Mootimma kalaqamu akatisenni dagate yawo noosi gashshootu tantanooti. Baxxinohunnino soorrote dhagge gafi giddo afantanno gobbuwara mootimmate yawo rosaminohunni bacu garinni luphi yiinoha ikkannota; konnira ikkitanno qixxaawo kalaqano jawa mini loosooti.
Mitto widoonni albihu akkalu polotiku amanyooti kalaqino baincho hedonna tini hedo kalaqqino hasiisannoikki assoote uurrisate; wole widoonnino soorro haadhe dagginoha qaaffannonna qafisiissanno hedonni wolqa kalaqe qeelaanchimmatenni uurranno gede assinanni kalaqamu sharro luphi yitino yawonninna konne kaima assitino disipiliinenni massagate yawo noose.
Baxxinohunnino baca sharrenni tii`u gawajjo iillitinonsa gobbuwara dagate sumiimmenni doorantanno mootimma duuchunku aleenni gobba gobbate gede woxxate yawo noosiha ikkasinni mootimmate akatasino ikko yowote deerra keennannihu gobba gobbate gede sufisiisate noosi dhukinninna murciraanchimmanniti.
Kunino qarrubba kaiminsanni garunni huwata, qarrubbateno sufannonna beeqqisaancho ikkitino ragubba kalaqa, baalanta daga qarrubba tirate furcho asse millisa, rosamino polotiku doogonni fule qaafannitanna haaro polotiku bude kalaqanna rosiisa, duuchunku aleenni gobba qeelaancho assanno polotiku massago aa xa`mannoho.
Soorrote wolqa sa`u sase dirrara gobba gobbate gede sufisiisate; konnira injaanno haaro polotiku hedo egensiisatenni, baca cincanninna godowa hala`latenni qaafino soorrote doogo hoongoommore; dancha soorrote hedeweelchubba kiisa dandiissanno haaro dhaggera hanafo ikkinota batinyu ammananno.
Kunninnino aleenni sorro daggu yannanni hanafe soorro hunate giddoydinnino gobbaydinnino sumuu yite millissanno wolquwa heddinonna mixidhino garinni hunote sokkonsa guma laaltannoikki gede soorrote wolqa dagate ledo kalaqino sumuummenna daga qara soorrote biso asse qaafasi borreessiisino gobboomittete sewora jawa dhuka kalaqinosi.
Gobba gobbate gede hunsha ba`araati yitanno kiilaano gudumaaleho wo`mitinowa, gobba diigate sioolete geeshsha ha`neemmo yitanno hemaanonniti hunote huuro luphi yitino boo`nanni xawoho siatatenni qixxaabbinowa, kalqoomitte tuqu xaadooshshe xawu garinni ha`latenni cancishaancho HWHT ra proopagaandu uduunne ikkite dirantinowa, agawo tugatenni wojjishiisha barru baala assinanni assootubbanna Itophiyu gobbate gede kalqete barubbara su`mise bushatenni ka”anno jiffanno yannara soorrote wolqa gobbatenna gobbate horora leellishshino murci’raanchimma ga`a dhaggenkera jawa borro ikkannota ammannanni.
Soorrote wolqa sa`u sase dirrara gobba gobbate gede jiffino qarrubba cincatenni sharrame sa”atenni sa`e gobbate gede hanaffinoha haaro polotiku amanyoote uurrinsha qeellannikki deerra iillishatenna gobba gobbate gede reekkisate dagate widoonni uynoonnisi mootimmimmate sumiimme antete baca mitiimmubba aga`rtannosiha ikkannota sa`noommo doogonni keenate waadannoha dikkanno.
Kunninino sa”e hananfoonni soorrote loossa kaajjitino doogonni sewote widira reekkisate soorrote wolqara uynoonni mootimmate sumiimme dancha hedeweelcho gede cu`mi`rate sewo widira soorratenni dagate wodani giddo woyyitino basenna gotti yiino ammanamooshshe afi`rate luphi yitino yawonni millisa xa`manno.
Soorrote wolqa dagatenni afidhino hala`lado sumiimmenni mootimma ikkase;soorrote loossubba kaajjishshe sufisiisatenni dagannita soorrote hasatto leellitanno dhaggete fooliishshora soorrate dandiisanno dhaggete kaayyo kalaqinose. Tenne kaayyo hanafino dagatenna gobbate uurrate murciraanchimmanna sorrote wolqa ikkase leellanno garinni buuxisiisa, duuchunku aleenni gobba gobbate gede reekkisate luphi yitino yawo fultara agarrannise.
Sanfoonni mootimma tenne yawo duha dandiisanno dhuki hee`rasiranna bikkaanchuno tenne yawonni burqannohanna; kunnira hiraminoha ikkara hasiisanno. Konne assateno soorrote wolqa sayissino qaraartino doogo la`nanni woyte ayirrasira dandaannoha dikkanno!
Bakkalcho Wocawaaro 27, 2014 M.D Hamuse
