Addis Ababa: Itophiyu awuroppu kiiro 2015te sase gobbuwa mereero iillinoonni biddissubba sumiimme garinni Gibitsenna Suudaane qixxaawote injaannonsa gede kofattote layinki doycho way wonsho hanafase faajjete borronni egensiissinota Jawiidi Haaroo’mate Kofatto Yekkeeramaanote Komite Miili Pirofeesere Yilmi Sileshihu xawisi.
Pirofeesere Yilmi Addis Zemen gazeexira xawisino garinni, hasiissanno mashalaqqe soorri’ra, dargaho afamme ijaarsu looso la”a, malamatenna ogeeyyete ledo hasaabbanno gede assate loossa loosantanni keeshshitino; tini loossa sa’u tonne dirrara way ogeeyye, politikanyootunna dippoloomaatete ledo hasaambanni keeshshinoonni yiino.
Itophiyu tenne lamala faajjete borronni uyitino mashalaqqeno konni biddissi aana safantinota ikkitinotanna tinino mashalaqqe soorri’rate mitto biso ikkitinota xawisino.
Gobbuwa sumiimmensa garinni kofatto suutu suutunni Maajunna Woxawaajje aganira wo’mitanno gede affino; buuxo ikkannonsa gedeno kulloonninsa. Gobbuwa kofatto Maajunna Woxawaajje aganira wo’mitanno yitanno mashalaqqe balaxxe affe gobbaydi hajo ministeerchinsa widoonni way wo’ma digawajjitannonke; konnirano qixxaambanni hee’noommo yite coy’ransano qaagiissino.
Waa wonshinannikkiha ikkoommero balaxote qixxaawo fulotenna kisaaraho assitannonsa daafira qixxaawo assa dihasiissannonsanka. Konni daafira xa tekiniikete deerrinni qixxaawote injaansara lamente gobbara egensiisa buuxate kaa’litannota coy’rino.
Egensiinsammora gadachannonke seeri hoogirono aliidi Abbay gobba ikkankenni kaa’lammetenna roduuwimmate ayyaaninni xaphooma akata ripoorte assinanni hee’noommo. Konninnino xaa geeshsha mashalaqqe soorrirate widoonni 135 ali rippoorte aamantino. Hiittoo gawajjono iillinshummokkinni korkaataame horaameessimma loosu aana hosiinseemmo gede leellinshanninsa sunfeemmo yiino.
Jawiidi Haaroo’mate Kofattohu jawu coy waay wonsho ikkikkinni ijaarsha gudate yiinohu Pirofeesere Yilmi, wonsho waay sa”anno doogo cuffukkinni umose umisenni wonshitanno assinanni. Xeenu deerri garinni waay wonsho murrantannotano egensiisino.
Layinki doycho way wonsho hanafa laisse Gibitsenna Suudaane biddissu garinni affanno gede assinoonni. Gubbuwa Itophiyu kofatto wonshite gudduro nafa sumuu yaa hoogansa suffanno; ammanano dihasidhanno uurrinshano maayno soorro abbitannokki gede coy’rino.
Xa gobbate giddo leeltanno qarrubba haaroo’mate kofatto ledo waaxamino assooteeti. Itophiyu daga baalunku raginni kaajjine wolambinaatenkenna qoossonke ayirriseesi’ne sufa noonke. Kunino waaxammetenni assinanni hee’noonninke xiiwo sa’neemmo gede kaa’lannonke; jifono sa’nannita ikkitinota kaysino.
Itophiyu umise kalaqamu jiro horonsi’ra wolambinaatu qoossoseeti. Qoossoseno fugannohu hiittee bissannino dayro effi’ne gimbeemmo.
Halaaluno ninke ledooti.
Addisu Adoola
Bakkalcho Maaja 1/2013 M.D
