‘’Sidaamu Serkese’’ (Sidaama Circus) Hawaasi quchumira safante Itophiyahonna babbaxxitino gobbaydi gobbuwa geeshsha iillitino kilaweeti.
Kilawete qajeelshaanchi Issubaalew Akliiluhu xawisanno garinni ‘’Sidaamu Serkese’’ xintantuhunni lamalki diro amaddannino. Serkese Hawaasi quchumira hojjicho ikkase kaiminni albaanni ‘’Moneer Serkes’’ nna ‘’Nigaat Serkes’’ yaamantannoti serkesete kilabba tayxe 20 diri albaanni noonkanni. Hatte yannara anjesinni kilabbate giddo hanqafame qajeelannonkanni. Hatti kilabba babbaxxitino korkaattanni diigante ba’ino.
Hatte yannara isinna jaallasi Addis Ababaho ‘’Fikaat Serkes’’ yaamantanno Serkesete kilawera loossanni addi addi rosicho afidhu gedensaanni fajjo fushshidhe ooso gamba assite qajeelsano hanaffu; mite mite horono afidhanno; gobbaydi gobbuwara hadhe serkese leellishate kaayyono afidhu. Hakkiinnino ‘’Hislam Drammer’’ yaamamanno sirbu gaamo ledo ikkatenni rosicho adhatenna soorri’rate Keeniya hadhe taxxi yite higgino.
Keeniyunni higge Addis Ababa daggu gedensaanni, Hawaasi quchumira kaajjado serkesete kilawe mayra hooggu? Albaanni nooti diigantuna haaru garinni uurrisa hoongihu mayraati? yitanno xa’mo galtinosihu Issubaalew; umisi kakkaooshshinni Addis Ababunni agure hige Hawaasa ooso gamba asse tenne xaata ‘’Sidaamu Serkese’’ uurrisino. Konne assanno yannara aye kaa’looshshino, hiikko gari irkono nookkihaati yaanni xawisanno.
Hawaasi quchumira 6wu diri albaanni uurrisinoti Sidaamu Serkese millimillo hanaffu gedensaanni mite mite loossano loosanni, ooso qajeelsanni hee’re Dubaye ha’rate kaayyo afi’re hakkiichono mitte lamalara wo’ma feestivaale maasso aana leellatenni serkese leellishate dandiino.
Hattenne ba’rera egensiisaanchu Zaaki yaamamannohu koyiseennasi gobbankenni babbaxxitino qoqqowubbanni yaano Tigrayete, Amaaru, Addis Ababaho afantanno serkesete kilabbanni filantinori ledo gamba yite hadhino. Hakkiinni higgu gedensaannino baatooshshi-weelo ooso gamba asse qajeelsanno yannarano oosote millimmo danchu garinni gumaamma ikka dandiinannita leellishshannoha ikkasi huwatasinni loososi kaajjishe sufi.
Dubayetenni hige day gedensaannino lowonta keeshshikkinni wirro mittu dirira Turkete gobbara ha’re keeshshatenna serkese leellishate xa’minoonnisi garinni ‘’Adaama Serkes’’ yaamantannote ledo ikkatenni ha’rate hajo baala gudisiisi’ri gedensaanni konniicho kilawesira hanqafantino ooso isi hakkiichi mittu dirira keeshshiro amadannonsahu hooganno daafira agurte fulatannona yaannohunni Turke ha’ra agure konniichonni ooso qajeelsanni keeshshi.
Hakkonni gedensaannino DeenMaarkete gobbara ha’re 6 aganira babbaxxitino qooxeessuwara Awuroppunna wolootta kalqenke gobbuwanni hakkiicho leellitinori babbaxxitinori egennantino Artistooti noowa serkese leellishanni keeshshi yannarano insa ledo xaadate kaayyo afi’rino. Hakkiinnino sae hakkiichonni ‘’Denish Award’’ yaannohura doorame heewotenni 2kinna 3ki deerra fulatenni baraarsha afi’rinotano kilawete qajeelshaanchi Issubaalew coyi’ranno.
