Goowaho yineemmo woyte kiirotenni lamala ikkitanno badhenkera afantanno miqqanni aliidiri yaano uminkenni aante goowanke dibbanno miqqa (Vertebrae); miqqate mereero afantanno Diske ( Cervical Discs); miqqanke mereeronna Diskuwate qooxeessira qaru badhete miqichinni fultannonna xaaddanno Nervete nigga hattono babbaxxitino mikitanna nigganni amadante loosantino bisinke kifile yaate.
- Goowu dhibbi hallu xissonni aane batinye dagoomu bissa amadatenni babbaxxitinno xissoranna miinju xiiwo kalaqannoha ikkasi xiinxallo leellishshanno. Goowu dhibba yineemmo woyte konni aleenni xawinsoonni goowa loossanno bisu kifilla giddonni mittu woyi lamu aana xisso xaaddanno woyte goowu xissora korkaata ikkitanno yaate.
Goowu dhibbira kaimu
- Taalinokkihu mannimmate suudi
- Gonxanni akati gara ikka hooga
- Low geeshsha jawanna lowo geeshsha shiima barko horonsi’ra
- Barxa yine goxate rosichi
- Ayirranno borsa woyi wole uduunnicho duucha woyte qoteho duha
- Mannimmate gunte loonsanni yannara kalaqantanno gawajjo
- Kaameelu dano
- Badhete miqichi gawajjo
- Goowu qooxeessira afantanno mikita cancanamanna Diskete gawajjama
- Goowu qooxeessira kalaqantanno mada
- Goowu qooxeessira kalaqamanno buutaamo labbinori bocunni kullannireeti
Goowu dhibbi malaatta
- Goowu qooxeessira xisso macciishshama
- Goowu millimmo ajanna xisso
- Qotunna anga jalli yaa
- Umu damuume ( xissote ledo amadaminohunni)
- Qaafatenna meessaneete duqqate qarrama
- Shuma fuqqate qarrama
- Goowunni ka’’e anganniwa sa’’anni ha’ranno qarra (Cervical Radiology)
- Goowu aana kalaqamannoha keeshshino qarra ikkanna roore yanna dirunni jawoo’mino manni aana kalaqamanno
- Nerve fultanno xulluwa ruukka (Cervical Stenonis) ikkanna roore yanna ‘’Cercical Spondylosis’’ yinanni qarri ledo amadame kalaqamanno.
- Mikitate foxxoorama (Whiplash Injuries) ikkanna kalaqamannohuno miicama kalaqantanno woyte kaameelu rahotenni haranni here hedeweelcho uurreenna alba hige foxxoorame higara dandaanno.
- Mylophath Spinal Cord Injuries:- Tini gawajjo goowu aana kalaqantara dandiitanno gawajjo mereerinni luphiimanna manna akkimalu garinni gawajjitara woyi bisu xe’neranna rewote iillishara dandiitannote.
Gargadhinanni gara
- Gonxanni akata taashshira
- Goowu ledo sumuu yianno barko horonsira ( horonsi’neemmo barko injiitannonkekkita ikkase buuxa hasiissanno.
- Seeda yanna kompiwuterete aana keeshshitanno mannooti kompiwuterensa gottinye taashshi’ra hasiissannonsa. Kompiwutere calla ikkikkinni ofollineemmo garano wodancha hasiissanno. konnira kompiwutere horonsi’neemmo yannara badhete irkisaanchi noo barcimira ofollanke; barcimu gottinyi ofolline lekkankenni baatto garunni kaxxate dandiissannota ikkasenna ofollanke kompiwuterenkera albaanni ikase buuxa hasiissanno. konni garinni taashshi’munnoro illenke Kompiwuterete aliidi 1/3 ki goli aana fooliishshidhanno gede asse taashsha hasiissanno
- Ayirranno uduunne duucha hinge duhatenni qorowama
- Yaaddo ajisha
- Goowu mikita jawaachishshanno millimmo loosa
Xagisi’nanni gara
- Xaggatenni xagisira
- Darre xagisi’ra
- Fiziyooteeraappete xaginaate assi’ra hasiissanno
Bue:- xagisaanote FB qoolinni
Qiddist Gezaheny
Bakkalcho Dotteessa 27, 2014 M.D
