Abrahaam Saamueel
Aljeeriyu qixxeesseenna harinsanni hee`noonniti lamalki Afiriku gobbuwa lekkate kowaase chaampiyoonne (Chaani) godo`le suffe leeltanno. Maakisanyote hashsha shoole saatera assinoonni heewonni umi gaamo heewora gaamantinori Itophiyunna Aljeeriyu xaaddeenna Aljeeriyu Itophiya 1:0 qeelino.
Qixxeessitino gobba Aljeeriyu ledo Moozaambiikenna Liibiyu ledo gaamamantinoti Itophiyu Gobboomu Lekkate Kowaase gaamo, umi heewo Moozaambiikete ledo godo`le assite lamenti gaamo taalo fultinoti qaangannite. Konninni suffe laynki doycho heewo godo`lera qixxeessaancho gobba Aljeeriyu ledo Itophiyu heewo assite fooliishshote gedenoonni e`inonsa eonni qeelamate gadachantino.
Qixxeessaancho gobba Aljeeriyu Lekkate Kowaase gaamo umi fanote heewo Liibiyu ledo godo`lite 1:0 qeelte xaphoomunni 6 bixxilliinni umi gaamo massagganni afantanno.
Itophiyu Gobboomu Lekkate Kowase gaamo qajeelshaanchi Wubetu Abaate; ‘’heewote gedenoonni gargaraanote widoonni kalaqantino so’ronni qeelamme fulloommo. Ooso godo`laano lekkate kowaase eote hoowe geeshsha xiibbe massate wo`naalturono, kowaase eote widira kiirsiisa didandiitino’’ yiino.
Itophiyunnita Gobboomu Lekkate Kowaase gaamo massagaanchi Ambellichu Mesuudi Mehamedi, godo`lete yannara kowaase eote hoowe geeshsha xiinbe massa dandiinanni, gumu widira soorra hooga waaga baatisiissinonke yiino.
Itophiyunna Aljeeriyu konni albaanni 8 higge heewote aana xaaddinoha ikkanna; Aljeeriyu tayxehu ledo onte higge qeeltino. Itophiyu mitte hige qeelino sase hige taalo fulino.
Moozaaambikenna Liibiyu assitino laynki doycho heewonni Moozaambiike qeelte sase bixxille afi`ra dandiitino. Tenne umi gaamo Aljeeriyu 6 bixxillinnii massaganna Moozaambiike 3 bixxlinni laynkita ikkite hoodiissino. Itophiyu 1 bixxillinni sayikki deera amade no. Liibiyu mitto bixxileno afi`rikkinni shoolki deerra amade no.
Bakkalcho Arfaasa 11, , 2015 M.D Hamuse
