Addis Ababa:-Mereerimu Sidaamu zoonera haammata latishshu loossa loosantanni afantannota zoonete gashshooti xawisi.
Mereerimu Sidaamu zoone gashshooti sooreessi kalaa Mengistu Maatewoos xawisino garinni; seeda yannara dagate danchu gashshooti xa`mo ikkite keeshshitinota latishshu hajubba tirate mootimma mixidhe loossanni no.
Zoonete qaru quchumira Yirgaalamete sa“ateno ofollateno injaannokki qooxeessa quchuma e’nanni faro biifisate 26 miliyoone ale fulo assine loonsanni hee`noonnita zoonete gashshaanchi kalaa Mengistu egensiisino.
Qoqqowo ikkinihu kawa qooqowu deerrinni hattono mereerimu Sidaamu zoone giddo hammata latishshu loossa loosantino yiinohu gashshaanchu; Yirgaalamete quchumira seesallichu kinchinni giddoydo biifisate kobilistoonete doogo loonsanni hee`noonnita xawisino.
Tayixe diro seeda yanna ba`e keeshshitinota asfaaltete kolishsho doogo hanafisiisate wo`manta maashiine eessinoonnino yiino.
Doogote latishshi xa`mo dawarate Wonshi woradi giddo noo doogo baxxino garinni Bookkasinni Daweele, Yayye, shaafaamo wola iillitannoti doogote piroojekite lamewa ta`e keeshshitino zoonna xaadissannota ikkase kalaa Mengistu coyi`rino.
Doogote widoonni illacha tunge hala`lado looso loonsanni hee`noonni yiinohu kalaa Mengistu; muli yanna giddo care tungeenna maassantannotinna bushsha tunganniti haammata doogga noota xawisino.
Kalaa Mengistu; seeda yanna dagate xa`mo ikke keeshshinohanna to“e daga lamewa taysinoha Hanxatete Duguni buusa mootimma 43 miliyoone fulo assatenni loossanni afantannota xawise; xibbuunni 75 anga loosaminotaati coyi`rinohu.
Loosantanni noo doogga ollaa olluunniwa daga daganniwa worada woradunniwa, xaadissanno yine hendannitano xawisino.
Kalaa Mengistu amadisiiseno; fayyimmate handaarinni fayyimmate mereersha biifisate gatamaratenna amuwu fooliishshi`ranno mine loosatenni hala`lado looso loonsoonni yiino.
Baxxino garinnino mulu xisso afidhino qansooti kiiro Sidaami giddono lowo geeshsha lexxitanni harasenni dayilesiise assate lowo injoo nookkita, hallanyootunniwa xagisi`nannitanna woxu hoongi korkaatinni minesi reyaannota xawise; konne looso hanafisiisate xibbuunni 80 anga ale maashinna wo`naalshu looso qeelle hee`noonnita hattono okisijiine laashshate looso loonsanni afammannita egensiisino. Sidaamu giddonna gobbaanni noo fayyimmate uurrinshuwarano tuqisa dandiinanni kaayyo heedhannota lede buuxisino.
Rosu hiiqqamme sissate hundinni kayinse woyyeessanna haaroonsa hasiissanno yiinohu zoonete gashshaanchi kalaa Mengistu; mootimmate loosaasinenna dureeyyete kaa`lonni sasunku woradira daaimu rosi minna loonsanni hee`noonnita xawisino.
Sagalete wowe buuxisiisate baxxinohunni saadate sircho woyyeessate widoonni gibirinnu looso loonsanni hee`noonni yiinohu gashshaanchu; barrunni 3000-4000 geeshsha quuphe qalanno lukkuwa ce“a dandiinoonnitanna maatete jireenyi loosi mannu heeshsho soorratenni sae dikko shiqishate hattono dikko ge“isate umisi qeecha fulanni nootaati coyi`rinohu.
Zoonete deerrinnino xaa geeshsh 800 kume meddi yaanno lukkuwa daganniwa iillinshoonni. 1.5 ale ikkitanno goodannano daganniwa iillishate mixo amandoonni yiino.
Jeefoteno quchumahono ikko baadiyyete seeda yannara xa`mo ikke keeshshinoha danchu gashshootinna latishshu xa`mo qolate mootimma hashsha barra illachunni loossanni noota kalaa Mengistu lede huwachishino.
Abbebech Maatewoos
Bakkalcho Ammajje 21, 2016 M.D
