Kalqoomu mini giddi balaxote deerra, hattono wiinamu yanna borreessiisatenni afantanno heewo mereerinni Bostenenniti “New Balance Grand” yaamantino heewo qarunni kullannite.
Kalqoomu Atileetiksenni Culku deerra uyinoonninsa mini giddi heewo mereerinni mitte ikkitinoti tini qolchansho tayxeno babbaxxino xeertinyinni wiinamu yanna borreessantinota ikkite jeefantino. Xawu loossanninna Memete qolchanshonni macca Atileetooti gamba yitino tenne heewo aana Afriku Atileetooti jawaata heewisamaanchimmansa leellishshinoha ikkanna balanxe qeeltanno yine hendoonniri Itophiyu Atileetooti gummaamma ikkitino.
Haaru heewote diri hanafama harunsine diru mixo garinni harinsanni kalqoomu heewonni balanxe haammata heewo harinsanni afammanni. Aanino diro harinsanniha kalqoomu mini giddi Shaampiyooninni balaxxe mini giddi qolchansho babbaxxitino kalqete gobbuwara suffe hadhanni no. Jawaata heewo assatenni afantannorinna xeertote heedhe ikkadimmansa leellishshino Atileetooti doodhitanno base mereerinni mitte Bosteni ikkitanna balanxe hendoonninte gede wiinamu yanna borreessantinota dhaggeeffachishshanno heewo assinoonni.
Rossinonte gede Itophiyu Atileetooti qolchantino xeertinyinni qeelaanchimmatenni sa’e dargunnita wiinamu yanna woyyeessa dandiitino. Kuri mereerinni mitte mereerimanna seedu xeertinyi beeddakko Atileet Gudaaf Tseggayite.
Olompikete, kalqoomu Atileetikse shaampiyooninni, Dayimend Liigetenna mini giddi heewonni dhaggeeffachishshanno qeelle borreessiisatenni afantannoti Atileetitte; tayxeha heewote dirono qeelletenni hanaffino. 1500M heewora beeqqitinnoti Gudaafi, umisenni amadantinota seedu xeertinyi wiinamu yanna woyyeessate qolchantinoha ikkirono heewotenni goofimarchu xeertinyi shiima lipheessa gede’nasenni heddinori wo’mikkinni gatino. Ikkeennano e’inohu 3:58:11 ikkitino yannanni Bosteni mini giddi heewo “wiinammunnita” yine amandoonnise.
Faranjootu 2021ni Ferensayete Leevini doddinoti Gudaafi, hattenne yannara borreessiissinoti 3:53:09 ikkitino yanna kalqoomu wiinamu yanna ikkitinoti anfoonnite.
Poortilaandeteno hattonni Belgireedi kalqoomu mini giddi Shaampiyoonnanni Camotenna Culku meedaaliya adhitinoti Atileetitte; muli yannanni Gilaaskote gobbase riqiwa dandiitanno guma borreessiisa hanaffino. Gobbase ooso ledo qolchantinoti Gudaafi konni xeertinyinni ledose qolchamatenni afantannoti Birqe Hayyeloomita aantisidhe e”atenniiti heewose jeefissinohu. Wedellitte Atileetitte Birqe 3:58:43 ikkitino yannanni qolchansho jeefissinoha ikkanna; tenne yanna 20 diri woriidi 1500M mini giddi heewo yanna yine borreessinoonnise.
Wole agarrannitinna labballu 3000M heewo ikkitanna Itophiyu Atileetichi Lemmecha Girma Bosteni mini giddi heewo yanna ikkitino yannanni jeefisino. Ammansiissannota ikkitino qolchanshote hayyonni xeertinyunniha goofimarchu xuruura kaxxinohu wedellichu Atileetichi; xeertinye gudino yanna 7:29:09 ikkitino. Tini yanna Bostenira wiinamu yanna ikkitino sai diro Liiveni harinsoonni mini giddi qolchansho e’inohu 7:23.81 ikkitino yannanni shiima geeshsha gede’na leeltinote.
Xeertinyeho mini giddi balaxaancho wiinamu yanna amadinohu Lemmechi aanino diro mini giddi heewo 7:52:11 ikkitino yanna dodatenni lamenta yanna amadinoti qaangannite. Lamu diri albaanni Belgireedi Itophiyu haammata Meedaliyubba gamba assi’ratenni balaxaancho ikkitino mini giddi kalqoomu shaampiyooninni birru Meedaaliya adhinoha ikkanna, kalqoomu shampiyooninni sase higenna Olompiketenni mitte hige birru Meedaaliya gobbasira abbino dhaggete Atileetichaati.
3000M meentunni harinsoonni heewonni kayinni 3-6 geeshsha noo deerra aantetenni e”atenni Itophiyu Atileetooti amaddino. Kalqoomu 20 diri woriidi shaampiyooninni babbaxxino xeertinyinni gobbansa woshshiisha dandiitinori wedellu Atileetooti Melkinaat Wuddu, Mediina Isa, Sennayit Geetaachewunna Ayinaddis Mebraatu kayinni hexxo uyino gumi ayiddeeti. Melkinaati e’inoti 8:32:34 ikkitino yanna xeertinyeho 20 diri woriidi meentu wiinamu yanna ikkase anfoonni. 1500M qeelaancho Atileet Gudaaf Tseggayete; 3000M qeelaanchi Atileet Lemmechi Girmiho.
Qiddist Gezzaheny
Bakkalcho Arfaasa 30 / 2016
