Aananno Faranjootu diri hanafora Afirikaho bayriidi lekkate kuwaase ikkitino Afiriku boowe 33ki yannara ha’rinsanni.Tenne heewo qixxeessitannoti Kaameruunino qixxaawo gudate aana afantanno. Lame dirrara COVID 19 vayresenninna wolu korinni seeddino heewo boodu agani gedensaanni 24 gobbuwa beeqqisiisatenni assinanni.Tenne ha’runseno heewote qixxeessaancho ikkinohu Afiriku lekkate kuwaase konfedereshiine ispoonserete ledo ikkatenni balaxi-heewote loossa loosate aana afamanno.
Loossate giddonnino mitto ikkinohu boowe addi addi gobbuwa doyissatenni daa’’attanno gede assate.Lamalate giddo Ahigurete deerrinni jawa ikkitino heewonni qeeltinorira uynanni Afiriku boowe Itophiya daggeenna daa”antoonni. Dhaggete boowe Itophiya lendanna 18 gobbuwa heewote ispoonsere ‘Total Energies’ widoonni la”ate shiqannoha ikkanno.
Seeda dirra gedensaanni xintitino heewora higginoti Itophiyu boowe iillitanno gobbuwa giddonni mitte ikkitanna,booweno gobbate qaru quchumi hattono Afiriku qaru quchuma ikkitino Addis Abebaho onte barruwara keeshshannoha ikkanno.
Boowe eembarra saatete gedensaanni Itophiya dayeennano Total Energies marketing manaajere Ina Sof,uurrinshate biraandete ambaasaaddere Hayle Gebresillaasehu hattono Itophiyu lekkate kuwaase federeshiine riqiwamaanchi Selemoon Gebresillaasehu haa’rate amanyoote assitinota Soccer Itophiyu mashalaqqe kultanno. Egennamino atileetenna Total Energies Itophiyu ambaasaaddere Hayle boowe daatenni macciishshaminosi hagiirre xawise,Itophiyu gobboomu gaamo battalate dancha guma maareekkisiissanno gedeno halchino.
Boowe keeshshitanno onte barruwarano Boolenna Mekisikote afantanno ‘Total Energies’ owaante uytannowa faajjetenni ofollannoha ikkanna,lekkate kaase dukkisaano baatooshshiweelo footo ka’anno gede kaayyo injaabbino.
Qixxaawote aanano Itophiyu lekkate kuwaase federeshiine massagaano,gobboomu gaamo miilla hattono woshshatto assinoonninsa wosini afantinowa Itophiyaho heedhanno daa”atto gooffannoha ikkannota kulloonni.
A.K.G 1957 xintantinoti Afiriku boowe sase gobbuwa (Itophiyu,Gibitsenna Suudaane ) caallaati miilimmatenni hanqafinohu. Ha’rinshotennino gobbuwate kiiro lossatenni sasu agani gedensaanni ha’rinsanni Afiriku boowera 24 gobbuwa beeqqitannoha ikkanno.
Itophiya daynohunna wole gobbuwano daa”atto assitanno boowe heewote qeelaanora aa hananfoonnihu A.K.G 1978 ikkanna,Gaanu qolte dhaggete boowe ama ikkatenni umite.Jatte yannara Afiriku Mittimma Uurrinsha boowe yaatenni egennantino boowe,A.K.G 2002 kawa su’mama soorri’re Afiriku boowe yaamame woshshamanno.Qara Afiriku boowe kayissanno gobbuwa sase higge kaysa dandiitinoha ikkanna,A.K.G 1984,1988 na 2000 qeelaancho ikkitinoti Kaameruun umi yannara umiseha assi’ra dandiitino.Afiriku boowe ha’risa hananfinkunni kayse heewote ikkitanno boowete suudi sase hige soorramino.Xa qeelaanote uynanni boowe A.K.G 2001 culku buuramme ikke Ixaaliyu ogeessinni qixxaawara dandiino. Mitte higge qeelaancjo ikkitanno gaamo qara boowenni ledo mitto ikke loonsoonni boowe uynanni woyte,sase hige qeelaancho ikkannohu qara boowe ayirrinyunni adhanno.
Gibtse A.K.G 2006,2008 na 2010 aantetenni qeelaancho ikkasenni ha’runsite qara boowe adhitino.Ikkollana,sai diro boowe ofoltanno gobbate lekkate kuwaase Federeshiine qara borro mininni mooramasi kulloonni.Afiriku boowe safaancho Itophiyu A.K.G 1962,1968 na 1978 sase higge boowete ama ikka dandiitino.Yannate ha’rinshoonni boowe beeqqate qarrisiserono dirrate gedensaanni daanno Kaameruun Afiriku boowera wirro battalate beeqqaancho ikkitino.
Yaared Geetaacho
Bakkalcho Birra 4, 2014 M.D Hamuse
