Itophiyaho hundinni hanafe gobbansa horo ayirrisiisate bacu meenti mundeensa dunino; miqichonsa butukkino. Konninni saeno lubbonsa hoogginori haammataho.
Albi yannara noo meenti baatino waagi bikkinni ayirrinye diuynoonninsa. Batinyu dagoomuwiinnino ikko mootimmatewiinni afamishsha afidhukkinni sa“ansa dideamanni. Kuri kaajjuuddu meenti dhagge kayinni xa noo ilamara tareessitino yaa didandiinanni. Meentuno konne naaxxisanno assoote lawishshu gede horonsi`ranna la“a dirosantino.
Ikkolla ikkinnina dagoomu giddo meentu gobboomu qeellera beeqqitinohunni hattono lawishsha ikkitara dandiitannore kaajjadda meento kaysatenna ayirrisantenni roore mini giddo loonsanni loosi yawo adhate aana calla illachishshino hedubba ka`anni leeltanno.
Gobbansara yite kakkalantino kaajjaddu meenti dhagge naada hasiissanno. Meentoho lawishsha ikkitanno dhagge noonsa meento qaaga kaa`litanno. Sidaamu daga giddono Furra meentu biilo addintanni naandanni bareedaati. Insa gedeere techo su’minsa maafaminore xawo fushshine bokkeessa tini ilama ku’litanno qaaggo ikkanno. Sanu sanunni umise bareende afidhino meyaa beetto no. meyaati iltenna sirte bareedate. Maltenna falte busulete;minese amadde hattonni. Konniraati meyaata diro calla agarre ikkikkinni barru baala qaanganninsa hale ikka hasiissannohu.
Meyaatera kaaliiqi kalaqamunni uyinonsa duhani noonsa. Kunino godobbe ilanna ilte qansite. Konni duhani aana konne meentu barra ayirrinseemmo woyte ajay ajeenna Manchu beetti babbade kalaqinonna uyinonsa duhana irkisanna kaa’la,beeqqa hasiissanno.
Albi yannara meyaa beetto roso rosiisa dihasiissanno yite ammantanno dagoomu kifillanni fulatenni rosinsanninna loosinsanni gummaamma ikkino meento xaa ilamara lawishshu gede shiqisha hasiissanno.
Gobbankera nooti filmete iillaano filmensanni meyaa beetto ayirrinye kissanno coyibba dagoomaho sayissankunni, kaajjadu meenti dhagge hattono kalqete sayisa noonsa. Kaajjuullu meenti assootenna dhagge ilamate sayisate baalanti dagoomu kifilla qeechansa fula agartanno.
Konni ledo amadisiisaminohunni filmete iillaano filmensanni, sirbaano kiironsanni, misilaano misilensanni Itophiyu kaajjuuddu meenti dhagge qagiissa gobboomu yawonsa ikkitara hasiisanno.
Itophiyaho xaa yannara meento lainohunni luphiima soorro daggino. Meento babbaxxino billoonyi aana ofollinore la“a hananfoonni. Meentu ammantino doogo harunsatenni uminsa heeshsho massaga hanaffino.
Rosu mine, loosu mine hattono babbaxxitino gobboomu hajubba aana beeqqaano ikka dandiitino. Konninnino ledotenni meentu bobbahino handaarinni ikkado, kaajjadonna yawo adhite woyyino looso loosannota farcishiishi’ra hanafino. Babbaxxitino ogimmate handaarranni gummaammanna eewaancho xiiwo kalaqanno meenti wolootta insa haruma harunsitanno gede kaa`lonna irko assa hasiissanno.
Poletikunni, bizinesetenni, loosu kalaqonna babbaxxitino ogimmate handaarranni kalqete gumaammaho yinanni meenti kiiro lowontanni haammattanni daase kullanni.
Itophiyaho muli yanna kawa baca loosu handaarra aana meentu beeqqonna qeechi gotti yaanni daynoha ikkanna seyoonsano hakko bikkinni lexxitanni afantanno.
Kalqoomu meentu barra korkaata assatenni meentunni calla massagamanno Itophiyu diilallote doogo buuwisaanote gaamo diru dirunkunni buuwissaanno. Tini jawa kaayyoti. Ga’ano sai dirira Itophiyu Horophilu doogo uyitino kaayyo leddanno yine agarreemmo. Ninke kawaanni keere buubbe higgara halchineemmo.
Hiikki manchino gumaamo ikkate umisi wo`naalshubba gadacho ikkiturono maatete, dagoomunna seyoote doogo aana noo hallanyooti irko hasissanno meyaata jawaachishate.
Xaa yannara haammatu meenti babbaxxitino gobbate kifillara loosunna rosu aana afamannoha ikkasinni hanafonsa gafa gantanno gede irkisa hasiissanno.
Meyaa beetto seyoora umise wo`naalshinna jawaante qara ikkiturono; maatetenna woloottu mannooti kaa`lo qole roore seyoosera kaa`litanno.
Baadiyyete Itophiyu kifilera hee`rannori haammatu meenti coyibba injitinokki akati giddo ikkite seyoote wo`naalsha assitanna wodanchinanni. Ikkinohurano babbaxxitino loosu handaarrarano ikko rosu aana afamanno meentira baalinke kaa`lo hasiissannonsa.
Meentunniha duuchu handaari beeqqo lossate labballu kaa`lo, maatetenna dagoomu irko roorenkanni qole gummaamu meenti irko hasiissanno. Hawalle iillishinke iillishi’ne. dancha ayyaana!
Abbebech Maatewoos
Bakkalcho Ammajje 28, 2016 M.D
