Yaareed Geetaachew
Betking Itophiyu Pirimiyeere Liige layinki doyicho heewo gooffara lame godo’le calla gattino. Qiddus Giyoorgisi,Baahir Daarete quchuminna Itophiyu Medihine mule mule gamba yitino bixxille amadde deerru shae giddo heewo iibbabbishshino liige Dirree daawu keeshsho hiittoonni gumultannoro halchotenni agarroonni.
Liigennita daarru shae soorrantanni massagganno Sase kilabbanni ledote dirrate qachira afantanno Sidaamu Buni,Itiyo elekitirikenna Legaxaafo Legedaadi assitanno sharrono liigete Dire-daawu keeshsho illacha tunganni hajooti.
Baca eo eessatenni heewo Toogote qansichi faradaasine Qidduus Giyoorgisira eote elto noosihu Ismaeel Oro Agoro 10 eo kiirsiise massaganni afamirono;Wolqixxe quchumihu Geetaaneh Kebbedehunni taalo eonni hettisamaancho ikkasi godo’lete heewo tanni assite halchotenni agarrannita assitino.
Bahir daarete quchumihu Fitsum Alemuhuno lamala e’’onni beeddakko e’’ote kiirsiisaanchi heewo harunsanni afamanno.
Liigete beeqqitanni afantanno kilabba guma hoogate ledo amadaminohunni qajeelsaanote geego egensiissino sa’u lamala hasaawissanno hajubba amaddinote. Mite mite kilabba godo’laanote baatooshshe baata hoogano liige sa’u lame lamala qooxeessira sayissino qara qara ikkitubbaati.
Kuataarete 2022 kalqoomu boowe korkaatinni liigete sa’u shiima lamala godo’luwa Televizhiinete finco hoogge sayissurono; heewo kayinni kaajjite suffino. Qajeelsaano geegiissitino gaamo mereerinni Legexaafo Legedaadi albi qajeelsaano layinki qajeelshaanchimmawa dirrisatenni Ashshennaafi Beqqeleha qaru qajeelshaanchimmanni barrubbate albaanni mootoonsitinoti qaangannite.
Liigete umi doyicho godo’le Bahirdaarete hadhanno Supper Ispoortete televizhiinete finco ledo amadaminohunni jawa illacha afidhe keeshshitinoha ikkirono; layinki doyichonni kayinni diredaawaho keeshshitanno yanna kalqete boowe korkaatinni taxxi yitara dandiitino. Ellanni Bocaasunniwa soorrine harinsanni hee’noonniti jawiiditi kalqete boowe woloottu gobbuwa liigga aana kalaqqino xiiwo labbannota ikka hooggurono Itophiyu Pirimiyer liige aanano fooliishshidhino. Ajayi ajeenna liige Televizhiinete finco ledo amadaminohunni iillisha dandiitinokkiha ikkanna kunino Diredaawu gobbaanni noo daa’’ataano garunni harunsitannokki gede assino.
Pirimiyerliige su’misate qoossose hirturo supper Ispoortete Televizhiinete iillo afidhuronna gutu kaampaanenni gala hanaffu kawa gobba giddo daa’’ataano illacha goshooshase digattanno.
Bakkalcho Sadaasa 6/ 2015 M.D Hamuse
