Boowete agarranniti Afiriku Boowe qixxeessaancho Kotidivaare heewotenni soodo gutonni geegiissantino; macca gaamubba ruukkote giddora e’ino; agarroonnikki gaamubba kaajjite afantino. gumulote heewo iillitanno gaamubba balanxe hedate mitiimma ikkino 34ki Afiriku Boowe dhaggeeffachishshanno tunceenyubbanni wo’mite godo’le suffino. Macca su’mi noonsa Afiriku gaamubba hendoonni gede ikka hoogansa harunseno Boowe kayissara dandiitanno haaro gaamo egensiisakka!? yitannoti duuchu manni xa’mo ikkitino.
Albi lekkate kuwaase bareedinsa Diidiyer Dirogbanna dagansa albaanni heewotenni geegiissamansa buuxxinori Daaniichootu; agarroonnikki garinni Ikkuyatooriyal-Giininni kiirantinonsa 4 eo(goolenni) saala duqqitino. Hanafonsa ikkinnina jeefonsa biifa hoogase fooggashshitinosa irkisaanono qodo’lete xawinni fultanni doogote xaaddino Atobise Kaameela hiiqqaqqatenni hanqonsa xawissino.
Layinkimeeshshi yannara gaamooshshu godo’le sa’e heewisamaanchimmansa naqqasiisa dandiitinokkiti Gaanu gaamo geegonsa harunse, irkisaanonsa gaamo xawunni fultanna agarte fooggalonsa xawissino. Boowete agarranniti wole gaamo Kaameeroon gumino hattonni heewo addi akati hee’rannose gede assitino hedeweelchubba mereerinni mittete.
Moozaambiikete, Gaanunna Kepverdete ledo taalo fulatenni geegote godo’lesenni 3 bixxille borreessiisatenni aantanno doycho widira sa”ase hawarro yannara buuxxinoti Gibitseno heewote maala’lisiissanno gaamubba mereerinni mittete.
Haammata yannara Afiriku Boowe ama Gibitse Lame godo’lenni ledote xiqqeessubbanni kiirsiissino eo baotenni gatissinose. Marfete xullo gede ruukkitino sa”atera kaayyo horonsidhino Gibitse Gaanu ledo 2 taalo babbaxxitino godo’lenni gawajjo iillitnosihu biheeraawe bareedinsa Mohaammed Saalah, hure Afiriku Boowe godo’lera higate kaayyo noosikkita maccishshansa umu damuume ikkitinosa.
Kotidvaareno lendeenna gaamooshshinsanni Sayikki deerra amadansanni 16 giddora karsama hoogantinonsa gaamo mereerinni Shoole gaamo dooraantino Sase gaamo ikkatenni Layinki doycho karsamate kaayyonsa agadhitannoha ikkanno.
Ispoortete Dhagge tittiraanchi Madaarshi
Baxamaanchu ispoortete odeessaanchi, borreessaanchunna albi lekkate kuwaase godo’laanchi Gennene Makuriya (Libiro) madaarshu amanyooti bero barra 9:00 sa”atenni Membere Tsebaoot Qidist Sillaase Kaateediral gumulamino.
Badheessa 5/1957 M.D Yirgaalamete Quchumira ilaminohu Gennene, roore anjesi yanna saysinohu Shaashamannete quchumiraati. Umi dirimi rososi harunsinohu Atse Naaood Rosi Mine ispoortetenna odeessaanchimmate safote kincho tuqqinoha ikkanna; lekkate kuwaase dhukasi kaajjishi’ratennino addi addi gaamora godo’lino.
Tegibaare-Idinni xaphoomu tekiniikimmanni maassami gedensaanni Meetta Biir Lekkate Kuwaase Gaamora godo’lanni Addis Zemen Gaazeexira borreessannonka. Lekkate kuwaase godo’laanchimma yannasirano ikko xaa geeshshano afaminoha “Libiro” yaanno su’ma afi’rino.
Lekkate kuwaase godo’laanchimma aguri gedensaanni Sase Tonne dirra qole addi addi tuqu xaadooshshubbara ispoortete odeessaancho ikke loosino. Libiro Gaazeexi anna ikkinohu Gennene, baxxino garinni televizhiinete shiqishannonna dhagge qaagiissitanno qixxaawubbanni lowo baxillaanchimma afi’rino.
Itophiyu ispoorte seekke afatenninna dhaggete egennaamimmasi duuchu giddo “Millissanno Maxaaffate Mine” yaamame woshshamannoha ikkanna; IHIAPA na Ispoorte (1-3), taalo xajjete bebbeehache, Libiro Itophiyawe qajeelsha, Makura,….yaamantanno maxaaffa nabbawaanote baraasino.
Lekkate kuwaasera baraasino luphiimu qeechinnino Addis Ababaho hadhino Kaafu Kongireesera seedu diri owaante meedaaliya baraansoonnisi.
Galtte adhinohanna Lame ooso anna ikkinohu, baxamaanchu lekkate kuwaase godo’laanchi, odeessaanchunna borreessaanchu Gennene Makurihu (Libiro) xaaddinosi xissonni xaginsannasi keeshshe Arfaasa 14/2016 M.D tenne kalqenni reyotenni baxxino. Madaarshisi amanyootino bero barra 9:00 sa”atenni Membere Tsebaoot Qidist Sillaase Kaateediral gumulamino.
Baxamaancho Ispoortete Odeessaancho, Borreessaanchonna Albi Lekkate Kuwaase Godo’laancho Gennene Makura
Addisu Adoola
Bakkalcho Arfaasa 16, 2016 M.D
