2023 MD Afriku Boowera Kotidivaarete tolu di injiinonsankanni. 2023 yineemmo woyte sai diro hara hasiissannose 34ki Afriku Boowe godo’le Hawadu korkaatinni sa’inota ikkase hegersa hasiissanno.
Fanote godo’lenni Giini 2 na 0ni qeelatenni 3 bixxille borreessiisse danchu guminni hanaffurono; aantino gaamose godo’lera Nayijeeriyunni 1:0, Ikuwaatooriyaal Giininni 4 na 0 qeelamatenni jawa qeelammete saala duqqitu qixxeessaancho Kotidivaare. Daanichootu tuge sa’’ate godo’lera sa’’ate hexxonsa mucuqqi yiteenna qajeelshaanchonsa shorrate geeshsha iillitinonkanni.
Kuwaase marte gawa’litannowa balanxe himanate addintanni di ammanchishshanno; konninni kainohunni “Kuwaase qunqumashshote” yaanno handaarinni xawinsanni.
Aleenni assitu godo’lenni 3 bixxille amaddinoti kotidivaare, sa’’ate kaayyo hoogguserono; wodhote garinni bocu boci heewora 16 gaamo shiqase digattanno. Konninnino moroko Zaambiya qeeltino gumi korkaatinni gaamotenni woyyaabbe leeltinoti Kotidivaare ikkase kaayyo galchantanno gede kaayyu eleennansa kuneeti quphante bocu boci gumulo sa’’ate iillitino.
Konni kaiminni Sa’u lamalara Arfaasa 16/2016MD Bakkalcho Gaazeexi attamo aana “Boowete agarranniti Afiriku Boowe qixxeessaancho Kotidivaare heewotenni soodo gutonni geegiissantino” yitanno odoo fultinoti qaangannite. Konne harunitine hedo’ne sirnyunni kultininkerira ayirrinyinke luphiimaho. Nabbanbe hedo busulino garinni wora egennote bilchaanteetina galanteemmo.
Kayinnilla ayirradda nabbawaanonkera buuxisa hasi’neemmori, Kotidivaare hiitto ikkite wirro bocu bocira karsantu yaannohaati. Ee;Kuwaase qunqumashshote;marte gawa’litannowa dianfanni;wodhoseno hattonni baxxino garinni la’nanni gari noota Ispoortete tittiraano xawissanno. Konne ikkinohura Kitidivaare qeelte ikkikkinni woyyaabbinore heewisiinsiro sayikki deerra amadate kaayyo afidheeti.
26 gobbuwa 6 gaamora gaammeenna godo’litu. Mitte mittente gaamonni 1-2 geeshsha noore haa’niro 12 gobbuwa qeelletenni sa’u. Kayinnilla bocu bocira heewisamate 16 gobbuwa ikka hasiissanno. Konni garinni Kotidivaare gaamosenni ubburono; wolootta gobbuwa gaamonsanni ubbinorinni ledo heewisiinse la’neenna roorenkanni Moroko Zaambiya qeeltuta sa’’ate kaayyo afidhinota deama dihasiissanno.
Jeefonsa affukkinni qajeelshaanchonsa Jiyaan Luwis Gaase muddante kotidivaare qaafo adhansa xa noo deerra la’anno woyte huluullissinonsa.
Ikkireno ikkeenna, 34ki Afriku Boowe hashshihunni 5 saatera jeefote godo’laano ikkite Chaampiyoona ikkitino Senegaalenni xaaddinoti Kotidivaare badooshshu eo ganonni qeelte bocu boci gumulo karsantino. Annu kaayyora miqichu qoe afi’rino yinanni yaatto konne loossanno.
Lamenti gobbuwa 90 xiqqeessa 1 na 1 taalo ikkite baxxansanni ledote godo’le yanna uyineennano wirro taalo baxxansanni badooshshu gano aate gadachammoonni. 33ki Afriku Boowe kayissino Senegaale onte badooshshu ganonni shoole kiirsiisseenna; gaamote filonni woyyaawino yinanniri mereerinni Sayikkita ikkite Kotidivaare Ontenta badooshshu gano eo kiirsiisatenni bocu boci jeefo karsantino.
Senegale dhaggete Beeddankonsa ikkino qajeelshaanchinsanni massagantinori jawaata gaamo;Daanichootu godo’le laafa harinshonni ledo mimmito labbannota ikkiturono; lamenti gobbuwa noonsa luphiima lekkate kuwaase dhaggenninna su’minni hendiro oyimbarra hashsha harissino godo’le jawa keeno gede assine agarroonnitenkanni.
Kotidivaare 34ki Afriku godo’lenni dhaggetenni umi yannara sase harunsitino godo’lenni qeelantino. Senegaaletenni ledo assitu godo’lenni qeelantoommero dhaggetenni hambannikki qeelama uddidhannonkanni. Afriku boowe godo’le dhaggenni sase harunsitino godo’lenni qeelle dixaaddinose gobba dinoonkanni. Qixxeessaancho ikkite heedhenni sase harunsitino godo’le qeelantino gobba nookkitano dhagge kultanno. Ikkireno ikkeenna kuwaase qunqumashshotena Kotidivaare 16 giddo karsamate kaayyo afidhino.
Kayinnilla qeelantinori giddonni woyyaabbinori mereerinni sayikkita ikkite afidhino kaayyooti.
Yaareed Geetaachew
Bakkalcho Arfaasa 23, 2016 M.D
