Hanafotenni kayse goofimarchu geeshsha wodana sutatenninna agarantinokki gummanni dukkisantinoti 2023 Afriku boowe jeefose afidhino. Heewo mitte Biliyoone doolaare fushshite qixxeessitinoti Kotidivaare ubbinowiinni ka`e 3ki marrora Afriku boowenni mootoo`mitino.
Afrikunniha lekkate kuwaase deerra 1-5 geeshsha amaddino gobbuwa agarroonnikki garinni yannantenni heewote giddonni geegiissantino tayixe Afriku boowenni 2006 Gibitsete harinsoonni heewo kawa umi yannara heewote qixxeessaancho gobba boowe kayisa dandiitino. Kotidivaare boowe kayisasennino aleenni kayissino doogono tayixeha Afriku boowe roorenkanni maala`lisannoha ikkanno gede assitino.
Kotidivaare champiyoonimmate harinsho lame maala`lissanno hedeweelchubba woloottahono umbete gedensaanni ka“a dandiinannita rosicho uyitinota ikkitino.
Umihu Kitidivaare gaamishshu godo`lubbanni kayise boowe kayissu yanna geeshsha mitte mittente godo`lenni xaaddinonsa hajooti. Kotidivaare fanotenna umi gaamishshi godo`lenni Giini Biisaw 2-0 qeelte hanafose biifissinoha ikkirono; aantino lame gaamishshu godo`lubbara xaaddinoseti masissanno hedeweelchubba Kotidivaarete wodana hiiqqitinonkanni.
Nayijeeriyaho 1-0 hattono Ikkuatooriyaal Giinira 4-0 ikkino guminni qeelantinoti Kotidivaare ubbino yinanna tuge sa“ate dayichora sa`inohu dhaggetenni rarra`eetinkanni.
Baxxinohunni Kotidivaare gaamishshunni goofimarchu godo`lensa xawohonna dukkisaanonsa alba Ikkuwaatooriyaal Giininni iillinonsahu 4-0 qeelama masissannotenna hexxo mursiissannotenkanni. Konni gumi gedensaannino gobbate lekkate kuwaase federeeshiine qajeelshaanchu Jin Luwiis Gaasetira geegote borro borreessate yanna dihu`nitino. Konninnino albi Daannootu beeddakko Imers Fae yannate geeshshi qajeelshaanchimmanni Kotidivaare angara adhi.
Kotidivaarootu tuge sa“ate doyichonnino 2021 champiyoonitte baalanta gaamishshu godo`lubba qeeltinota Senegaale sharramansanni hiikkano di“iillitanno yitanno hedubba luphi assinonkanni. Ikkollana Daannootu shiima yannara heewotenni keeshshitino kaayyo horoonsidhe Teeraangu bareedda guluphishiisha dandiitu. Hakkonni gedensaannino uurrisannonsahu diafamino. Kotidivaarootu bocu boci gofiimarchinni, bocu goofimarchinna goofimarchu qara godo`lubbara massagamatenni ka`e hexxo mudhitukkinni goofimarchu xiqqeessi geeshsha godo`latenni boowe xawinsara gatisa dandiitu.
Kotidivaarootu wodana suttanno harinshonni beeddakkonsa Sebastiyaan Haleriti maala`lissanno dhaggeno batinyeho jawaantenna qeela dandiinannita leellishinoho. Haler maaja 2022 shetissannisi keeshshitinota kaanserete xisso qeele arfaasa 2023 wirro lekkate kuwaasera karsamino. Wocawaaro 2024 gobbasi Afriku boowe goofimarchira sayissinota callicho eono kiirsiisi. Shoole barrubba gedensaannino Daannootu goofimarchu godo`lenni Nayijeeriya 2-1 qeelte boowe kayissu woyte qeeltanno gede assitino eo marawete aana fooliishshiishinohu isinni boode dirrara albaanni kaanserete xissonni shetanni keeshshino beeddaakkooti.
Kotdivaare 40 dirrara albaanni 1084 aana qixxeessitino Afriku boowera champiyoone ikka hoogasenni haammata Kotidivaarootu dukkisaano gaabbo galtunsarono, xa xawinsara gobbanniha jawa boowe gatisate ajuujansa adda assitino. Kotdivaarootu haammatu widoonni baxxinoha Afriku boowe ikkino gede farci`noonni qixxaawonsa qeellete ledo xaadissanna heewote dhaggenni hambannikki hedeweelchubba leeltino. 52 godo`lubbanni 119 eubba kiirante haaro Afriku boowe kibrewoseneno woyyaabbino. 24 gobbuwa Afriku boowenni beeqqa hanaffuhu kawa haammata eo kiirantinohu Gibitsete 2017 boowenni ikkanna 102 eubbanni callaati marawete fooliishshidhinoti.
Afriku boowe goofimarcho harunse bocu baci godo`le geeshsha maala`lissanno harinsho nooseti Ikuatoriyaal Giini beeddakku Emiliyo Suy onte eubba marawete fooliishshiishatenni heewotenni beeddakko eote kiirsiisaancho ikke culku koattesi adhino. Lawino garinni heewote tunceessa ikkatenni sayikkita ikkite geefissinoti Wodiidi Afriki eote agaraanchi Ronween Wiliyaamsi heewote beeddakko agaraancho yaamamatenni culku guwaante qeelaancho ikka dandiino. 7 godo`lubba giddonni ontetenni marawe kisiisinokkihu kuni eote agaraanchi onte badote gannoonni kuwaase giddonni shoole gatisatenni Afriku boowera haaro dhagge loosinota anfoonnite. Goofimarchu godo`laancho Nayjeeriyu maala`lissanno harinshonni risoota massaginohu Wiliyaam Tiroost Ikong qole heewote beeddakko ikkatenni culku kuwaase adhino.
Abbebech Maatewoos
Bakkalcho Ammajje 7, 2016 M.D
