Gobboomu giddo qarranke ofolline hasaawa argetenni afi’noommoha dikkino. Afuu babbaxxo ikkinniina Sidaamu daga giddo “Affini” balchoomi mitto coye woleho sayinse uyinikkinni hanqanfe amande qarra tirranninna araarsinanni garaati. Kuni amaalamate giddo mittoho. Coy giwe mommoddiro cimeesu amaalete yee qarransa amadde shiqqure amaalete yee kayisanno. Guni budi afuunninna woloottu budu akatinni babbaxxo ikkinniina;araarsa,qarra tira Itophiyu giddo duuchunku qooxeessira duuchante dagawa afamanno budeeti.
Duuchunkunni roore gobboomu Polotikinke tenne yanna woxxannoha ikkanno gede assa agarantannonke. Kuni duuchanta daga la’’annore ikkirono;baalunkunni roore qarunni albisa ikkitino polotikanyooti polotikinsa hedo kaiminna safo bero jawa waaga baatisiissinonke laafanna yanna sa’ino hedo agurte; xa co’ittenna annimma macciishshantanno doogonninna ammanamooshshunni mittimma amaalama agarantannonsa.
Gobba heewotenni di suffanno. dagganno ilama ninkewiinni bacare agartanno. Hiittoo gobba ragisiinseemmonsaro techo amaalama doorshu nookki hajooti. Seeda yannara giddonke noo baxillu,amaalammetenna hanqafaanchimmate balchoomi hoshooshameenna techo ilama waaga baattanni afantanno. Polotiku hedo babbadamooshshinni qeelaamaanchonna bareeda yinanna busha hedo buqqeete quxantanni daggino. Polotikanyootu Ganotenna wolqatenni hirame keeshshinonna geedhino polotiki laooshshinni fula, konninni roore aantino gobbate kaayyo xabbinota ikkitanno gede assara dandaanno;babbadamooshshe hasaawunninna caaleho ofolline tira kaima assino polotiku hedora umonsa fajjitaranna qixxaabbara hasiisanno
Itophiyu baca kakkalonni techo haxo gotti yiino wolambinatu dhagge ba’latto noosintenni gede;ninkeno dagganno ilama haxonsa gotti assite hadhanno gede haxo heeshshi assannorinni baxxine,buximate illera bushsha ganne lattino Itophiya ragisiisate polotikanke yanneessanna bilchaatisa hasiissanno. Konnira xaa yannara hananfoonni qarrubbanke aana hasaambe sumiimmete iillatenna dangoommo doogga kiphote handuluullenni fulatenni keeraanchonna attino Itophiya kalaqate sommoonni gobboomu amaalammete komishiine sokko gafa gantanno gede kaajjine loosa hasiissanno.
Komishiinete sokko seeda dirrara gongo’mitanni daggino giddooyidi qarrubbanke hasaawunni tirate dandiissanno polotiku bude dhaabbachisha,Dimokiraasete seeri gatamarshira injoo kalaqa,lattino gobbanna kaajjado mootimma kalaqate noonsa danchu waatinni huwata hasiissanno. Tini kiphote handuluullenni fulate dancha kaayyooti. Konni daafira gobboomu Amaalammete komishiine duucha dagoomu bissa beeqqisiissannota ikkasenni xa hee’noommonna dagganno ilamara yine subbanno gede assa agarantannonke.
Komishiineroota duuchunku qooxeessinni riqibbannore doorroonni. Gobboomu amaalammera beeqqitannorino duucha dagoomu bissa beeqqisiissanno. Koo/tee,amma’no woy sircho,calla riqibbannota dikkitino. Hedote riqiwono heedhanno. Hedote babbadamooshshi tenne amaalammete komishiine giddo haa’ne hasaambannita ikkaseno 2ki komishiinerichi Yoonaas adaaye buuxisino.
Itopiyu ilama ikkitinore mittono beeqqatenni dihoollanni. Togo yinanni woyte 120 miliyoone Itophiyu daga baala beeqqisiisa dandiinannikkita deama di hasiissanno. Ikkollana,filloonni basenni,mereersino garinni,hiittenne dagannino riqibbannore daga doodhitenna riqibbeenna loosu giddora e’nanni hajooti Tenne komishiine giddo hiiti hajono uulla di ubbanno. Gobba gobbannota ikkituro amaalamme sumuu yinanni. Sumuu yine assinoonniri ga’ara di bushannona.
Amaalammete komishiine hasiishshi hedote babbadamooshshe gamba assine gobboomu sumiimme kalaqateeti.hedote babbadamooshshi dhiiga dikkino. Ninke Itophiyu daga afiinke,budinke,balchoo minke,inteemmonna angeemmo horinyuwanke babbaxxitinote. Babbadamooshsinke biinfillenkeeti. Mittowa gamba assinummoro gobba gowanno budi noonke. Konni daafira babbaxxitino hedo hee’ra gadachote. Tenne babbaxxitino hedo gamba assine gobba gowannore mala dancha kaayyootina luxuphitoonke.
Xa komishiine looso eeli geeshsha diriirsitino. Riqibbanno bissano wodhote garinni fillanni hee’noonni. Hananfoonni gobboomu amaalamme gafa gantanno gede albankeenni gatinori Hedote fushshaatooti. Mayi aana hasaambo? Dagate fonii giddo mayi no? Gobba gobbanno hedo fushshatenni gobboomu amaallammera suwashsho hedote wora hasiissanno. Baalunku Itophiyu qansooti komishiinete basete leellatenni,bilbilu kiiro 011126119/0975554500 aana bilbilatenni hasaawama hasiissanno yitanno hajubba shiqishshanno gede komishiine injiishshino jawaachishshannotena beeqqo assa hasiissanno.
Bakkalcho Ella 1, 2015 M.D
