Tenne lamala giddo jeeffino Afriku godo`lubbanni beeqqaancho ikkitinoti Itophiyu gaamo sanyote barra hashsha gobbase e`inno. Gaana Akiraho hadhanni keeshshitino 13ki Afriku godo`lubba aana Itophiyu olompiketenni luphiima beeqqo noose tuntu’motenna shalleettete hattono gummaame ikkitino atileetiikisete ispoortenni haammata meedaliyubba borreessantinoti anfoonnite. Tenne barera beeqqatenni gobbase su`manna baandeera gobbuwate deerri heewote bare aana leellishshino massagaano gaamo sanyote barra hashshihunni 2:30 saatenni Boole kalqoomu horophilu fooliishsho iillitinno. Gaamo iibbadu garinni shinqe haa`noonnita IFDR budunna ispoortete ministirchi egensiisino.
Konni albaanni rosaminokki garinni 9 ispoortete daninni tenne heewo aana beeqqitinoti Itophiyu gaamo qiidado hanafo assiturono, jeefose kayinni biiffinota ikkitara dandiitino. Atileetiikisete ispoortenni haammata meedaliyubba borreessamansanni saeno dhaggetenni umita ikkitino qeelle babbaxxitino ispoortubbanni borreessantino.
Wole widoonnino beeqqote gobbaanni heewisamaano ikkitara dandiitinokki haammata ispoorte leeltino. Tini heewo olompiikete harinsho garinni assinannita ikkase harunse mite mite ispoortubbanni filote gedeno ikkite owaattanno. Konninnino Itophiyu liuuke gaamo baxxinohunni 5 olompiikete ispoortubbanni yaano; atileetiikisetenni, lekkate kuwaasenni, shalleettetenni, tuntu’monna world tekuaandote ispoortubbanni meedaliya borreessiisate heewote hadhinoha ikkanna gummaamma ikkitinohu kayinni sasunni callaati.
Umi meedaliy borreessaminohu shalleettetenni ikkanna; soojjaati Afrikinni Ertirunni aante woyyitinote yinanniti Itophiyu gaamo heewotenni kaajjado hettisamaanchootinka. Konninnino 23 diri woro labballu hallanyu heewo shalleettete gulufaanchi Kiyya Rogora callicho birrete meedaliya afi`rino.
Mittu meedaliyinni calla seeda barrubba keeshshitinoti Itophiyu gaamo Afriku godo`le jeeffara onte barrubba calla gattuseta hanafantino atileetiikisete heewonni aanchite aanchite borreessiissino meedaliyubba deerru shae aana soorro abbitara dandiitino. Itophiyu gaamo rosaminokki garinni seedu xeertinyinni sae harancho xeertinyinni hattono xawu assootubbanni beeqqitolla ikkinnina; Itophiyu egennantino xeertinyubba gobbaanni meedaliya afi`noonnihu siqqote kubbaanchonni sayikki deerra amadinohu atileet Aberra Alemu callaho.
47 labballinna 40 seenni xaphooma 87 atileetooti heewote aana beeqqitinoti Itophiyu atileetiikisete gaamo luphiima meedaliyu kiiro borreessiisatenni xaano gobbate naaxxille ikkitinota leellishshino. 47 heewubba hadhanno atileetiikisenni 50 gobbuwa 640 ale ikkitanno atileetoota heewisiissinoha ikkanna; meedaliyu shae karsama dandiitinori qole 27ho. Kuri mereerinnino Itophiyu gaamo Nayjeeriyunni aante layinki deerra amadatenni jeefissino. Gaamo 7 culku, 7 birretenna 4 nahaase xaphooma 18 meedaliyubba borreessiisatenni olluu gobba Keeniya luphiima roorrenni hoodisano dandiitino.
Wolu gumi borreessamino ispoorte Itophiyu olompiike lede babbaxxitino kalqoomu champiyoonubba aana haammata beeqqo noosehu tuntu’mote ispoortenniiti. Boode meedaliyubbanni calla huxxante keeshshitinoti Itophiyu Gaana Akiraho assinoonni Afriku godo`lubbanni kayinni gumaamimmase farcishiishidhino. 7 bokisanyoota dirtinoti Itophiyu tuntu’mote federeeshiine 3 meedaliyubba borreessiisatenni gumaame beeqqo assitino. Muli yanna kawa luphiimu kakkaooshshi leellanni afamanno tuntu’mote ispoortenni meedaliyu shae giddora e“a dandiitino 22 gobbuwa mereerinnino Itophiyu mitto ikkitino. Seennu tuntu’mote ispoortenni kalqoomu deerrinni umiha culku meedaliya boreessiisatenni lame heewisamaano qole dhagge beeqqa dandiitino.
52 kiilogiraamenni Beteliheem Gezzaheny Morokote hettisamaanchose qeelatenni umita ikkitanna; 66 kiilogiraam Betel Weldu qole aantino qeelle gobbasera afisiissino. Labballunni 75 kiilogiraame beeqqinohu Temesgen Mitikkuhuno nahaasete meedaliya luka dandiino. Konninnino seeda dirra gedensaanni Itophiyu tuntu’mote ispoortenni kalqoomu heewote barenni gumaamimmase buuxxara dandiitino. Ikkinohurano boode aganna gedensaanni Paarikete harinsanni olompiikete beeqqonni sae guma borreessiinsara dandiinanni yitanno hexxo aannoha ikkino.
Xaphooma Itophiyu 13ki Afriku godo`lubba aana 9 culkunnita, 8 birrunnitanna 5 nahaasete xaphooma 22 meedaliyubba borreessiisatenni heewose jeefissino.
Abbebech Maatewoos
Bakkalcho Badheessa 19, 2016 M.D
