Abrahaam Saamueel
Hawaasa:- Tayxehu goyi’rete yanna loosinni 83 kumi heektaare baatto qara qara wixinni qoqqowu deerrinni mixo amande loonsanni hee`noonnita Sidaamu Dagoomi Qoqqowi Mootimma Giwirinnu Biiro egensiissu.
Biirote sooreessi Kalaa Mesfiini Qarrehu baxxinohunni Bakkalcho gaazeexi ledo assinno hasaawinni xawisino garinni; tayxehu goyi’rete loosinni 83 kumi ali heektaare baatto dooramino wixinni wixate mixo amande loonsanni hee`noonniha ikkanna, xaa geeshsha xibbuunni 64 anga woy 53 kumi heektaare baatto qaru qaru gidinni diwate looso loonsoonnita xawisino.
Tayxehu goyrete loosi badheessi yannara xeenu anjenni gawajjamino gide wirro riqiwate jawaante loonsannita kulinohu Kalaa Masfini; hasiisannoha bushshu madaabara, dooramino wixanna shiqqino giwaate garunni horoonsi`niro 7 miiliyoone ali kuntaala laalcho afi`rate mixo amande loonsanni hee`noonni yino.
Badheesi yannara badalatenna wahete gidinni 63 kume heektaare baattora laashshine 3 miiliyoone ali kuntaala afi`rateeti mixo amandoonni. Konni giddonni 59 kume ale ikkitanno heekitaare baatto wixunni diwate dandiinoonnita kulinohu sooreessu; Badheessi xeeni tatta”anni dayno daafira 24 kumi heektaare badala, 3 kumi heektaare wahenna lowo gidi gawajjaminota xawisino.
Mekaanayzeshinete tiraakteretenni 7 kumenna 200 heekitaare hasiisannoha bushshu shiilo horonsi’ne dooramino wixinni diwate looso loonsirono, xeenu anjenni ikkado guma afi`noonnikiita kulinohu sooreessui; konne wirro riqiwate goyrete loosonke kaajjinshse sufatenni gawajjo iillitino woradda baxxino garinni irkinsanni hee`noommo yino.
Gammoojjaame, diilallonna moolletenni afantanno woradda Haweela Tuula, Haweela Liida, Hawaasi gaangaawi, Borrichu, Daraaru, Bilaatte Gaangaawi, Lokka Abbaayyu, Daalle, Daarra, Alatta Cuukko, Booni Gaangaawi, Bansi, Cabbenna Hookko woradda badheessi yanna gidi xeenu anjenni takko baino woradda ikkitinota qummi assinohu kalaa Mesfini; kuri tenne woradda wirro irkisate qoqqowu deerrinii 17.6 miliyoone birra gaamme rahe iillanno laalcho laashshate 1 kume kuntaala wahe, 900 kuntaala gaashe, 10 miiliyoone maxaaxeessu kutta hirre bebbenkoonnita xawisino.
Dooramino wixi anje noohura laalcho ajishanno yine hendiro nafa tayxe mixi`noonni mixonna laalcho afi`rate baxxinohunni goyrete yannara noo xeenni addintanni woyyaawinoha ikkinohura, dagankeno ikkadu garinni qajeelshine loosu widira e`noonnihura gumaamma ikka dandinannita kulino.
Goyi’rete yanna gidi aana gawajjo kalaqqanno da`muulla, waage, duuxunna woloottano noo daafira daga togoore gidu aana la`uro yannatenni la`anno bissara egensiisuro xagichunni kiinfe gargarte qixxaawo assinoonnitano ledino.
Qara Qara goyrete yannara winxanni hee`noonni wixi qamade, gaashe, wahe, baaqeela, atara, sagaletenna biiru hayxe ikkinota Biirote afi`noonni mashalaqqe leellishanno.
BakkalchoMaaja 29 / 2013
