- Nama kabajuun mallattoo sodaa ykn lugnummaa osoo hin taane, bilchina sammuu fi dandeettii fageessanii yaaduuti!
- Tattaaffii jireenya kee fooyyessuuf taasiftu keessatti kufaatiiwwan simudatan kufaatii osoo hintaane, akeektuu milkaa’ina tattaaffii keetiiti!
- Addunyaa tanarratti harreen akka namaatti yaadu jiraachuu baatus, namni akka harreetti yaadu hindhabamu!
- Akka addunyaatti yaadii, akka naannawaatti hojjadhu!
- Dhalli namaa wanta haaraa argannoodhaan yoo uumu (kalaqu) kan nama gammachiisu yoo ta’u, garuu ofiisaatii uumamuu (kalaqamuu) yoo irraanfatu immoo kan nama gaddisiisuudha!
- Kan nama qaanessu ba’aa guddaa sammuurratti baachuu osoo hintaane, sammuu hin yaanne baachuudha!
- Yoo rakkoon wayii si mudate waa’ee rakkoo si mudatee sanii yaaduu osoo hintaane, akkaataa rakkoo simudate san keessaa itti baatu yaaduu qabda!
- Osoo dhugaan kophee hingodhatin, dharri addunyaa naannofti!
- Mucucaattee dugdaan yoo kufte balleessa ta’uu hindanda’u, balleessaan kee ta’uu kan danda’u kuftee yoo achitti hafteedha!
- Walbeekuurra, walii beekuu wayya!
- Bishaan kadhaan argame dheebuu nama hinbaasu!
- Sareen yeroo hunda duttu akka hinbirmanneef of gooti!
- Kan nama nyaatu dukkana osoo hintaane, wanta dukkana keessa jiruudha!
- Irra caalaatti kan dinqisiifatamuu qabu namoota addeessarra qubatan osoo hintaane, namoota akkaataa isan addeessarra itti qubatan barsiisaniidha!
- Addunyaan tun sirraa waan tokko eegdi waan ta’eef, waan gaarii tokko hojjadhu!
Maddi: Barruu ayyaana waggaa 50fa Mana Barumsaa Caboo Wancii sababeeffachuun qophaa’e
Charinnat Hundeessaatiin
Gaazexaa Bariisaa Hagayya 18/2011
