Addisu Adoola
Addis Ababa: Demokiraatiki Rippabiliiki Kongote Meentu, Maatetenna Qaaqquullu Ministeere diru dirunkunni awuroppu kiiro garinni Maaja, 31 ayirrinsanni Paani Afiriku meentu barra korkaata assatenni Pirezidaantitte Sahileworqi Zewudetera baraarsha uytu.
Pirezidaantete Borro Mininni afi’noommo mashalaqqe leellishshanno garinni, Pirezidaant Sahileworqi babbaxxino ogimmate handaarinni gobbate giddo, Afirikunna kalqete deerrinni meento kaajjishateno ikko babbaxxitino miinju, dagoomittenna politiku handaarira meentu beeqqo lossate godo’litino jawu qeechchira baraarsha uynoonnise gede xawinsoonni.
Baraarshano Demokiraatiki Rippabiliiki Kongote Itophiyu Wo’mu Biilloonyi Ambaasaadderitte Woynisheeti Taaddelete anganni adhase anfoonni.
Atoomu aana Pirezidaanti Sahileworqi Zewudete gobbaanni, Albi Laybeeriyu Pirezidaantichi Eleeni Jonseni Serliifi, Tanzaaniyu Pirezidaantichi Saami Suluhi Hasen hattono babbaxxino handaarinni kaa’lo assitino Demokiraatiki Rippabiliiki Kongote qansootira baraarsha uynoonninsa.
BakkalchoMaaja 29 / 2013
