Qiddist Gezaheny
Addis Ababa- Haaro safantanno mootimma xiinxallote aana irkisante baalunku ogimmate handaarinna rosu deerri aana afantanno wedella hedote giddo wortino loosu kalaqo balaxote illachinni mitto assi’ra hasiissannoseta Itophiyu wedellu dancha fajjo keeru Pirezidaante kalaa Yohaannisi Xaasew xawisi.
Kalaa Yohaannisi baxxinohunni Itophiyu Pireesete Uurrinsha ledo assino hasaawinni; baalunku ogimmate handaarinna rosu deerrira afantanno wedella hedote giddo wortino loosu kaayyo kalaqo balaxote illachinni mitte ikka hasiissannose.
Haaro safantanno mootimma qara ikkino mini loosinni mittu loosu hoonge ajisha ikkasenni xiinxallote aana irkidhe konne looso gumula agarantannose.
Diru dirunni babbaxxitino rosu uurrinshuwanni maassantanno rosaano gobbanniti Sivil Serviise duqqitara didandiitanno yinohu Pirezidaantichu; mootimma gobboomu millimmo assite harammaadda ogimmate qajeelshanna dandoo afidhanno gede assatenninna babbaxxitino ogimmanni maassantinoreno ogimmansa ledo xaadooshshu noo handaarrara looso kalaqqanno gede kaa’latenni qarra shotisate loosa hasiissannoseta xawisino.
Kalaa Yohaannisi xawishshi garinni; wedellu qarri mootimmatenni calla tidhamara didandaanno. Konnira wedellu umonsa ikkado assatenna kalaqantannonsa kaayyo garunni horonsi’ratenni albillitte heeshshonsa injeessi’rate loosa hasiissannonsa.
Batinyu wedelli halalla tayisse wole gobbuwa e’’atenna heshshonsa woyyeessate lowo baatooshshe baattannota qummi assanno; tenne kakkalo gobbansa giddo heedhe umonsa soorrate hosiissoommero heeshshonsa aana baca soorro abba dandiitannonkanni; konni garinni loosoho qixxaabbinore ikka noonsa yino.
Wedellu wo’munku handaari horonsi’raanchimma aana illacha assite loossanno uurrinshuwanna loosu massagaano yawonsa garunni fulatenni mittonna qara gobbate qarra ikkinoha wedellu loosu hoonge qarra gatisate loosa hasiissannonsata coyi’rino.
Wedelluno dagoomittete xa’mamooshshe lossi’ratenni mootimmate massagaanonna uurrinshuwa loossanno looso wedellu horora loossanni nookkita qaagiissanna xa’ma agarantannonsata qummi assino.
Loosu kalaqo aana wedellu uminsanni loosantenni tantanante loossara hasi’nanni yinohu Pirezidaantichu; batinyootu tantanante woxe adhituhu gedensaanni sumuu yaa hoogatenni woxe bebbeeqqite billaallissanna la’nanni.
Konne qarra gatisate dagoomittete xaadooshshensa lossidhanno gedenna kaajjado sumuu yaate dandoo heedheennansa loosa dandiitanno gede handaaraho loossannori Sivilete maamarra wedellaho qajeelsha aatenni uminsa qeecha fulturo woyyaawino qansicha kalaqate dandiitannota xawisino.
Bakkalcho Wocawaaro 20, 2014
