Addis Ababa:- Paarlaamu mitiimmate yannarano ikkiro noosi xiiwo dandee gobba reekkisate cincatenni loosino yaatenni galata shiqishe; aanino paarlaami hashsha dirante doortino daga owaatate balaxotenni qixxaawa hasiissannosi yaanni huwachishinno.
Xaphoomu ministrchi xawishshi garinni; Paarlaamu mussinna ajishate widoonni loosino loosi no. Jawu rosichinna egenno noosiha ikkasinni rosichosi woraddate geeshsha dirrise horonsi’ra hasiissannosi. Paarlaamu miillano roore anga Leyiki doorshira beeqqitinokkiha ikkirono Itophiyu qeelino yaatenni keeru doorshi harasinni hagiirraamma ikkansa galatisiissannote.
Konni alba harinsoonni doorshuwara anfoommo harinsho no yinohu xaphoomu ministrchi; hatte harinsho giddoonni sa’inori paarlaamu miilla hakkeeshshi sharro gobbansara assituro keeraanchimmasinni co’o ikkino doorshinni sa’annori aanino paarlaami miilla kayinni kawiinni roorino garinni loosa hasiissannonsa yino.
Doorshaho heewisantinoonnikkiri kaayyataammaho; ane waajjishanno’’eri hashshihunni Lamala sa’’aate geeshsha dirante doortino daga hiitto assine loonseeti kassi assanna owaata dandiineemmohu yee hedeemmo. Tenne widoonni aaninohu amaalete mini jawa duha adhino yaatenni aanino paarlaami jawu loosi agaramannosita sokka sayisino.
Ninkeno konni alba noo mootimma gedeeti heedhankera dihasi’neemmo yinohu Dokter Abiyi; doorshu boorde qeeltinoonni yitunke yannara doorshaho heewisantinore hettisamaano paartuwa miilla kaabinetenna ejensuwate giddo e’e owaattanno doogo kalaqate illachinke yaatenni aantino mixosi egensiisino.
Konni albinte gede ki’ne giwaanotena doorshunni qeelantinoonni daafira dihasiissinanni yitanno harinsho di heedhanno. Mitte mittente paartuwa giddo noo mannooti latishshaho mitteenni loossanno; poletiku hajo aana kayinni yekkeerantanni aanino doorshi geeshsha hara dandiitanno yitanno ammana noonke yino.
Jaallansa keenonninna amaalenni sodhe Leyikki xaphoomu doorshira beeqqitinokki paartuwa kayinni tenne kaayyo beeqqaano ikka hoogansanni aanino doorshi Ontu diri geeshsha agadha agarantannonsa yaanni sokkasi sayisino.
Dr. Abiyi xawisino garinni; doorshaho Itophiyu qeelino; lophinoommo yitannorinna Ameerika labbino gobbuwara nafa doorshaho borreessamino mannanna doorinoha heewisiinsanni woyte Itophiyaho noo kiiro roortanno. Doorshaho beeqqitino Itophiyu dagaranna olantote galatu hasiisanno. Itophiyu di diigamanno; di qeelamanno. Shotu garinni diigammeemmokkirenna guluphineemmokkire ikkanke dhaggenke kultanno.
Amaalete mini miilla doorshaho beeqqitino dagaranna gargarooshshu olantora ayirrinyunni uurrite galata shiqishshino.
Qiddist Gezaheny
Bakkalcho Maaja 1/2013 M.D