Deenmaarkete gobbara 6 agannara keeshshe higi gedensaannino albaanni uurrisinoti Sidaamu Serkese kaajjishatenni quchumu giddo babbaxxitino olluubbara, rosu minnara hattono babbaxxitinoti dagate ba’re heedhuwa baatooshshi-weelo serkese leellishatenni tini serkese roorenkanni egennantanno gedeassino.
Serkese ‘’Debuubi Sirbaanote Maamara’’ yaamamannohu ledo ikkatenni Nayijeeriyaho Leegoosi qixxeessinoonnihu sirbu festivaale ha’rinsoonni ba’rera Itophiya riqiwatenni hadhe babbaxxitino serkese leellishatenni gobbanke hattenne ba’rera umikki deerra amadde gumultanno gede assino.
Sidaamu serkese xaa yannara noo deerra lainohunnino kiirotenni 60 ale ikkitanno qaaqquullenna ooso tenne kilawera hanqafante qajeeltanni danchanna gumaame millimillo assitanni afantanno.
Tini serkese hanaffu yannara aye irkono nookkihaati; laooshshuno didanchahonkanni. Korkaatuno kilawete hanqafantino qaaqquulli miteekke ubbe woy miicidhe gawajjantara dandiitanno yitanno huluullonniiti; yaanno qajeelshaanchu. Xaa yannara kayinni mootimmate bissano tini serkese albillicho lophitanno gede danchu laooshshi noonsa; quchumu gashshootino hasiissanno irko assate qaale eino garaati noohu. Hawaasi quchumira hojjicho serkesete kilaweeti yaatenni danchu su’mi nooseta ikkitino. Babbaxxitinoti tuqu xaadooshshuwano towaattanni serkesete millimillo daafira hasaawissanni Sidaamu serkeseha dancha lawishsha wolootahono egensiisate harinsho noota qajeelshaanchu Issubaalew huwachishanno.
Hawaasi quchumira duuchu dani ispoortuwa halashshatenna quchumu teessaanoha seeda yanna xa’mo ikkinoha wedellu gangalattanno mereershuwa loonsanniha ikkanna baxxinohunni Sidaamu Serkese gaamono roorenkanni jawaachishatenni Hawaasi quchumanna Sidaamu qoqqowono ikko Itophiya riqibbe babbaxxitino baseranna gobbuwara shiqqanni heewisantannota assateno qajeelshunna gangalantanni mereersha loonsannitano saihu Ella agani 2013M.Dra Hawaasi quchumi gashshooti kantiiwi kaa’laanchu pirofeeserchi Tseggaye Tukehu coyi’rinoti qaangannite.
Ikkollana ‘’Sidaamu Serkese Gaamo’’ xa noo uurrinshanni gaamote miilla qajeeltannohunna millimillo assitannohu olluu borro mini hoowe giddoonni ikkasinni hala’ladunna qajeelshaho injiitanno basenna qajeelshaho hasiisanno uduunni anje noosetano Itophiyu pireesete uurrinshanni Bakkalcho gaazeexi qixxaawo kifile odeessaano basete leellite towaatte la’’ate dandiitino. Konnirano haja la’annonsa bissa dandaami garinni irko assituha qaaqquullunna wedellunniha dancha amanyoote gatamartanni noo kilawe ikkasenni roorenkanni jawaatanna quchumu ikko qoqqowu deerrinni ikkado ikkitanno gede assa dandiinanni yitanno sokka noonke.
Sidaamu Serkese kalqenkera koronu vayrese taraawo albaanni babbaxxitino gobbuwara hadhanni loossanni sa’inoha ikkanna fayyate taraawo hala’liteenna yannate geeshshira quchumunna qooxeessaho calla millimillo leellishshanni noohano ikkiro albaanni hadhino gobbuwara babbaxxitino ba’rera afanshunna galatu woraqatanna afidhino. Baxxinohunni leellishshino ikkadimmanni kayinni DeenMaarkete gobbara attamamannohunna egennaminohu ‘’Lokalt’’ yaamamanno gaazeexino Sidaamu Serkese daafira hala’ladunni odeessinota afi’noonni mashalaqqe leellishshanno.
Amsaalu Felleqe
Bakkalcho Woxawaajje 20 , 2013 M.D
