Amsaalu Felleqe
Addis Ababa:- Sidaamu qoqqowira 5 kumenna 90 hekitaare baatto aana weese hala’ladunni laashshinanni hee’noonnita Qoqqowu Irshunna Kalaqamu Jiro Latishshi Biiro egensiissu.
Biirote sooreessi kalaa Memmiru Moke Itophiyu Pireresete uurrinshara xawisino garinni; qoqqowoho wolootta gidu lalchuwanni ledo weeseno hala’ladunni laashshatenni sagalete wowe buuxisiisate jawa illacha tunge loonsanni hee’noonni.
Qoqqowoho sagalimmate ikkitanno rumuddate sagalla mereerinni weese qarunni horoonsi’nannita ikkitanna; qooxeessaho sa’u yannara kalaqantinoti diilallote akati soorronni woloottu laalchuwa gawajjantinota hedote giddo woratenni diilallote soorro dandiitannota weese halashshine laashsha doorshu nookki hajooti yiino; Sooreessu.
Kunino, qooxeessaho diilallote akati soorro kaiminni laalchu aana gawajjo iillitanno yannara sagalete anje kalaqantannokki gede kaa’litannoti weese ikkitinota kule; qoqqowoho weese hala’ladunni laashshatenni sagalete wowe buuxisisate loonsanni hee’noonnita xawisino.
Sidaami giddo albinni hanafe 30 ale ikkitannoti ha’nura weesete sirchi nooha ikkanna; tayxe dirinnino laalchimmansa woyyeessinoonnire weesete sircho Arakka giwirinnu xiinxallote mereershinni abbisiisatenni loosidhe galtinori qajeelshu mereershiranna qaddo loosidhe galtinori gate batisatenni tuqinsanni qooxeessaho baatto loosidhe galtino dagara tuqinsanni hee’noonnita egensiisino.
Wole widoonni qooxeessaho ha’nura ikkitinota weesete sircho garunni agaranna laalchimmansa ledatenni diilallote akati soorro kalaqantanno qooxeessuwara tuqinsanni hee’noonnitano hattonni. Konni kaiminni, qoqqowoho qarunni weese laashshitannore onte woradda filatenni laalchimmansa woyyaabbinota weesete sircho gamba assine wolootta woraddara tuqisate loossa loonsoonni yiino; Sooreessu kalaa Memmiru.
Qoqqowoho xaa yannara 5 kume 90 hekitaare baatto aana laalchimmansa woyyeessinoonnire weesete sircho hala’ladunni laashshinanni hee’noonnita qummeessinohu sooreessu; sagalete wowe buuxisiisate ragaanni addi illacha tungoonni handaara ikkasi xawisino.
Giwirinnu handaarihu qaru illachi laalchonna laalchimma lossatenni sagalete wowe buuxisiisatenna dagoomu horonsi’raanchimma lossate yiinohu kalaa Memmiru; tayxe dirinni Arakka giwirinnu xiinxallote mereershinni laalchimmansa woyyeesinoonnire 5 kume weesete sircho abbisiisatenni loosidhe galtinori qajeelshu mereershira batinsanni hee’noonnita qummeessino.
Sidaami giddo ha’nura ikkitinoti 34 weesete sirchi nooha ikkanna; sagalimmate horonnino sae xaginaatehono horoonsi’nanniri weesete sirchi nootano kullanni.
Bakkalcho Ella 8, 2015 M.D
