Hawaasa:-Gobbaaydi wolquwata xiiwo gidooydi mittimmanke kaajjishatenni qeela dandiinannita mite mite Sidaamu Dagoomi Qoqqowi Mootumma giddo milli milli yitanno hettisamaano paarte egensiisu Hetisamaano paarte baxxinohunni Bakkalcho gaazeexi ledo assitino hasaawinni xawisinonte gede, gobbaayditi lophitino gobbuwa yanna yannatenni Itophiyu aana baxxitino xiiwo assitanni noota xawisse, tenne xiiwo babbadama nooikkiha ali wori geeshsha mitto ikkine Itophiyu qeelle buuxisiinseemmo yitino.
Sidaamu Wolaphote Milli millohu Qaru Borreessaanchinna Uurrinshu Sooreessi Kalaa Laggasi Laanqamohu coyranni, lophitino gobbuwa albano ikko xaano Itophiyu insara anga beetto ikke soqqamara, buximatenni fulannoikki gede hattono insa uytanno qamade calla agadhe lekkansara hundaanni hee`re huucci`rara hassatonsa ikkitino daafira, ninketi uurrinshano konne assoote gibbe sharrantanni nootano kulino.
Sidaamu Wolaphote Milli millohu Qaru Borreessaanchi xawishshi garinni, Ameeriku Gashshooti Afirku gobbuwa baxxinohunni Itophiyu, Afiriku Buudira dhuka assidhannotanna lophitannota di-baxxanno; uminsa qiniiticho seekkara callaati; tenne Itophiyu gashshooti seekke afinota affinno daafira aliidi massagaanora gobbara fultanoikki gede agawa tugginota qummi asse, ninketi polotiku hedonke baxxiturono Itophiyu waateho uurrate mittimmanke kaajjinshate ikkinninna babbadooshshu noonke ikkita xawisa banxeemmo. Konnira gobbaaydi wolquwa angansa Itophiyu aaninni hoolatanno gede uurrinshate widoonni seekkine kulleemmonsa yiino.
Sidaamu Wolaphote Milli-millo (SWM) Itophiyu umosi dandee uurra hasiissanota, Kofatonkeno jeefo gantannota, xiiwono mittimmatenni uurrine qeela hasiissannota miillankerano duu`ne kulloommo yiino Kalaa Leggese Laanqamohu. Itophiyu Afiriku buudira assanni nooti milli millo Ameerikano ikko insa labbannore lowota tashshi assitinokkitanna tini ikkitonsa hiikkano massitannoikkita xawisinohu Kalaa Leggesse, ninke loosoho jawaantanninna loosunni leellishatenni konne aananke noonke diina hoo`la hasiissanota kulino.
Sidaamu Mittimmate Paarte Uurrinshate sooreesi kalaa Lammi Hayyatohu isi widoonni, ninke hettisamaano paarte ikkine sharramate gobbate keeraanchimmanna wolapho balaxa hasiissanota kule, tenne yannanni gobbanke babbadate gidooydi diinnanekenna soqamaasinensa ikkito gobbayidi anga Itophiyu aaninni hooltanno gede seekkine kuleemmo yiino. Ameerikuno Itophiyu aana assanni noo xiiwonna agawa effi`ne ginbeemmotano xawinseemmo yiino
Mite mite paarteno gobbate seeri garinni milli yitanno paarte labbe kaayinni Ammeerikahonna woloottate bissara soqantannorennna Itophiyu lophannota gibbannore eff`ne ginbeemmotanna sharrameemmonsata xawinseemmo yino, kalaa Lammi. Sidaamu Mittimmate Paarte (SMP) Sidaamu Dagoomi Qoqqowi giddo milli yitanni sharrantanni noo paarte ikkkitinota kule, Sidaamimmanke seekkine amande hee`ne Itophiyu aana ka`anno sharre giwatenni, xaano Itophiyu mittimma kaajjitanno gede assate hashsha barra loosa hasiissannota egensiisino.
Konne albankeenni noo doorshnna Kofatto jeefo gantannoikki gede gufisate assinannirichono miteenni gargadhetenna, doorshuno coicha ikkanno gede Sidaamu Dagoomi Qooqqowi giddo milli yitannoti 12 ikkitanno hettisamaano Paarte Jireenyu ledo mittimmate amaale mine uurrisse qarra mittimmate hasaawatenni tirranni hee`noonnita paarubba xawisino.
Abrahaam Saamueel
Bakkalcho Onkoleessa 26/ 2013
