Wedellaho. Egennamansa hanaffinohu rosu mini jaaloominninna loosunniiti. Mittu gobbaanni wolootu qaxarante loose diegentino. Gutu looso hanaffinohu uminsaha Interneetete daddali mine fa’niteeti. Kuni loosi heddino gede ikkinsakkinni gatita Sasu diri albaanni Interneetete horonsidhanni keeshshitino Kompiyuterra adhite Attamotenna Diizaynete loosira e’ino.
Attamotenna Diizaynete looso hanaffuhu gedensaanni coyi baalu injiinoha di ikkinonsa. Shota gedeno konni loosinni eo afi’ra di dandiitino. Hosse galtanni kaynni coye baala injeessansanni, jaaloomansano kaajjishatenninna haaruudde loosu hayyo harunsansanni lame lekkansanni uurra dandiitino.
‘’Abroos’’ yite Sasu diri albaanni uurrissinohu Attamotenna Diizaynete uurrinshi shiima dirra giddo baxxinohunni rosu mini qooxeessira rosaanote baxxitino qixxaawo kanateerra (T-shertuwa) nna shurraabbate aana attamatenni umonsa egensiisa dandiitino. Harinshotenni woloota woraqatu aananna babbaxxino uduunnichi aana hala’ladunni Attamatenni harancho yanna giddo egensiishshu handaarinni gummaa’ma dandiitino. Uurrinshu xintaano gobbaanni ledote loosaasine beeqqaano assatenni looso halashshite loossanni afantanno. Waaxante looso loosa hasidhanno wedellirano lawishsha assine kullanni uurrinsha ikka dandiitino.
Kalaa Yohaannis Taayyu ‘’Abroosi Attamotenna Diizaynete Uurrinsha’’ beeqqaanchooti. Konni alba isinna jaallasi Interneetete daddali looso loossinota kaysanno. Ikkollana Interneetete loosi dancha eo abbinonsakkita la’uti Hijra Saafinna Heewan Maammo yaamantanno jaallasi ledo ikkatenni Sasu diri albaanni Attamotenna Diizaynete loosira einota coyi’ranno. Mittichote gobbaanni isinna laynkiti loosu qeechaanchosi konni alba qaxarante loossinokkita, mereeronsa kaajjadu jaaloomi hee’rasinninna wo’manka widoonni qaxarame loosate hasatto hoogasenni konni loosira eate hasidhinota kaysanno.
Kaiminsa konni alba Interneetetenna Neetworkingete loosira horonsidhanni keeshshitino Kompiwuterra gobbaanni woxe ikkinokkita xawise; looso hanaffu yannara qaru illachinsa rahotenni woxe afi’ra ikkikkinni looso kaajjishe sufisiisa ikkinota qummi assanno. Umo qooxeessaho shiimaadda woraqatu aaninna uddannate attamo loosa hanaffinotanna gedensaannino woloota Interneetete mini uduunne horonsi’ratenni woyyaabbino maashinna hidhatenni woloota Attamotenna Diizaynete looso gumulsa dandiitinota xawisanno.
Baxxino garinni uurrinshinsa Abroosi Attamotenna Diizaynete looso hanafihunni umikki dirinni roorenkanni afamanohu batinye rosaanote baxxitino qixxaawo T-shertenna Shurraawe aana Attamo loosatenni ikkinota kaysanno. Kunino uurrinsha lowo geeshsha egensiisinota xawisanno.
Isinna mitticho loosu qeechaanchosi Kompiwuterete sayinse rosaancho; laynkitino Arkitekcherete ogeette ikkitinotanna tenne ogimmansa horonsi’ratenni Attamotenna Diizaynete loosonsa shiimaadda woraqattanni; T-shertuwatenninna Shurraabbate aani attamonni suutunni jawa deerra iillishshinota kalaa Yohaannisi coyi’ranno. Isono ikko jaallasi konni attamotenna Diizaynete loosira noonsa egenno taalo dunte loossannota kulanno.
Kalaa Yohaannisi xawishshi garinni konni alba batinye Attamote looso gobbaanni loosiisanni keeshshinohu Abroosi Attamonna Dizayne; xaa yannara batinye Attamotenna Dizaynete looso umisinni gumulanno. Uddanote aana loonsanni Attamo babbaxxitino doogganni loonsanni. Woraqatu Attamo lainohunni Maxaaficho, Biroosheroota, fincinanni woraqatta, Adhammete, Daddalunna Ilamishshu kaarduwanna wolootta Attamo loosanno.
Attamote loosi batinye handaarra amadannoha ikkirono Abroosi uddanote Attamonni roorenkanni afamanno. Batinye Addis Ababu quchumira afantanno rosi minna konni T-shertetenna Shurraawete aani Attamo loosinni egentinonsa. T-Shertete, Shurraawete, Jakkeettunna shiimaadda uddanna aana xaphoomunni uddanote aana loossanno Attamo islanchimmatenni loossanno. Attamote dikko afi’rateno Feesi Buuke, Telegiraamenna Instagraame labbinore dagoomittete qoolla horonsidhanno.
