortete qixxaawo konni garinni qexxeesitu bissara Hawaasi quchumi kantiiwi kalaa Makuri Maarshayehu galatasi shiqishino.
Abbebech Maatewoos
Bakkalcho Badheessa 26, 2016 M.D
