“Preeclampsia” xisso maat?
“Preeclampsia” yaa mitu mitu meenti godowinni no yannara kalaqantanno lowo geeshsha ayirritanno ikkitooti. Tini xisso batinye yanna kalqantannohu godombihunni layinki goofimarichira woy lemoo lamala gedensaanniiti. Tini xisso gamete yannara woy qaaqqu ilamihu gedensaannino kalaqantara dandiitanno.
Godowinni heedheenna meentu aana kalaqantannoti mundeete xiiwo xisso woy “Preeclampsia” noonsa meenti luphiima mundeete xiiwo heedhannonsaha ikkanna; ledoteno shumansa giddo batinye prootiine heedhanno. Konne qarra yannantenni anfe hasiissanno xagisi`ra assi`ra hoongiro shombu, mulu, illetenna woloota bisu kifillarano mitiimma kalaqqara dandiitanno. Konni ledo amadisiisameno godowu giddo no qaaqqi keeraanchimarano dancha di ikkino hattono qaaqqu qelpheepho shiima ikkitara dandiitanno.
Xissote malaatta
Batinye yannara “Preeclampsia” noonsa meenti albihunni baxxitinno macciishshamme di leeltannonsa. Tini xisso kaajjino deerra iilla hoogguro batinye yanna xissote malaati di hee`ranno. Luphi yiino deerra iillino preeklampsia xissote malaatubba aantinore labbanno:-
- Umu damuume
- Illete jaanjura
- Godowu xisso
- Hedeweelcho kalaqantanno bisu qelpheepho
- Hawunaatu
- Tufunna looqqi assa
- Hedeweelcho woy haaro ikkino garinni angatenna illete qooxeesira hattono albu darshe
- Shumate bikki anje
Kuri malaatta mereerinni mittu malaati nafa leelliha ikkiro doktorootunniwa woy fayyimmate ogeeyyewa ha`ratenni rahoteni buuxisiisira hasiissanno. Kuri malaatta keeraa`mino godowishshirano kalaqantara dandiitannohura preeklampsiyu xisso hee`ra hooggara dandiitanno. Ikkollana kayinni buuxo assitano doktorra lowo geeshsha buuxa hasiissannonsa.
Godowamino qaaqqi aana iillishshara dandiitanno mitiimma
- Qaaqqunniha lopho ajisha
- Shuummoote bikka ajisha woy amniyutikete du`namme
Kuri malaatta kalaqantanno yannara godowamino qaaqqi amate godowi giddo assanno millimillo albihunni ajjara dandiitanno. Konni daafira togoo malaati leellanno woyte amuwu buuxisiisi`ra noonsa.
Abbebech Maatewoos
Bakkalcho Onkoleessa 18, 2014 M.D