Interneetete mini kompiwuterranna woloota shiimaadda uduunne adhe looso hanafinohu Abroosi xaa yannara xaphooma womaashshu dhukisi Mitte Miliyoone iillino. Sasente uurrinshu qeechaanonni ledote Shoole mannoota beeqqaano assatenni halashshe loosanni afamanno. Attamote loosira kaa’litanno maashinna wonshi’re loosanni afamanno.
Kalaa Yohaannisi xawishshi garinni; aantete Abroosi Attamotenna Diizaynete uurrinshi konni loosinni calla keeshshannoha ikkikkinni wolootta egensiishshu handaarra giddora hala’ladunni e’’e loosate hasatto noosi. Baxxinohunni Baanere Attamate looso hanafate mixo amade loosanni afamanno. Konni loosira kaa’litanno maashinna wonshatenni Attamote loosi widira lossate hasatto noosi.
Konni gobbaanni uddanote Attamora hasiissanno maashinna gobba giddora eessatenni uddanote attamo looso lossate hedo amade loosanni afamanno. Wolootta attamote handaarra giddora eateno sharro assanni afamanno.
‘’Abroosi Attamotenna Diizaynete loosi uurrinshi Sasu diri giddo batinye Attamote looso loosannohu dagoomittete qoolla horonsi’ratenniiti’’ yaannohu kalaa Yohaannisi; konni garinni owaatamaano wodani gede albaanni xaadde loosiisi’rate dandiitannokkita qummi assanno. Kunino uurrinshu owaatamaano shota gede afi’rate dandaannokki gede assinosi yaanno. Konni kaiminnino batinye owaatamaanowa iillate doogo kalaqe loosanni afamannota qummi assino.
Egensiishshunna Attamote loosi handaari yanna yannatenni lophanni daynoha ikkirono e’’ote anje kaynni handaaraho qara mitiimma ikkitino. Insa uurrinshano baxxinohunni uddannate aana loonsanni Attamora hasiissanno eo anje xaaddannonsata qummi assanno. Tenne yannanni eote anje mitiimma luphiimate.
Uduunne afi’neennano taalu waaginni hidha dandiinannikkita xawisanno. Tenne aana uduunnu wodani gede afamannonna taalu waaginni dikkote shiqanno gede assate widoonni mootimmate harunso ajjinota ikkase xawisanno.
Kaimunni daafurre hananfoommohuranna kaimaho ikkanno woxi nookkiha ka’noommo daafira ‘’ Make it happen’’ yitanno yaatto amandoommo yinohu kalaa Yohaannisi; kaajjine loosankenni xaa yannara owaatamaano ninkewa higge dagganni no yaanno.
Konne Attamotenna Diizaynete looso mitteenni loosatenni gummaamma ikkitinota kulannohu kalaa Yohaannisi; insati jawiidi sewoo konni alba loossinoha Interneetete daddalo Attamotenna Diizaynete loosira harancho yanna giddo soorransa ikkinota qummi assino.
Konni loosinni woyyaabbino e’’o afiransanni gobbaanni wolu Baankete ofollanno womaashshi noonsatanna Sasunku gobbaanni wolootta jaallansano beeqqitanno assatenni loosansa techo afidhino gumira iillishinonsata coyi’ranno. Togo yinanni woyte kaynni sewoote birxichira iillitinokkitanna albillitte konni aleenni loosa agarantannonsata huwachishanno.
Wolootu wedelli mitteenni ikkite uminsa looso loosatenni gummaa’ma hasidhuro balaxxe loonse lophatenni ammana noonsata qaagiissanno. Insa techo iillitino gumira jawa qeecha amaddannoti hasiisannokki amalinni co’o yitinore ikkansanni wolootu wedellino hasiisannokki amali giddora e’ukkinni einoha ikkirono rahotenni agurte loosonsa amale assi’ra hasiissannonsata jaallasi riqiwe wolootahono amaalesi beehanno.
Itophiyu giddo shota gede loonse afi’ra dandaa hoongirono hasiisannokki baycho hosantenni loonse afi’nannihu Mittu birri roorannota kulanno. Uminsa looso hanafate hasatto noonsa wedellino umihunni loosate kaajjillu hee’ransara hasiisannoha ikkirono loosoho e’anno woyte kayinni xiinxallotenna qorophotenni ikka hasiissannota kalaa Yohaannisi amaalanno.
Mitteenni gamba yine looso hanafatenni hendoonniwa iilla dandiinannita Abroosi Attamotenna Diizaynete loosi uurrinsha miilla dancha lawishsha ikkansanni togoonni wolootu wedellino insawiinni rosicho adhite jaalla gamba yite loossuro heddinowa iilla dandiitanno yitannoti qara sokkankeeti. Keerunni.
Qiddist Gezaheny
Bakkalcho Wocawaaro 6, 2014 M.D Hamuse
