ህዝቢ ትግራይ ዓይኑ ይኸፈት

 ራዕዳዊ ህወሓት ንህዝቢ ትግራይ ብደረጃ ኢትዮጵያ ክፅላእ ብምግባር ኣብ ጎኑ ብምስላፍ ዕድመ ስልጣኑ ንምንዋሕ ‘ዩ ዝሰርሕ። ስለዚ ህዝቢ ትግራይ ኮነ ካልኦት ህዝብታት ኢትዮጵያ በዚ ከይተታለሉ ምስ መንግስቲ ፌዴራል ጠጠው ብምባል ኣንፃር እቲ ጉጅለ ክቓለሱ ይግበኦም።

ህዝቢ ትግራይ ብሰንኪ እዚ ጉጅለ እዚ ብልምዓትን ፍትሕን ዝተጎድአ ህዝቢ ‘ዩ። ካሊእ ይትረፍ መሰረታዊ ድሌታት ዝኾነ ፅሩይ ዝስተ ማይ’ውን የብሉን፤ ብጣዕሚ ዝተጎድአ ህዝቢ ‘ዩ። ኣብዚ ሐዚ እዋን ድማ ብምኽንያት እዚ ኩናት እዚ ደቑ ዝስእን ዘሎ ከይኣኽሎ ብሕፅረት መድሓኒትን ምግብን ይመውት ኣሎ ‘ዩ። ብፍላይ ኣብ ህፃናትን ኣዴታትን ዝኸፍአ መከራን ስቓይን እናበፅሐ ‘ዩ። እዚ ዝኾነ በሰንኪ ራዕዳዊ ህወሓት ጌጋ ውሳነ ምዃኑ ክፍለጥ ኣለዎ። ጌጋታት ህወሓት ንህዝቢ ትግራይ ዋጋ ኣኺፊሎሞ’ዮም።ማሕበራዊን ኢኮኖሚያውን ቅልውላው ንክበፅሖ ኮይኑ’ዩ። ስለዚ መበገሲ እንቲ ፀገም ዓይኑ ኸፊቱ ክርእይን ክምዝንን ኣለዎ።

ቐዳማይ ሚኒስትር ዶክተር ኣብይ ኣሕመድ ኣብ ዝሓለፈ ሰንበት ካብ ጌጋታት ህወሓት ትምህርቲ ዝወሰደሎም ኢሎም ካብ ዝጠቐስዎም ሽዱሽተ ጌጋታት፣ እቲ ጉጅለ መከፋፈሊ ሓሳብ ዘለዎ ምዃኑ፣ ፅልኢትን ሌብነትን ንዓብይ ስዕረት ዘብፅሕዎ ከምዝኾኑ፣ ከምኡ ‘ውን ለውጢ ምስ መፀ ብተደጋጋሚ ናይ ይቕረታ በሪ ተተኸፈተሉ ‘ውን ብዕድሉ ተጠቂሙ ናይቲ ለውጢ ጉዕዞ ምሕዋስ ከምዘይኻኣለ፣ኣብ እዚ ሰሜን ዝፈፀሞ መጥቃዕቲ ህዝቢ ንከቆጥዕን ብሓደ መንፈስ ንክዘምት ምግባሩ፣ ጉዕዞ ቁልቁለት ኾይንለይ ኢሉ ናብ ኣምሓራን ዓፋርን ምእታው ጌጋ ውሳነ ምንባሩ ገሊፆም’ዮም። እዞም ጌጋታት ህዝቢ ትግራይ ከቢድ ዋጋ ንክኸፍል፣ትግራዋይ ንክመውትን ንክመዛበልን ዝገበሩ ጌጋታት’ዮም። ስለዚ ሐዚ ካሊእ ጌጋ ንከይፍፀም ምጥንቃቕ የድሊ። ህዝቢ ትግራይ’ውን እዞም ጌጋታት ክርዶኦምን መንገዲ ጥፍኣት ምዃኖም ፈሊጡ ኣንፃር ህወሓት ተሪሩ ንምቅላስ ዓይኑ ክኸፍት ኣለዎ።

