Abrahaam Saamueel
Manchi beetti fayyimmaranna keeraanchimmara sagale saga`la doorshu nooikkite. Ikkollana kaayinni, mite mite sagalete dani qoropho nookkiha saga`liniro fayyimmate qarra abbitanno. Intanni sagale baala fayyimmankera horo uytannorono bikku aleenni horoonsi`ra wole qarra abbitanno. Gati laalonna hattoo labbannore duucha yannara horoonsi`ra fayyimmankera xaggete. “Dhiwamme qaarammankunni balanxe qorophino” yaanno gobbanke manni. Konnira, Konne gati laalonna kaashsho saga`linanni meesaneetenke xagisi`no. Ledinoha, Fayyimmankeranna bisinkera jawa horo aannoha gatu laalonna kaashshu horo konni woroonni shiqino garinni la`no. Dancha niwaawe !
* Paappayyu Horo:- Reytino gogu seella haayishshe hoolate kaa`lanno; gogu moolle gargaranno. Pappaayya gogu aana buuratenni woy itatenni biifannoha shaqqado goga afi`ra dandiinnanni. Daankoonni Paappayye daddadhaminoha lekkate hoowo xagisate kaa`lanno. Godowu da`muulla xagisate horo aanno. Bisu aana fulannoha koliddaricho bussi bussi yee fulinoha hunate, geedhimmate malaatta ajishshatenna xagisate kaa`lanno. Yanniweelo umu baddannokki gedenna danancho kaajjishate horo aanno.
* Loome:- baakiteeriya shitanno wolqa noose. Vaaytaamine “C” noose. Huuncinoonni loome way ledo karsine aga bisinke asiidete alkaalayne taalo ikkitanno gede kaa`lanno. Afalete looso kakkaayisse yuurikete asiidenna woloota gawajjitannore giddo amaddino seella hunatenna dombophichote du`namaancho seekkite xagissanno; du`namaanchu kaajjannokki gede assitanno. Huunchinoonni loome vaaytaamini “P” nni wo`mtinohura seella gawajantannokki gedenna geedhimmate yannara kalaqantanno Firi-raadikaaloota/free-radical/ hunate kaa`litanno. Huuncinoonni loome kaansereno amaddannoikki gede gargartanno. Geedhimmate yannara daannoha erammete basera kalaqantanno dhibba hooltanno. Loomete giddo noohu pikitini/pectin/ yinanni faybere kolistiroolete bikka ajishate aleenni hude huntanno daafira lowo sagale saga`la hooltanno.
* Habaabe/water melon/:- Mann immankera lowo gede hasiissanno vaaytaamine, shiilonna batirikkinni bisinkera ikkanno bikki garinni kaaloore amadinoho addintanni banxanni laalchooti. Bikku ali du’mille ajishate, sukkaarete dhibbinni gargadhate, wodanu dhibbi qarra gargarate, bisoho iibbillenna wolqa ledate, keeraancho dananchu lophora, sagale daahatenna bisu moolle gargarate, hattono mundeete xiiworano xagisi’rate kaa`lanno. Habaabe ita wole horosi guluchu woroonni kalaqantanno mundeete doycho woy xiiwo huna dandaanno. Kaanserete, bisu aana kalaqamannore hasiissannokkiricho hunate horo aanno. Wolu Habaabete horo, vaaytaamini “C” nni wo`mino daafira kaanserete reqecci yaa gargarannota xiinxallo leellishanno.
* Qaariya:- Vaaytaamine “A” qaariyu giddo heedhannote. Illete isilanchimmaranna eeraanchimmate luphiima qeecha afidhino daafira qaariya saga`la lowo horo uytanno. Qaariya vaaytaamine “C” inni wo`mitino daafira goganke keeraanchonna xawinoha assitanno. Dhibba gargarate wolqa noose. Sagale daahantanno gede irkissanno. Ganshu,buusano hatono shonbu kaansere gargarate kaa`litanno. Miqichu fayyimmanna kaajjillira addinta horo uyitanno. Mannimankera horo uyitannokki seella hunatenni faayberete buicho ikkite godowu moolle gargartanno. Qaariya ittanno mannooti goginsa qoorre di afi’ranno. Rakke geedhitannoikki gede assate luphiima horo uyitanno.
