Otoottote furcho birxichi kaansere maati? yitanno xa’mo aana otoottotenna godowu gato xagisaanchi hattono dagoomu fayyimmate ogeessi dokter Hizqieel Pheexroosihu xawisanni; otoottote furcho birxichi kaansere yaa otoottote aana kalaqantanno rosantinokki mannimmate seella batiraati.
Kaansere mannimmanke giddo noo seella bikku aleenni bati’ranna lopha hanaffanno woyite wole mannimmake kifillara fincantanno yannara kalaqamanno dhibbaati.
Dhibbu kalqoomu deerrinni meentu aana kalaqamanno kaanserete daninni unuunu kaanserenni aane layinki deerra amadanno.
Otoottote furcho birxichi kaansere dhibbi “Human Phaphiloma Virus” yinanni illete leeltannokki seelenni kalaqamanno dhibba ikkinota dokter Hizqieeli xawisanno.
Vayiresetenni amadantino mannooti dhibbunni amadamansa affukkinninna malaatu leellikkinni 10 – 20 diri geeshsha heedhara dandiitanno.
Dhibbaho kaimu anje dirinni siimu xaadooshshe hanafa, babbaxxino labballi ledo siimu xaadooshshe assa, batinyu meenti ledo xaadooshshu noosi labbaahu ledo siimu xaadooshshe assa, sirote bisi dhibbinni amadama, mannimma dhibba gargadhate dhuki ajanna wolootta amadantino korkaatta ikkansa dokter Hizqieeli xawisanno.
Malaatta:
– Rosantinokkiti mundeete du’nama
– Badhete, sarawatenna luqqeettote xisso
– daafuro
– Sagalete hasatto aja
– Meyaate sirote kifilenni fulannohu Rooze, bunu dana woyi mundeete dana afi’rinohu, foole afi’rino du’namaancho labbino malaatta la”ate kaayyo hee’rase ogeessu kayisino.
– Otoottote furcho birxichi kaanse kittiwaatetenni gargadha dandinannita xagisaanchu lede huwachishanno.
Gargarooshshu doogga
– Ammanamanna mittu labbaahu mitte meyaa ledo calla bikkama;
– Anje dirinni siimu xaadooshshinni qorowama;
– Siimu xaadooshshe hanafino meenti uurrinshunni otoottote buuxo assi’ranna kondome garunni horonsi’ra, otoottote furcho birxichi kaansere gargadhate hasiissannota dokter Hizqieel Pheexroosihu egensiisino.
Qiddist Gezzaheny
Bakkalcho Woxawaajje 16, 2016 M.D
