42ki Vaaleenshiyu Maaraatoone Sanbata harinsanni. Ispeenete harinsanniti atileetiksete heewo duuchanti dancha ikkitinohu, doogimaru dodansho quchumu baattote ofolla ledo amadame wiinamu saate borreessiisate injiinoha ikkinohura atileetootu doodhitanno. Maaratoonete macca atileetooti beeqqitannoha ikkanna, 10 km harinsanniha dagoomu dodanshora qole 30 kumi atileetooti beeqqaano ikkitannota anfoonni.
Kalqete atileetikse culqu deerrinni uynoonni doogimaru aani dodansho mereerinni mitto ikkitino heewora Itophiyunni xeertinyunni macca fultino atileetooti heewisantannota buunxoonni. Atileetiksete maatenni uynoonni balaxote hedonni heewo Itophiyu atileetooti roorrimmanni jeefisamatanno yitannotenni agarranni. Baxxinohunni, seennu mereero harinsanni heewora wedellite Itophiynniti Atileeticho Letesenbeti Gideyit beeqqaanchimmase egensiisatenni heewote aana haaru coyi kalaqamanno yine hendanni.
5 na 10 kuminni meetirenni hattono 15 km kalqete xeerinyi ama ikkitinoti Letesenbet, xa kayinni egennatino Memete heewonni fulte albase Maaraatoonete widira qoltinoha ikkanno. Muli yanna kawa doogimaru heewo aana egennantanni nooti Atileeticho Letesenbet, sai diro Vaaleenshiyaho boco maraatoone dodde 1:02:52 ikkino saatenni e`e kalqete xeertinyi saate angasera eesidhino. Xa kayinni, seedu xeertinyi Maaratoonetenni heewisantara qixxabbinota Gilobaale Ispoorte Komishiine yinanniti qajeelshu heewo gaamose balaxxe egensiisino.
Konne harunse, Atileetichote qajeelshaanchi Hayile Iyyaasu Letesenbeti ledo dirrate albaanni 5 nna 10 kumi meetirenni maaratoonetenni kalqete xeertinyi saate hiiqqate geeshshi mixo noonsata xawisinoti qaangannite. Konni kaiminni, Atileeticho, xa iillitino Maaratoone aana haaro guma abbate dandiitanno yine agarranni.
Letesenbet qixxaawose lainohunni qajeelshu gaamo widoonni hedose uytino. Qixxaawose Addis ababaho assitanni keeshshite, lamalate mittu barrira 30 km dodde xeertinye qeelate qajeeltinota xawissino. Umita kalqete xeertinyu saate 5 kumi aana hiiqqitinohu Vaaleenshiyaho ikkanna, hattenne basera baxxino qaagooshshi nooseti Atileeticho, wole ajuujase qineessate xaano Ispeenete Quchumira Maaratoone doddanno.
Vaaleenshiyu Maaratoonera seennu dodanshonni konni albaanni honese ikkitanno atiletooti qeela dandiitino. Saiha lame diro roorrimma amaddinori Keenyu Atileetoota ikkanna, basete wiinamu saateno Aropu kiironni 2020 M.D jeepichirichirinni 2:17:16 amadantinote. Tenne heewonni umi yannara beeqqaancho ikkitanni afantannoti bareeda Atileeticho Letesenbeti Gideyiti, haaro saate borreessiisanno yine hexxo assinanni. Suutumee Kabbaditi, Tiike Gelaaniti, Tigist Girmiti, Itaagenyi woldeti, Amaane Shanqulleti, Taadellechi Baqqalitinna Biruktawiiti Isheetuti Letesenbete Gideyite ledo heewisamanno Itophiyu atileetootaati.
Labballu widoonni qole, xeertinye 2 saatenna 5 xiqeessi woro doddinori lamalu atileetooti beeqqaano ikkitanno. Heewote beeqqaanchi mittu wiinamu saate noosihu Geetahun Molliha ikkanna, xeertinyunni borreessinsohu 2:03:34 ikkitanno saatenni albisaanchoho. Ontu lipheesinni calla isiwiinni ajinohu Taammiraati Tolihuno agarranniho. Origoonete Kalqete Maaratoone Shaampiyoonera qeelinohu Atileetichu, Maaratoonetenni jawa gade afi`rino. Konne diro harinsoonni Tookkiyo Maaratoonerano sayikki deerra amade heewo jeefisino. 2:04:27 xiqeessi noohu wolu Itophiyu Atileetichi Daawit Woldehu qole sayikki wiinamu saate noosiho.
Ontu lipheessinni calla badhera hige shoolkiha ikkinohu wolu Atileetichi qole Jonaataani Koriiri yinannisi. Atileetichu, Itophiyu atileetootira jifo ikkannota hendirono, Hizqeeli Tewoldehu, Caali Deesihunna Worqine Taadassiha labbanno Atileetooti kayinni shotu garinni anga uytannokki atileetootaati.
Abrahaam Saamueel
Bakkalcho Bocaasa 22, 2015 M.D
