Addis Ababa:- Sidaamu qoqqowira tayxe dirinni 20 miliyoone ale dagatenna mootimmate jajja hafanfarannokki gede gargara dandiinoonnita Qoqqowu Amanyootunna Tsere-mussinnu komishiine egensiissu.
Komishiine, 2016 baajeettete diri mixote gumulshanna 2017 baajeettete diri mixonni illacha tunge loonsanni handaarra lainohunni hajo la’annonsa bissanni ledo torbitino.
Qoqqowu Amanyootunna Tsere-mussinnu komishiine komishiineritte dukko Zelaalem Lemma barete aana assitino hasaawinni; sai 2015M.D loossa yannara xaaddino foonqe tiratenni konni gumulami dirinni woyyaawa loossa gumulloonnita xawissino.
Mootimmate baajeette yinoonni illachira hossanno garinni hanafamino haaru baajeettete dirinni garunninna xa’mamaanchimmatenni horoonsi’ra agarrannita huwachishshino.
Gumulamihu 2016 baajeettete diri mixote gumulshinna 2017M.D massagote mixono barete shiqqeenna hasaawa assinoonni.
Komishiine ilama bainchu assootubbanni co’itte ikkitannonna danchu amanyootinni quxantanno gede illachiishshe loossannotano xawinsoonni.
Ilama danchu amanyootinni suwinse lossateno mootimmatenna hallanya tuqu xaadooshshuwanni ledo Komishiine qinaambe loossanni noota xawinsoonniha ikkanna; xaa geeshshano babbaxxitino hayyo horoonsi’ne dagoomaho huwanyoote kalaqa dandiinoonnita kulloonni.
Jiro garunni egensiisa, borreessiisanna xawadimmamma xambe kaajjishatenni hattono halaalaanchimma buuxisiisate ragaannino tayxe dirinni gummaamma loossa gumulloonnita barete xawinsoonni.
Gumulamihu 2016 baajeettete dirinni xaphoomunni 508 qummeessi shiqinoha ikkanna; konninni, 20 miliyoone, 458 kume 942 birranna 59 saaante mootimmatenna dagate jiro hafanfarretenni gargara dandiinoonnita kulloonni.
Gaazeexu Odeessaanchinni
Bakkalcho Woxawaajje 2, 2016 M.D
