Mii’na ji’la budenkeeti. Ille suusa la’a manchi beettira qara coyeti. Mittu manchi hedeweelcho reyaanno woyte “adhino? Ilino? yitanno xa’mo suffanno. Adhanna adhama kalaqamu eltooti. Adhine ille ciira kaaliiqi fajjooti ikkinniina manchu fajjosinni aannorenna qahannore dikkino.
Ille ciirate,suusa la’ate,ilama sufate kayinni balaxannohu adhanna adhamate budeetinna balchoomaati. “Beettokki beetti’yara” yaanno Sidaamu. Tenne yaatto macciishsheemmo woyte urchi’ya hagiidhanno. Ayiraddo budenkeetina!
Tenne borronni adhanna adhamannnire odeessate dikkino. Adhanna adhamate guficho ikkanni noore kayisateeti. Adhinanninna adhammannihu baxillunni ikkiro faayyaho yine Ontu adhammete budi giddinni “dii’ro” bushu rosichi widoogge gaammoonni. Kunino baxillu nookkiha ikkasinni labbaahu callu baxe meyaa beetto guuta fajjo nookkiha kalaqamanno mine ikkinohuranna meyaa beetto buqqee aana gawajjo kalaqanno daafira. Hattono raggete adhamme budino gatanni dayino.
Ikkina;adhanna adhama ittisanni noori maatiyya? yitanno xa’mora saibbo mine ikkitinota seenneno wedellano hasaawinsoommo garinni afate dandiinoommo. Mitu mitu hasaawinsoommo seenni saibbo miine baxilleho ataawe ikkinota coyidhino. Wedelluno hattonni. Saibbo miine gatisate Sidaamu budu geerri diro qaaga hoogummorono Alatta wondo torbe qaale fushshinota qaageemmo. Saibbo miine miinnannikki gede rumino yaate. Hakku qaali hiikkeenna techo miine 50 kuminni kayise 2 xibbee kume iillituyya? Hoola halaaleho!
Ninkeno budu geerra hakku fushshini qaali hiikkiyya? yine xa’mate wo’naalloommo. Hasaawinsoommori mereerinni budu geerchi Shaambel Belayinna Shambel Goddeewo Gurraachihu;saibbo miinenna darbamino jili dagoomu aana iillishshanni noo hekko shotu garinni la’’nannikkita ikkase xawisse; Saibbo miinenna bikku ali jila gargarate geerru ruminota qaagiissitino. “Ikkollana;mannu geerru qaale maccishsha hoogatenni gawajjamanna shete geerru wirro male qaale hoolino” yaano rumo kayisino yaatenni xawissunke.
Rumo kayisa danchate;jilunna miine darbantu gede ilama darbantannokki gede assa busullete. Kayinnilla heeshshote oolto umisenni darbitino yannara heewisamanna hettisama didanchate. Eweli beetto kageeshshawe wortu;ewelitino hottanni;anetina mayinni ajje?! yitanno heewo, “heewote mini cufamikkinni galanno” yinannihu gede assitankekka yitanno huluullo galtinoe.
Shiimu hee’re baadiyyete adhanna adhammete jila bacawa beeqqoommo. Ama’ya waasa cuukkite ji’lihu minira haadhe hadhanna;ji’lihuno dandaamisi garinni booto gorreenna diriirsinoonni hookkichi aana olluunni dayino cuukkamino moolu waasira Waco ganne koottalo maala worreenna gamba yine intanna laoommoti techo hakko diri higoommero yitanno halcho gashshitannoe. Xa budu gobbaanni ikkinore tiyyi’ne giwa hasiissanno. Konne Sidaamunniha ha’nura bude,ji’latenna mii’nate amanyoote halaaliwa qollo.
Bikku ali jila ji’le duree’minohu dino. Saibbo miinenni ijaadhinohuno hattonni. Hoowe wonshi’rinohuno dino.
Xa geerru rumo kayisino yine hasi’ni gede ikka dagitte heeshsho aana hekko kalaqqino. Kuni ayirano maaxaminoha dikkino. Ofolline malanna amaalama doorshu nookki hajooti.
Yaareed geetaachew
Bakkalcho Badheessa12, 2016 M.D
