Qaaqquullu tenne kalqe lame doogonni yaano gamaa`matenni woy godowa darreenna (opireeshinetenni) karsantanno. Xaa yannara xaginaatu doorshi noonsa amuwi gamaa`me ilantenni roore opireeshinetenni ila woyyitino doogo gede assite adhitanna la`nanni.
Mite mite xaginaatu ogeeyyeno lamente doogonni ila noose horonna gedensaannino daggara woy iillitara dandiitanno gawajjo huwachishshe muro amuwaho agurantenni roore opireeshinetenni iltanno gede amuwa jawaachishshanna wodanchinanni.
Opireeshinetenni ilate muranna fajja hasiissannohu mamooteeti?
- Gamaa`mine ila amate woy qaaqqu heeshsho aana gawajjo abbitara dandiitanno yine ammannanninna hendanni woyte,
- Godowamino qaaqqi du`ma ikkironna amate otootto ruukkado ikkituro,
- Godowamino qaaqqi afollino gari gara ikka hoogironna goofimarchu barra umisi eelira daa hoogiro,
- Gamaa`mate yannara godowamino qaaqqi ikkado oksijiine afi’ra hoogironna foo`late qarri xaadisiro,
- Lakkuwa ikkituro,
- Seeda yanna adhitino gamaa`ma heedhuronna,
- Ama luphiima mundeete xiiwo nooseha ikkiro, sukkaarete xissamaancho ikkituro, HIV vayrese mundeese giddo heedhuro opireeshinetenni iltanno gede assinara dandiinanni.
Kunino qarrisanno akati giddo noo amuwinna godowamino qaaqqi lubbo gattanno assanno; hattono amuwu gamaa`mitanno yannara macciishshantansara dandiitanno xisso gatisanno.
Iillishanno Gawajjo
- Godowamino qaaqqo fushshate darranniti bisu kifile hurate yanna adhitanno; bisu aana tugge sa`anno bassino shotu garinni hurannoha dikkino.
- Amuwunnita Hospitaalete keeshsho seedisanno. Opireeshinetenni ilanno amuwi rahotenni hurte woy biso assidhe qaaqquullensa qansi`rateno ikko awuutate lowo geeshsha qarramanno.
- Umi ila opireeshinetenni ilino amuwi aantanno oosono konni garinni iltanno gede gadachamara dandaanno. Kunino otoottote gidgidi aana baca bassa iillishanno; mada rakke hura hoogguro qole otoottote gidgidi wole bisu kifile ledo qa`mirarano dandaanno.
- Gamaa`mite iltanno amuwinni roore opireeshinetenni ilanno amuwi luphiima mundeete du`nammeranna infekishiinete reqeccaabbanno. Opireeshinetenni ilanno amuwi gamaa`me ilanno amuwinni roore reyate kaayyonsa sase eronni hala`litinote.
- Opireeshinete harinsho giddo shumanna cilo sayissanno boombuwa gawajjantara dandiitanno. Konni daafira gadachishanno akati kalaqama hoogiro amuwu gamaa`mine ilanni doogo doodhara amaallanni. Gamaa`me ilanno amuwino woyyino hagiirri noonsata coyidhanna macciishshinanni.
Bakkalcho Woxawaajje 18, 2015 M.D