* Avokaado:- Mannimanke giddo noo kolistiroole ajishate taalaasihu dino. Giddosiinni amadinohu vaaytaamini “I” wodanu dhibbira woy umu giddo mundee fincantannokki gede kaa`lanno. Geedhimma gargaratenna gogu biibfille seekke aga`ranno. Avokaadote giddo haammate hee`rannohu (anti oxidant) gogu qoorannokki gedenna reytinori gogu seella uminsa umonsa riqqibbanno gede irkisatenni Kaarootinaydisi yinanni nixire/shiilo/ coye gogu aana leeltannore gogu biinfille ajjishshanno malaatta kalaqantannokki gede assanno. Qelpheepho ajishate wolqa noosi. Sukkaarete dhibbira xagichoho. Avokaadote giddo nooti potaasheeme mundeete giddo noo gulukoosete bikka taashshatenni sukkaaretenna wodanu looso geinnoha assanno.
* Duumo Shunkurta:- Mannimmanke dhibbunni gargarate wolqa lossanno; giddoyinni kirumiyemi yinanni nixire /shiilo/coyee afi`rino. Tini nixire coy mundeete xiiwonna sukkaare gargaranno. Duumu shunkurti biso hangaarsiissannonna giirtanno alarjiketinni gargaranno. Duumo shunkurta bura ita kolistiroole gargaratenni aleenni keeraancho wodanu gana/ormal heart bit/ heedhanno gede assanno. Duumu shunkurti giddo kiyurstiinete yinanni nixire coy kaansere gargaranno. Diishshichi iddanno woyte shiimu duumu shunkurti waa buudhinummoro woyyimma afi`neemmo. Duumo shunkurta barru baala horoonsi`ra saltote madanni aga`rtanno. Haanju darchi birxichi duumu shunkurtunnihu vaaytaamine “A” amadinohura jawa horo noosi.
* Dinnicha:- Saltote dhibbira hurre aanno. Mundeete xiiwono gargara dandiinanni. Kaanserete, muleho, umu damuumeranna wolootaho horo aanno. Ledoteno, dinnichu juuse kalaqamu dhibba gargarate dhuka lossatena woyyeessate kaa`lanno. Aganu mundeete daraaro dagganno woyte noo xisso hursate kaa`lanno.
* Keeru batiro`ne.
Jaanjiweelu Aanno Horo
Jaanjiweelu rumushshu sagale widira gaammanniho. Jaanjiweelo duucha yannara saga`la lowo horo uytanno. Korkaatunno giddosiinni noo nixire coy vaaytaamine “C” Maginizeeme hattono wolootta nixire fayyimmate lowo kaa`lo uytannota amadino daafiraati. Kuri giddo:-
* Kaanserete dhibba gargaranno. Duucha yanna assinoonni xiinxallo la`niro jaanjiweelu kaanserete lopho uurrisanno nixire coy giddossi amadinohura xibbuunni xibbee anga dhibba gargaranno. Tushshiishara looqi assanno woyte jaanjiweelu shae angiro tushshiishanna looqi assa aguranno.
* Saltotenna godowu looso busulsanno; woyyeessanno. Bisu usuramme gargaranno Jaanjiweelu sagalete daahamanna godowu keeranchimma seekke agaranno. Bisu eramme basenna niggate qarri hee`riro jaanjiweelu xagichoho. Jaanjiweelu shae aganna bisu usuramino baycho jaanjiweelunni riga lowo gede kaa`litanno.
* Foollanni bisi qarra gargaranno. Ganshu ledo amadamino coye foollanniwa kokketenna gagasu aana ayyirraannore shotisanno hursanno. Mundeete doycho woyyeessanno. Jaanjiweelu shae giddo noo Vaaytaamine, Shiilo, Amino Asiide mundeete doycho woyyeessate luphiima horo noosi.
* Meyaa beettora aganu daraaro dagganno yannara noo goduwu dhibba ajishanno. Meeyyaa beetto aganu daraaro yannara kalaqamanno godowu dhibba ajishate ibbitino jaanjiweelu shaennni fooxa shanshine godowa cuukki’ra dandiinanni. Giddosi noo nixire coyinni dhibba hursatenna gargarate wolqa noosi.
* Yaaddo hunanno. Jaanjiweelu yaaddo hunate wolqa noosi yine kullanni. Tinino giddosinni noo kaajjado su`naanno foolisinna nixire coy korkaatinniit.
* Wolu jaanjiweelu aanno horo buusanote dhibbira xagichoho. Baxxinohunni (asimete) yinanni buusanote dhibbira jaanjiweelu hurre aanno. Konnira aleenni shiqinshoommori gatu laalinna rumushshi sagalla dhiwamme calla ikkikkinni barru baala horoonsi`nanni tenne yanna giddo batidhanni hadhanno taraabbannotanna taraabbannoikki dhibba gargadhino. Keeru barra ikkonn`e!
Bakkalcho Maaja 15/2013 M.D
