Tini yanna qolchanshote Ispoortenni mini giddo heewo hala’ladunni heedhanno yanna ikkase anfoonnite. Ammajje agani bocira Ispoorte massagganno bissanni kalqete mini giddo chaampiyoona hadhannoha ikkasi harunse wo’ma kalqera afantanno haammata quchumma giddo mini giddo gaamotenni dodate heewubba (Tour) harinsanni. Awuropaho, Isiyahonna Aliyye Ameeriki Ahigure giddo afantanno 20 quchummara 50 ale ikkitanno heewubba harinsanniha ikkanna; kurino, kalqete qolchamaano culka, birra hattono camote heewo yinanni deerra uynoonninsa.
Waajjuullunnihu haaru diri easira 2 barri albaanni hanafantinoti tini mini giddo dodate heewo kalqete chaampiyoona harisate 6 barri albaanni gumullanniha ikkanna; xawu akatira hattono 60 Meetirenni 5000 meetire geeshsha noo xeertinyira qolchamaasine heewisantanno. Mitte mittenti mini giddo gaamotenni qolchamate heewo woxu baraarsha afisiissannoha ikkanna; qolchamaano heedhannonsa beeqqonni borreessiissanno bixxille ledante kalqete deerrinni chaampiyona xaadhotenni gobbansa riqibbe beeqqitanno kaayyo afisiisansara dandaanno. Konninni, gobbaanni jawa bixxille afidhanno qolchamaano gumulote heewora 10 kume Ameeriku Doolaare baraarsha afi’ratennino heewote dirinni umiha ikkitino kalqete chaampiyonara heewisantannohano ikkanno. Ingilizete Gilaasikote qixxeessaanchimmanni assinanni mini giddo chaampiyonano tayxe 19ki yannara harinsanni.
Kalqete qolchamaanote deerrinni uynoonninsa mini giddo dodate heewubba sufino garinni hadhanni nooha ikkanna; macca qolchamaano addinni beeqqitanno culku deerri noonsa heewubba kayinni barrubbate gedensaanniiti hanaffannohu. Isiyu gobba Kazakistaan qaru quchumi Astaana harissanno heewo umita ikkitanna; heewotenni macca qolchamaano beeqqansa buuxisiissino.
Kayinnilla, kuri mereerinni mitte ikkitinoti Itophiyu qansitte mereerimunna seedu xeertiny qolchamaancho Gudaaf Tseggaye beeqqose agurtino gede buunxoonni. Mini giddo chaampiyonano lendeenna Olompiikete, kalqete chaampiyona, Dayimend Liigete hattono wolootta heewubbara Itophiya woshshiishshino 5 kume meetire mootitte, heewote diro Kazakistaanete hanaffanno yaannohunni agarrirono barrubbate seedisaseeti buunxoonnihu.
Kayinnilla, 1500 meetire xeertinyira beeqqitanno gede balaxxe egensiissinoti qolchamaancho Hiruut Meshesha, hattono 3 kume meetire dodannohu qolchamaanchu Ali Abdilimaani, hedonsa soorritukkinni dodate qixxaabbino Itophiyu qolchamaanooti.
Kaajjado qolchamaancho Gudaaf Tseggaye ise widoonni; culku deerra noosinna Boosten harinsanni ‘’New Balance Grand Pricks’’ rosantino dhaggeeffachishshanno dandoose leellishate qixxaabbino. Sai heewote diro dhaggeeffachishshanno yanna sayissino qolchamaancho Budapestunni gumaame kalqete qolchanshote chaampiyoona dawaro Daymend Liigete 5 kume meetire ayirrinyu deerra (rikeerde) hiiqqase qaangannite. Konninni, qolchamaancho kalqete muxxe qolchamaancho dooramaancho ikkase muli yanna qooggooshsheeti.
Gudaafi, mini giddo heeworano 1500 meetirera gumaame ikkitanna; Faranjete kiiro garinni 2016 Poortlaandete gobbase riqibbe Camote meedaaliya afidhino. Itophiyu kalqetenni umi deerra amadde gumultunna Lamu diri albaanni Beeligireed harinsoonni chaampiyonira qole konni xeertinyinni meedaaliya afi’ra dandiitino.
Ikkinohura, qolchamaancho noo yannate uurrinshanninna bisu qixxaawo garinni mini giddo heewora jawa bixxille borreessiisatenni chaampiyonnate xaadho beeqqa dandiitanno kaayyo afidhanno yitanno hedo Ispoortete maate giddo kaajjitino.
Wole widoonni, tenne barera lowo geeshsha agarranninna heewono iibbishshanno qolchamaano mereerinni mittu Itophiyu qolchamaanchi Lemmeecha Girmiho. Kalqete chasampiyonnara Sase hige hattono Olompiikete Mitte hige birru meedaaliya afi’rinohu wedellichu qolchamaanchi Itophiya 3 kume meetire heewora woshshiishshino boode heewisamaano mereerinni mittoho.
Beeligireed noo chaampiyonano hattonni birru meedaaliya adha dandiinonka. Kuni qolchamaanchi sai diro Leeven ha’rinsoonni mini giddo dodansho heewora xeertinyesi 7:23:81 mini gobbaanni qole 7:52:11 ikkitino saatenni qeelatenni Lamenta ayirrinyu dannubba angasira eessi’rasino dihambanni. Kunino, heewo quqquxxannota assannoha ikkanna; heewisamaano ammansiissanno ikkadimmanni qeelatenni Gilaasko Itophiyu culku meedaaliya afidhanno gede assanno yaannohuno agarranniho.
Tenne heewora beeqqitannonna qeelaano ikkitanno yaannohunni hexxo assinoonninsa qolchamaano mereerinni Itophiyu Wedellitte Qolchamaancho Mediina Iisa agarrannite. Kalqe 20 diri wori 5 kume meetire ayirrinyu Danni ama hakka macca widira tareessitannose ikkadimma leellishshanno gede hendoonni.
Addisu Adoola
Bakkalcho Arfaasa 9, 2016 M.D
