Abrahaam Saamueel
Techo Itiyo-Telekoome rakkino owaante afidhinota 4G LTE adivaanside interineetete owaante Sidaamu Qoqqowi qaru quchumira Hawaasa faajjetenni hanafisiinsoonni.
Itiyo-Telekoome Qara Loosu harisaancho ikkitinoti Beetto Firehiywot Taammirut xawissinonte gede, luphi yiinohu interineetete daata horoonsidhanno 103 quchumma aana 4G LTE interineetete owaante halashate amandoonni mixo harunsine techo barra wodiidi qooqqowubbara heedhanno 12 quchumira tenne qinaabbinotanna rakkino owaante afidhanno gede faajjetenni hanafisiisankenni lowota tashshi yiinonke yitino.
Techonni hanaffe tenne 4G LTE interineetete owaante afidhanno quchumma Hawaasi, Shaashemanne, Arsii Nageelle, Bule Hora, Dilla, Yaabello, Yirgaalame, Alatta Wondo, Mooyyale, Shaakkiso, Adoolanna Nageellete quchumma ikkanna, 925 kumi ali daga horaameeyye ikkitannota Beetto Firehiywoti Taammiruti xawissino.
Owatamaanonke 4g LTe interineetete owaante roortino rankenna baandiwiizete hattono ikkado daatu owaante aannoha ikkanna, tenne qiniitino owaante dijitalayzide assite laalchonna laalchimma lossate xaphoomunni Itiyo-Telekoomeha dancha gade luphi assate dandiisiissanno yitino.
Itiyo-Telekoome techohano lendeenna xaa geeshsha assinnohu 4G LTE owaante neeti- workete hallashshate loosi 65 quchuma horaameeyye assinoha ikkanna, albilichono kubaaniyinke daatu lophonna hassatto kaima asse mixote amade 4G interineetete owaante halashate looso gude babbaxxitino qoqqowubate quchummara muli kawa owaante aate dandiisiisannoha balaxote looso loosanni noota Beetto Firehywoti Taammiruti xawisino.
Barraho Gobboomu Deerrinni Kubbaanniyu Loosaasine beeqqitannoha Haanju Latishshi harumu haqqa kaasate Looso Hawaasa Gimbi Gannatete Rosi Hoowera hanafisiisino.
Hawaasa:-Itiyo Telekoome gobboomu deerrinni noo kubbaanniyu loosaasine beeqqano ikkitannoha haanju latishshi murote kaayshshi amuraate Hawaassi quchumira Gimbi Gannatete Rosi hoowera hananfoonni.
Tayxe Itiyo-Telekoomete kubbaanniyi saayikki dooychora harisannohu hawadi murote kaashshi pirogiraame Ella 29 nni kaayse 30 geeshsha keeshshannota Beetto Firehywoti Taamiruti xawisino.
Itiyo Telekoome saiha lame diro haanju latishshi murote kaayishshira 2.1 miiliyoone ali kaayishsho gobba baalate kaayisatenni gobba amaddino haanju latishshi mixo irkisse umiseha qeecha jawaatte fultanni noota xawinsoonni.
Kunnino, kubbaanniyu qooxeessu agarooshshira horo uytanno tekinoolooje hallashsha calla ikkitukkinni, gobbateno dancha looso leellishatenni dagoomittete beeqqorano umisiha qeechasi fulanni noota Qara loosu harisaancho Firehywoti Taammiruti xawissino.
Itiyo-Telekoome chgginyete kaashsho kaasa calla ikkitukkinni, kaasantinotano seekkine shuqunne hasiissanno agarooshsheno assatenni 1.6 miiliyoone ali muro dadha dandiitanno gede assinoonita xawisinoti Firehywoyti, konni loosi gaadirano 4,326 manni ali beeqqaano ikkanno gede assine loosu kaayyono kalanqoonnita xawinsoonni.
Itiyo-Teleekoome saiha lame diro haqqu kaashshira calla 70 miiliyoone birra ale fulo assite qooxeessu agarooshshiranna dubbu latishshira noose mixosenna qeechise uulla dirranno gede asse albillichono daga horaameeyye assitanno dagoomittete loosi beeqqora badhera higgannoikkita egensiisino.
Xaa geeshsha Itiyo Telekoome haqqu kaashsho assitinohu Hararete, Bahir Daaretenna tayxe Hawaassa ikkinota kubbaaniyunni afi`noommo mashshalaqqe leellishanno.
Bakkalcho Maaja 1/2013 M.D
