Safote kincho tuginohu sidaamu qoqqowi pirezidaantich kalaa Desti Ledamohu; gobba soorrantannohu rossinonna qajeeltino mannu wolqanni ikkinota xawise; konnirano tekniketenna ogimmate qajeelshi uurrinshuwa luphiima qeecha afidhino yino.
Sette Xibbe Miliyoone birrinni gatamarranniti tini pirojekte lamu dirinni gumulantannoha ikkanna; babbaxxino handaarira hosannoha addi addi gola afidhinota ikkaseno pirezidaantichu xawisino.
IFEDR Sayinsetenna jawiidi rosu uurrinsha Ministere Ministrchi Dokter Mulu Neggahu; kuni qajeelshu mereershi Investmentete du’nama kaajjishannoha ikkasinni aleenni gobbate gede qajeeltinota mannu wolqa kalaqatenna teknoloojete reekkora jawa qeecha afi’rinoha ikkasi coyi’rino.
Hawaasi quchumi gashshooti Kantiibi kaa’laanchu pirofeesere Tsegaye Tukehu isi widoonni ; Tekniketenna ogimmate uurrinshuwa halashsha gobbate soorroranna lophora kaimaho yino.
Quchumaho jajjabba pirojektuwanna investment hala’litanno gede gashshootu jawaate loosanno yinohu kaa’laanchu pirofeeserchi; pirojektennita batinye horo xawisatenni gumulote quchumu gashshooti umisi qeecha assannota coyi’rino.
Sidaamu qoqqowi Tekniketenna ogimmate rosi qajeelshi sayinsenna teknolooje biiro sooreessi kalaa Ashshaagre Jemberehu; pirojekte loosu giddora e’’anno woyte gobbate qarra tirtannorenna heewisamaano qansoota kalaqate ka’litannote yino.
Wolootu pirojektuwano teknoloojete reekko assate kaa’litannota kalaa Ashshaagre lede xawisino.
Yaareed Geetaachew
Bakkalcho Maaja 1/2013 M.D