 መንግስቲ ናብ ክልል ትግራይ ዘይንኣቱ ካብቲ ጉጅለ ጥፍኣት ስለዝተምሃረ ከምዝኾነ ገሊፁ ኣሎ። ካብዚ ብተወሳኺ ድማ ክሲ ብምቑራፅ ኣብ ኩናት ዝተረኸበ ዓወት ኣብ መድረኽ ሰላም ንምድጋም እናሰርሐ’ዩ። ኣብዞም ውሳነታት ራዕዳዊ ህወሓት ግጉይ ገምጋም ወሲዱ ካሊአ ጌጋ እንተፈፂሙ ከቢድ ኪሳራ ክበፅሖ ምዃኑ ክፍለጥ ኣለዎ።

እቲ ውሳነ ግና ንኢትዮጵያ ዝጠቅምን ንዘላቒ ረብሓ ዝሕግዝ ኣብ ኹናት ዝተረኸበ ዓወት ኣብ መድረኽ ሰላም’ውን ንምድጋም ዝሕግዝ ‘ዩ። እዚ ከይዲ ግና ካሊእ ትርጉም ተዋሂብዎ ራዕዳዊ ህወሓት ካሊእ ጌጋ ከይሰርሕ መንግስቲ እናጠንቀቐ ይርከብ።ህዝቢ ትግራይ’ውን ድሌት መንግስት ፈደራል ተረዲኡ ዓይኑ ኸፊቱ ራዕዳዊ ህወሓት ክርደኦን ንራዕዳዊ ህወሓት ክቃለሶን ይግባእ።

መንግስቲ ዝተወሰኑ ሰባት ክሲ ምቁራፁ ይቕረ ምባል ብሰዓራይነት ዝተረኸበ ፀጋ ስለዝኾነ’ዩ።ኮይኑ ግና እዚ ከም ድኽመት ወይ ካሊእ ነገር ወሲዱ ራዕዳዊ ህወሓት ካሊእ መበል ሻውዓይ ጌጋ ውሳነ ከይውስንሞ ንህዝቢ ትግራይ ተወሳኺ መከራ ከየምፀአሉ ምጥንቓቕ የድሊ።ህዝቢ ትግራይ’ውን ንዚ ተረዲኡ ንራዕዳዊ ህወሓት ይኣኽለካ ክብሉ ይግባእ።

ህዝብታት ኢትዮጵያ ኢትዮጵያ እንትትንካእ ኹሉ ኣጀንድኦም ገዲፎም ሕብረት ብምፍጣር ኣብ ሓደ ጉድጓድ ሞይቶም ናፅነት ኢትዮጵያ ከምዘፅንዑ ኣብ ዝሓለፉ ውሑዳት ኣዋርሕ ካብ ማንም ንላዕሊ ራዕዳዊ ህወሓት ትምህርቲ ወሲዱ ‘ዩ። ራዕዳዊ ህወሓት ንህዝቢ ኢትዮጵያ ክኸፋፍልን ጠጠው ከብልን ከምዘይኽእል ምግንዛብ የድሊ። ንህዝቢ ኢትዮጵያ ዳግም ብምንካእ ሻውዓይ ጌጋ ንክይፍፅም መንግስቲ እናጠንቐቐ ይርከብ። እዚ መጠንቀቕታ ኣብ መዓላ ክውዕል ኣለዎ።ተዘይኮይኑ ግና መንግስቲ ዘየዳግም ስጉምቲ ክወስዱ’ዩ።

ህዝቢ ትግራይ ኣብ ዝሓለፈ ሓደ ዓመት ብኢኮኖሚ፣ ዲፕሎማሲ፣ ፖለቲካ ዓብይ ጉድኣት በፂሕዎ ‘ዩ ፣ ሐዚ ዓይኑ ምኽፋት ዘለዎ እዋን ‘ዩ። ህዝቢ ትግራይ ‘ውን ዓይኑ ንክኸፈት ሓደራ ክንብል ንፎቲ።

5 ጥሪ 2014 ትሕዝቶ ጋዜጣ ወጋሕታ