2013 M.D hawadi yanna dancha fajjo looso Maaja 2, 2013 M.D hananfannita Sidaamu qoqqowi meentu qaqquullunna wedellu biiro Layinki sooreessinna wedellu handaari sooreessi kalaa Aklilu Alemuhu egensiisino.
Kalaa Aklilu Bakkalcho Gaazexi ledo assino hasaawinni; Tayixe hawadi dancha fajjo looso babbaxxino loosu daninni loosate mixo amandoonnita xawise; xaphooma 540 kume wedella beeqqisiisatenni 1.8 ikkitannota qoqqowu daga tenne owaantenni iillate qixxaamboonni yino. Konninnino boco Biliyoone mootimmate womaashshi fulo gatisate mixo amandoonnita qummi assino.
2013ni gobbate derrinni amandoonni mixo garinni ‘’Itophiya haanja muronni uddisiinso’’ yitanno hedonni qoqqowu derrinnino tenne sokko adhine ka’noonniha ikkanna; amandoonni barrinni qoqqowoho baalante woraddaranna quchumu gashshoottara iibbadu amanyootinni hanafate qixxaamboonni yinohu handaaru sooreessi kalaa Aklilu; barraho qoqqowu deeerrinni Hawaasi Gaangaawi woradira 200 kume chiginye kaasatenni hananfannita xawisino.
Xaphooma tayixe hawadi dancha fajjo looso 13 loosu daninni dagooma owaatate hendoonniha ikkanna amandoonni loossa mereerinni qarunni chiginye kaasate, mundee aate, rosu sektere ledo halamatenni rosu mine bifisate, sagaletenni umonsa dandiitinokki dagoomu bissara giwirinnu looso kaa’latenni,minu noonsakkirira dhuka ajjinorira mine minate, maazzagaaju mini ledo halamatenni quchumu biinfilli loosi, seesiqalote (dhaggete base biifisanna donu agarooshshe assa), guwurshu roso aatenni, fayyimmate ledo amadaminohunni koroonu xissonna HIV hattono wolootu taraabbanno xisso aana huwanyo kalaqanna wolootuno batinye loossa afantanno.
Tenne owaante qarunni wedellu annimmatenni massaggannoha ikkanna dureeyye,dancha fajjo owaante uytannori, mootimmate bissa, daga riqibbino baalinna xaphoomunni danchummate loosira umosi fajjinohu baalunku konni loosira beeqqaano ikkannota kalaa Aklilu xawisino.
Jeefoteno kalaa Aklilu; baalanti qoqqowu teesaano dancha fajjo owaantera beeqqaano ikka hasiissannonsata huwachishe; ‘’Ninkewiinni kaa’lo hasidhanno dagoomu bissara yannanke, woxenkenna wolqanke uyine owaante aatenni mannoomittete qeechanke fullo’’ yaanni sokkasi sayisino.
Sidaamu qoqqowira tayixehu hawadi dancha fajjo loosi Maaja 2, 2013 M.Dnni hanafe Wocawaaro 30 2014 M.D nni jeefamanno.
Qiddist Gezaheny
Bakkalcho Maaja 1/2013 M.D
