![](https://press.et/bakalcho/wp-content/uploads/2024/05/guulcho-880x421.jpg)
Manchi beettita luphi yitino ayimma hasaawisinni sae assootisinni xawinsanni. Kuni hasaawunnihuno ikko assootu gumi qole meessinni sae wolootu heeshsho aana eewaanchonna hi`naancho xiiwo kalaqanno. Konninnino manchi beettira hagiirrunniha woy shettote bue ikkitara dandiitanno haammata hedeweelchubba la`noommo.
Korkaatuno danchu manniwiinni fulanno qaali hiiqqamino wodana sissannanna hexxo cu`mishiishanna la`nummonte gede; dancha ikkinokki qaali manchi beettita ajuujanna hexxo tunsiisanna la`noommo. Assootuno hattoonti. Danchu assooti manna hagiirsiisanna, bunshete assootino manchi beetti barranna harunsanno doogo diigannanna iillate hasi`rannowiinni gufisanna la`noommo.
Manchi beetti qole woyyinoha doodha; umisirano woloottahono injiitanno doogo harunsa kaaliiqi uyinosi luphi yitino yawootinna gadachosiiti. Konni daafira bunshentenni roore danchummanna shooshanqe qaalunnino, assootunnino doodhanna iso gumula manchi beettiwiinni agarranni mannihimmate xawishsha ikka noosi.
Techo gobbate gede yaachishshannonketi haammata hajubba heedhurono; hakkuri yaachishshanno coyubba hendeemmokki gede assitannonketi baca assootubbano noonke. Baxxinohunni manchi beetto ikkine mannu gede manchi beettira iillate assineemmo wo`naalshubba lowontanni hexxo uyitannote; daganke hindiiddono fiite osolunni soorritannote.
Konni ragaanni dancha fajjo owaantubba kullannite. Dancha fajjo yaa mitto looso gumulate ayee kakkaishsha, xiiwonna gadacho agarrikkiinni, meessi kakkaooshshinninna hasattonni ikkitino hajo gumulate ka“ate. Kuni kakkaooshshi qole loosu widira massagannonke. Ikkinohura dancha fajjo loosi uminke giddoyidi kakkaooshshinni woloottaho assatenni xawinsanniho.
Baxxinohunni ninke gobbara addi addi quchumma giddo leeltanno luphi yitino dagoomittetenna miinju qarri noonsa dagoomu kifilla noowa; konne lawino dancha fajjimma aana safantino owaante uyitara dandiitanno hagiirre huwatate sa`u ontenna lee dirraha dancha fajjo owaante loossa qaaga calla ikkadote.
Tenne dirrara gobbate massagaanonni kayise haammata wodanaamma danchummatenni loosse, dhukiweelo geerra, bisu xe`ne noonsarenna kaa`lannoha hoogginore towaatatenni dadillensanna yaaddonsa hagiirru widira soorra dandiitino. Hexxo mudhate heeshsho giddoni fushshite towaatamansanni oso`litanno gede assitino.
Lawishshaho, kuri dancha fajjaaleeyye buxanete mine gatamarte, ijaarsiteno qiidunna xeenunni gatissinonsa; mundee uyite, mundeete hoonginni ba`anno lubbuwa woxxitino; rosu minnara furduggi yite rosaanote rosate hasatto latissino; holgensa e`e dagansa itte galtanno gede assitino; hurre yortino dagansara hurrensa korkaata ikkitino.
Baxxinohunni soorrote mootimma kawa ayirradu Xaphoomu ministirchi Abiy Ahimed (D/r) kakkaishshinni hananfoonnihu dhukiweelu mine haaroonsatenna gatamarate hawadi dancha fajjo loosi harinsho; quchumu deerrinni kakkaooshshe kalaqqino; qansootu beeqqono lossinnona dureeyyete wodanano konni danchu assootira karsantanno gede kakkayisannoha ikkino.
Kuni loosi kaajje sufeenna techo tonnu kuminni kiirranni mannooti minu ayidde ikkitino. Hindiiddonsa feyaanteennano hagiirrunni wo`mitino.
Ale Federaalete deerrinni hananfoonni buxanate minna ijaaranna hoongensa diwate assinanni hawadi danchummate loosi eeli baadiyyete geeshsha itiichamino. Baadiyyete towaatannonsaha hoogge buuyyote mini xissanna hawado daannokki gede huuccatto assidhannori mininsa ijaarameenna keeru goxicho goxa hanaffino. Xaano ikkiro duuchanka iillinoonni yaa dikkitino.
50 loome mittu manchira duhanoho. 50 manchira seesaho. Halammummoro buximate ilaala diinge dadillitinonna hindiiddidhino ille hagiirrehonna galataho soorra dandiineemmota konni sai lewu diri giddo buunxoommo.
Ikkinohurano konni garinni leeltinoti dancha hanafo kaajjitara, qansootu shettonna mitiimma gattanno gede, hindiiddonna yaaddo hagiirrunni soorrantanno gede assa danchu wodani noonsa mannooti xawishshaati. Ikkinohura ninkeno qansichu gede konni garinni umonke xawisa hasiissannohura; hawadi dancha fajjo owaante harinsho giddo qeechanke baraasatenni qarru giddo heedhanno daga hindiiddo feyaatenninna qarransano beeqqa hasiissanno.
Bakkalcho Onkoleessa 22 , 2016 M.D