Abrahaam Saamueel
Shoolu dirinni mitte hinge harinsanniti kalqete Lekkate Boowe tayxe diro kowataarete harinsanni hee`noonni. Tenne heewora kalqenniti jajjabba duucha yannara boowe kaayissinorinna haaruuddu gobbuwa Kowaatareete afantino. Godo`leno sai Sanbatu barra biifanno pirogiraamenni faajjetenni fanneenna hanafantino. Kuwaataare Isiliminnu amma’no duu’ne harinsanni gobbaati.
Isiliminnu amma’nonni agatto cubbu gede assine la’nanniha ikkanna “FIFA” Isteediyeemete giddoonni VIP agattote base,daa’’ataanote fajjinoonnita godo’le hanaffara lamu barri gate hee’reenna ittisa daga hasaawissino.
Wole widoonni mimmito labbanno koo/tee ikkito widoonni gimare gimaretenni ledo,gamatu woy labbaahu labbaahunni ledo assanno baxxino baxilli xaadoshshe tiyyidhe gibbanno kuwaataare godo’lete dukkisaanonna godo’laano hodhise dayino Rusiyu horophili konne assoote jawaachishanno malaate horophilu aana xalle dayino daafira Horophilu fooliishshi’rannokki gede hooltinoti tayixe kuwaataarete harinsanni afammanni kalqete boowe maala’lissannota ikkitino.
Godo’le hanaffara balaxxe kuwaataare qixxaawote fushshitino doolaare kalqete dhaggenni luphiima ikkase hambannitekka? Tayixe shoolu diri gedensaanni qixxeessitanno gobba togoo fulo assate dhuki hee’ransakka? Tenne xa’mo FIFU dawaro!
Tenne kalqete boowe heewora umi godo`le qixxeessaancho gobba Kowataarenna Ekowaadoore xaaddissino. Lamente gobba heewo mereerima yinanni millimillo assitinoha ikkanna, kalqetenni umi yanna qixxeessitino gobba kowaataare Ekkowadorinni qeelantinoti kalqe hasaawissino.
Afirikunniti Senegaalenna Hoolaandeno xaadde dancha godo`le godo`litino. Senegaale assitino kaajjado godo`lenni qeeltanno yine hende hee`neenna, gargarooshshu widoonni kalaqantino foonqenni Afirikkunniti jawaata kilawe Senegaale Hoolandetenni qeelantino.
Wolootta gaamote heewo godo`leno suffanni afantannoha ikkanna, Sa`u maakisanyote soodo harinsoonni godo`lera Sawudi Arebiyu Arjentiina 2:1 qeelino. Sawudi Arebiyu harinshose qeelletenni hanaffino. Arjentinaho Liyoneeli Mesi 10ki xiqqeessira eessino eonni massaginoha nafa ikkirono, Sawudi Arebiyaho Ali Shehirinna Ali Dawasiri kiirsiisino eonni 2:1 qeela dandiite 3 bixxile afidhino sawudi Arabiyu.
Sawudi Arabiyu lekkate kuwaase dhaggenni albisanna maccata ikkitino gobba Arjentiina qeela wole maala’issanno 22ki kalqete boowe ikkitooti. Sawudi Arabiyu Arjentiina qeelansa harunse Sawudi Arabiyu mootichi bero Roowe gobbate deerrinni Looso taxxi assine honsanni barra ikkanno gede hajajino. Kuwaataar 2022!!!
22ki Fiifunniha Kalqete Boowe harisate Kowaataare sette godo`lete istaadiyeeme ijaartino. Tenne istaadiyeeme ijaarateno haammata biliyoone doolaare fulo assitino. Tenne ijaarroonni istaadiyeeme giddo mitte Howolote aana hogonbanni konteenerete uduunninni loonsoonnite.
Sette istaadiiyeme giddo lamala istaadiyeeme haarote.
Tenne haaruuddu istaadiyeeme giddo “974” yinanni istaadiyeeme mittete. Konne su`ma afidhinohu, wirro horote aana hosiinsoonni 974 Howolote uduunni konteenerenni ijaarroonni daafiraati.
974 Istaadiyeeme sa`u maakisannyote hashsha 1 saatenni hanaffe gaamo shoolete noore Meksiko Poolaandete ledo assitanno godo`le harinsoonni. Ledote, lamala Kalqete Boowe heewono harissanno.
Bakkalcho Bocaasa 15/ 2015
