Haaru Atileetiksete heewo diri umikki lamala wo’mante kalqera doogote aani dodansho heewo harinsoonni. Babbaxxino xeertinyinni harinsoonni heewubba rosamino garinni haammata Itophiyu Atileetooti beeqqite gummaamma ikka dandiitino. Kuri mereerinni mittu Chaynunnihu Ziimen Maaraatoone ikkanna; koo/teenni qeelaano ikkatenni gummamma hanafo maareekisiissino.
Kalqete Atileetikse Pilaatiniyeemete deerra uynoonninsari qara qara Maaraatoonete heewo mereerinni mittunna diroho umikkiha ikkitino heewonni layinkiti wiinatu sa’’aate borreessantino. Dodanshote heewo qeelaancho ikkinohu Itophiyu Atileetichi Aseffa Boki lowonta jiffanno heewonni heewisamaano shiimu lipheessinni calla qolchatenni qeelino. Atileetichu eino sa’’aate 2:06:46 ikkanna; Awuropu kiiro 2015 garinni Keeniyu Atileetichi heewote basera borreessantino ayirrinyu saatenni 27 lipheessa calla gede’nino.
Layinki deerra amadinohu Keeniyu Atileetichi Filiks Kirwa 2:06:52 ikkitino sa’’aate borreessiisinoha ikkanna; Morokote Atileetichi Otmaan El Gomri kayinni 2:07:18 ikkitino sa’’aatenni sayikkiha ikkino. Tenne heewonni beeqqaano ikkitinori Itophiyu Atileetooti Adaane Kebbedenna Allene Mekonnin shoolkinna ontikki deerra amadatenni heewonsa gumultino.
Meentu mereero assinoonni heewonni kayinni boco Maaraatoonenni egennantinoti Atileeticho Beqqelech Guddeta qeelaancho ikkitino. 26 diriti Atileeticho xeertinye 2:22:54 ikkitino sa’aatenni umiseta wiinamu sa’aateno woyyeessitino. Lame xiqqeessa gede’nite e’inoti Morokote Atileetitte Faaxima Izaarah layinkita, hattono Chanyunniti Zhaang Deeshun kayinni sayikkita ikkitino. woloottu Itophiyu Atileetooti Ayyaana Mu’lisanna Gulme Caala kayinni shoolkinna leyikki deerra amaddino.
Lamalate goofimarchira harinsoonni Maaraatoone heewo mereerinni mittu Dubayete Maaraatoone ikkanna; dirrate yannara Dubayete Maaraatoone qeelletenni jeefissinori Itophiyu Atileetooti kayinni tayxeno rosamino garinni mimmito hoodisse eatenni qeelaanchimmatenni gumultino.
Heewote dhaggenni qeellete rosichi noonsari Itophiyu Atileetootira Dubayete Maaraatoone heewo baychi hala’ladu xawi noo doogora ikkasinni qeelate dancha kaayyo kalaqinonsata kulloonni.
Ikkinohura, maccarinna haaro Atileetooti tenne heewonni hala’ladunni beeqqitanno. Faranjootu haaru dirinni umikki lamalara harinsoonni tenne heewonni umikki yannara beeqqitinoti Atileeticho Tigist Ketema 2:16:07 ikkitino sa’’aatenni eatenni xeertinyunniha ayirrinyu deerra Keeniyu Atileeticho Ruut Chehipigetichi anganni adha dandiitino.
Keeniyu Atileeticho Awuropu kiiro 2019 garinni heewo 2:17:08 ikkitino sa’’aatenni easenni wiinamu sa’’aate amaddino yinirono; mittu xiqqeessi ale ikkitino yannanni wiinamunni e’inoti 25 diriti Itophiyu Atileetitte roorrinye adhitino. Tigisti tenne sa’’aatenni Maaraatoonete dhaggenni meentunni 8ki wiinamu dodaancho ikkatenni 80 kume doolaare baraadhino.
Sai diro tenne heewonni 2kita fultinotinna haammata Maaraatoone beeqqonni egennantinoti Atileetitte Ruut Aaga tayxeno 2ki deerra amaddino. Atileetitte Tigistinni 2 xiqqeessinni gede’niteeti e’inohu. Tenne heewonni tayxeno layinki yannara qeelaancho ikkitanno yine hendoonniti Atileetitte Deera Diida kayinni 3ki deerra amaddino. 12ki deerri geeshsha noo baseno wolootta lame gobbuwa Atileetooti karsamansa gobbanni Itophiyunniri amaddino.
Labballunnino Itophiyu Atileetooti hoode hoodete eatenni heewote aliidimma amaddinoha ikkanna; Atileet Addisu Goobena gobbasi ooso hooddise qeelaancho ikkino. Kaajjado qolchanshonni dukkisantino heewo ikkase leellishannohu heewo heewisamaanote mereero xeertidhinokki yanna borreessantinoha ikkanna; 2:05:01 ikkitino sa’aatenni Atileetichu qeelle afi’rino. 19 lipheessuwanni calla balaxaminohu Atileetichu Lemmi Dummeecha 2ki deerra amadinoha ikkanna; Dejene Megersa kayinni 41 lipheessinni gede’ne eatenni 3ki deerra fulino. Haammata kiiro noonsri woloottu Itophiyu Atileetootino mimmito hooddisse eatenni heewonniha aliidimma amaddino.
Lamalate albaanni Ispeenete harinsoonni 10km heewonni qeelinohu wedellichu Atileetichi Berihu Aregaawi wirro wole doyicho heewonnino qeelino. Ispeenete harinsanni hee’noonni heewonni kalqete Atileetiksenni culku deerra uynoonni heewora beeqqanni afamannohu Atileetichu sabbu noowa ikkasinni lowonta jiffanno heewonni qeelamikkinni 30:34 ikkitino sa’aate borreessiisatenniiti qeelaancho ikkinohu. Ziimeni Maaraatoonenni meentunni qeeltinoti Atileet Beqqelech Guddeta
Amsaalu Felleqe
Bakkalcho Arfaasa 2, 2016 M.D
