Addis Ababa: Addis Ababu Quchumi Haaru Amaale Mini miilla daga jawa yawonna eeggo uytinonke gede huwanteemmo Yitu.
Itophiyu Pireesete Uurrinshara hedonsa uytino haaru amaale mini miila mereerinni Dukko Tsiwaye Muluneti, Addis Ababu Quchumi daga jawa yawonna eeggo tugginonke gede macciishshamannonke; korkaatuno daga guurate fulte uurrite hosse doortinonke. Konni daafira umi’ya gede lowo yawo macciishshantannoe yitino.
Addis Ababu quchumira ilame lopha’ya deerrinni lowo yawo nooe gede macciishshantannoe yitinoti Dukko Tsiwaye, dagano ninkewiinni lowore agadhitannota ammaneemma; konni kaiminnino quchumu lophora dandaamiere baala assate qixxaawe e”eemma yitino.
Haaru amaalete mini miila ledote yawonkeno calluwinke fulle didandiineemmo yite; daga doorshu barrintenni gede qotenke uurrite loonseemmo loosira amaale uytanninkenna hasattose xawissanni qotenke uurritara hasiisanno yitino.
Woluno haaru Addis Ababu Quchumi Amaale Mininni daga maa agadhitona? yitanno xa’mo shiqqinosi miili Kalaa Yoonaasi Zewudehu, tini xa’mo danchanna higa hasiissannose xa’mo ikkitinota kayse, tenne xa’mo qolate kayinni daga maa hasidhanno yaannoha bada hasiissanno gede coy’rino.
Konnirano kuri amaalete mini miilla fultinohu dagatewiinni ikkinohura dagannita qara qara xa’mubba bande anfe doorammummo woyteno dooraancho daga doortannonke gede doortininkero togo assineemmo’ne yine doorammoommo. Addis Ababu dagano balala ikkite di-ikkino huuronsa uytinonkehu; hexxo assidhenkeeti ikkinnina yiino.
Konni daafira dooramaanchu amaalete mini hatte huuronni dooramoommo amaalete minira eoommo onte dirolla agadheemmo yaannoha dilawannoe; saonka soodinni hashshi geeshsha uurrite doortinosi daga owaatate mudhinoha lawannoe yiino.
Amadisiiseno Kalaa Yoonaasi, techo ninke ofollinoommo barcimira bero wolu ofolle saino; qaru coy kaayinni di-isooti. Konni daafira kuni amaalete mini dhukisi assi deerri wo’munni daafurikkinni doortinosi daga kaasa noosi yee hedeemmono yee; konneno baalunku amaalete mini miillanni agarranni yiino.
Jeefoteno mitte soorro daggannohu hasi’noonni daafira calla di-ikkino yaannohu amaalete mini miili Kalaa Yoonaasi, dagate giddonniiti fulloommohu, dagateeti doorammoommohu, dagaati owaanteemmohu; konni daafira dagate giddonni fulankenna daga owaatanke deerrinni dagate assineemmo assootira baalaho daga ledo halante loosa hasiissanno gede xawise; daga huuro’ya oomma xaa ka’a ontu diri gedensaanni xaando yaantenninni danchare la’anno woyte jawaachishshanni bushare la’anno woyte seejjatenni, sharramatenninna amaaltanni quchumanke woyyaawinoha assate halanto yitanno sokka saysino.
Bakkalcho Wocawaaro 20, 2014
