Hawaasa: Islaancho roso qansichaho yaanno uminni rosaanote rosi guma woyyeessatenna rosaano rosu minira eessate hajo la’annonsa bissa noowa qoqqowu rosu biiro millimillote bare ha’risssu.
Woxawaajje 4/2013 M.D Hawaasa ha’rinsoonni millimillote barera afame afii fa’note hasaawa assinohu Sidaamu Qoqqowi Mootimma Pirezidaantichi Kalaa Dest Ledamohu, techo kalqenkera miinjunna politiku ikkadimmanni lophitino gobbuwara kaimu rosu polisensa ikkase kule, gobbanke Itophiyaahono ikko Sidaamu Qoqqowira egennaammanna ikkadimma noonsa qansoota kalaqate deerru deerrunkunni noo
massagaanonna dagoomu kifilla insawiinni agarranni qeecha fula hasiissannonsa yiino.
Wole widoonni millimillote boortaaje shiqishinohu qoqqowu lay/pirezidaantenna qoqqowu rosu biiro sooreessi Kalaa Beyyene Baraasihu isi widoonni, xa leeltannota rosu gumaamimma foonqe taashshate baalunku halame loosa hasiissanno gede xawisino.
Ledoteno Kalaa Beyyene, ikkado, egennaammanna heewisamaano qansoota qoqqowunna gobbate deerinni ikkitannore kalaqate islaanchimmasi agarantino roso rosaanote tuqisa agarrannita coy’re; konnirano babbaxxitino eubba wonsha (uduunne), rosu minna gatamaranna haaro rosu kifilla mina, mannu wolqa wonshanna labbannori aanino dirira rosaanote guma gotti assate agarranni loossa ikkase co’yrino.
Sai rosu dirira 1-12 kifile geeshsa borreessantanno yine agarroonni mixo giddonni 90 anga ale jeefisate dandiinoonnita qummeesse; 2014 rosu diro mitte miliyoone sase xibbe ontayna sette kume; onte xibbena ontayna lamala(1358557) rosaano haa’ne rosiisate qoqqowu deerrinni mixi’noonniha ikkanna balaxotenna gaamaareeyyete rosono kaajjinshe loosa sufantanno yiino. Rosaanote guma woyyeessatenna rosu iillo halashshate dagate beeqqo luphiima ikkase kayisinohu kalaa Beyyene daga mangiste loossanno rosu loosira hale ikkatenni uminsa qeecha fultanno gede sokkasi sayisino.
Battalate beeqqanonnino qarrubbate gede caabbichu, waay, rosaanote barcimi, rosiisaanote anjenna labbanno hajubba aana xa’monna hedo shiqqeenna qoqqowu pirezidaantichi Kalaa Dest Ledamohunninna qoqqowu layinki pirezidaantenna qoqqowu rosu biiro sooreessi Kalaa Beyyene Baraasihunni dawaronna xawishsha uyteenna bare gumulantino.
Addisu Adoola
Bakkalcho Woxawaajje 6, 2013 M.D
