Addis Ababa:- Meento massagaanchim manniwa abbate sharro assatenni ledote meentu wo’munku handaari horonsi’raanchimma buuxissanno loossa aana illacha tuggannota Itophiyu Pireesete Uurrinsha egensiissu.
Itophiyu Pireesete Uurrinsha massagaanonna loosaasine kalqoomu meentu barra (March 8) addi addi qixxaawonni ayirrissino.
Tenne yannara Uurrinshannihu qaru loosu harisaanchi kalaa Geetinneti Taaddesehu coyi’ranni; uurrinsha sa’u yannara meento massagooshsheho abbate sharro assitinno.
Aanteteno meentu baalunku handaarinni noonsa beeqqonna horonsi’raanchimma buuxissanno loossa aana illacha assitinno.
Meentu massagooshshenna baalunku handaari aana noonsa horonsi’raanchimma buuxisate loonseemmohu rippoortete di ikkino yinohu kalaa Geetinneti; uurrinshate giddo maaxamino dhuki noonsarinna jawaata meento loosaasine irkisatenna massagooshshunniwa abbate injoo kalaqate gadacho noonkehuraati yino.
Itophiyu dhagge giddo haxonke gotti yine ha’neemmo gede assitino bareedda noota kayisinohu qaru loosu gumulshaanchi; xaano ikkiro gobba ikkadimmatenni massaganni gobbate naaxxille ikkino meenti noonke yaanni coyi’rino.
Meentu aana iillitannoti batinye xiiwo hee’rase kayise; uurrinshunniri meyaa loosaasineno noota budu xiiwo duqqe jawaate loosatenni umonsa ikkadda assanna massagonniwa daa hasiissannonsa yino.
Itophiyu Pireesete uurrinsha Koo/Tee borro mini lekkisaancho sooreette dukko Birhaane Demmeqeti ise widoonni; uurrinshu meyaa loosaasine dhuka lossatenna horonsi’raanchimmansa buuxisate addi addi loossa loosinota xawissino.
Uurrinshunnire meyaa loosaasine massagooshshunniwa abbatenni gobbaanni bobbahino loosu handaarra aana gummaamma ikka dandaanno gede kaa’litanni afantannota coyidhino.
Itophiyu Pireesete Uurrinsha meentu barri ayyaana ayirrisatenni gobbaanni konne barra gobbanke hanaffino haarinsho soorrote gumi heellicho ikkanke buuxisatenni ikka hasiissanno yitinnoti lekkisaancho sooreette; uurrinshu hanafinota soorrote harinsho guma gansiisate uminke qeecha fula agarantannonke yitinno.
Itophiyu mittimma agarante keeshshitanno gede assate widoonni meentu qeechi luphiimaho yitinnoti dukko Birhaane; gobbate keere buuxisiisate meentu qeechi luphiima ikkasi huwante illacha tunge loosa hasiissannonke yitinno.
Uurrinsha meentu gobbate noonsa kaa’lo lossate assitanno irko gobbaanni uurrinshunnita qaaqquullu hoshsho base uduunnunninna ogeeyyetenni wonshate sharro assitanni noota qummi assite; loosaasinete heeshshote xiiwo shotisate sagalete laalchi uduunne taalo waaginni loosaasinete shiqishshanni noota xawissino.
Amanyootu aana uurrinshate meyaa odeessaanonni calla lamalki yannara qixxaawinohu Addis Zemeninna Itophiyu Heeraaldi Gaazeexxa baxxitino attamo qaru loosu gumulshaanchinni maassante niwaawete shiqqino.
Kalqoomu meentu barra kalqete 111ki nna gobbate 46ki yannara ayirrinsoonni.
Qiddist Gezaheny
Bakkalcho Badheessa 1, 2014 M.D
