Abebech Maatewoos
Addis Ababa:- Cancishaano HWHT korkaatinni gama gobbate qooxeessuwara irshu loosubba gufisanturono gobbate gede laalchu anje dixaaddannonke yaatenni giwirinnu ministeere xawissu.
Giwirinnu ministeere ministr dieeti Dr Maandefiro Nugusehu Itophiyu pireesete uurrinshara xawisino garinni; mootimma hasidhukkinni e`ino olansho kaiminni gama gobbate qooxeessuwara irshu loosubba gufisanturono gobbate gede laalchu anje dixaaddannonke. Baxxinohunni dancha laalcho uytanno gobbate qooxeessuwarano woyyino laalcho laalcho afi`rate dandiissanno loosubba loosantanni no.
Gobbate deerrinni 2013/14 laalchu mixo yannara 13 miiliyoone hekitaar baatto wixunni diwatenni 400 miiliyoone kuntaala laalcho laashshate mixo amande loonsanni hee`noonnita buuxisiise; tenne mixo gumaame assatenna cancishaancho HWHT korkaatinni irshu loosubba gufisantino gama qooxeessuwara afamanno laalcho kiisate looso loonsanni hee`noonni yiino.
Addinni dancha laalcho uytanno gobbate qooxeessuwara yannaasincho giwirinnu laalcho lossinanni tekinoloojubba garunni horonsiratenni gobbate deerrinni laalchimma laalchimma lossate gumaamma loosubba loonsoonnita Dr Maandefiro xawise; ledoteno dagganno agannara 1 miiliyoone hekitaar baatto gorsunni laashshatennino cancishaancho HWHT gaamo korkaatinni irshu loosi gufisaminonsa qooxeessuwara afamara dandaanno laalcho kiisate qixxaawote loosubba loosantanni afantannotanna 400 kume hekitaare baatto qamadetenni calla diwate mixo amadoonnita xawisino.
“Gorsunni lattara dandiitanno baatto fano ikkitannoikki gede hala`lado millimillo assinanni hee`noommo” yiinohu Dr Maandefiro; irshunniha loosonke gorsunni irkinsummoro gama gobbate qooxeessuwara irshu loosubba gufisanturono gobbate deerrinni laalchu anje heedhannokki gede assinanni yiino.
Laashshinoonni laalchono garunni dikkote amanyoote harunsino garinni tuqanno gedenna seeriweelo doogonni gobbatenni fulannoikki gede assatenni laalchu anje kalaqantannoikki gede gargadha dandiinanni yee xawisino.
Irshu loosi gufisamino qooxeessuwarano hee`rannoha waa afi`nanni doogo baala horosiratenni baatto loosidhe galtinori gorsunni latissanno gedenna sagalete horonsi`nannire dibbanno gede assinanni yiinohu Dr Maandefiro; cancishaanchu HWHT yanna aga`re irshu looso gufisasi hedo yee baatto loosidhe galtinore hudetenni qorichishate noosi gibbonna rabbate assoote gotti asse leellishanno yiino.
Bakkalcho Wocawaaro 20, 2014
